Zisonika Matai 25:1-46
25 “Kintinu ki diyilu kidi buka kumi di bakietu bakhambu zaba dibakala, baba na minda mi bidoka phemu, babasika muingi kuedengana dibakala di dikuela.
2 Baba tanu basa ba ko nduenga, vayi batanu bankaka baba nduenga.
3 Bo bakhambu ba nduenga, babonga minda miawu, vayi basa nata ko mafuta*,
4 angi bo baba nduenga, banata mafuta mu bibudika* va kimueka na minda miawu.
5 Bo dibakala di dikuela kaba kala kisina, baboso babaka tolo ayi balala.
6 Va khati builu, bayuwa batu kutenduka: ‘Dibakala di dikuela matuka! Basikanu muingi muendengana.’
7 Bosi bakietu beni batelama ayi baba mu ntanda na minda miawu.
8 Bo bakhambu ba nduenga, bakamba bo baba nduenga: ‘Wutu vananu nkadu mafuta, kibila minda mitu miembelama kudoka*.’
9 Vayi bawu baba vutudila: ‘Ḿba masinkuiza fuana ko kuidi befu ayi kuidi benu, diawu buboti muenda kuidi bo bansumbisanga mafuta, muingi muesumba nkadu.’
10 Ayi bo bayenda kuesumba mafuta, dibakala di dikuela wuvitila. Bakietu baba bakubama, bakota mu nkungi wu dikuela ayi bazibika muelu.
11 Bakietu bayenda kuesumba mafuta bo bavitila, baba tuba: ‘A Mfumu, a mfumu, yiza tuzibudila!
12 Nandi wuba vutudila: ‘Bukiedika yiku lukamba: ‘Minu yisa muzaba ko.’
13 “Diawu banu bakotuka*, kibila benu lusa zaba ko ni kilumbu ni kilokula.
14 “Mawu madi buka dibakala dimueka, ava nandi kenda ku tsi yinkaka, wutumisa bisadi biandi ayi wuba vana biuma biandi muingi bawu bakieba.
15 Kuidi wutheti wuvana zitalanta zitanu, kuidi wunkaka zitalanta wadi ayi kuidi wuntatu talanta yimueka. Nandi wuvana kuidi kadika mutu mu kutadila diela diandi, bosi wuyenda ku tsi yinkaka.
16 No wutambula zitalanta zitanu, mu thinu wutona kuvanga lungosu mu zitalanta beni, ayi wubue baka zitalanta zitanu zinkaka va mbata.
17 Bobuawu mvandi, no wutambula zitalanta wadi, wuvanga lungosu ayi wubue baka zitalanta wadi zinkaka va mbata.
18 Vayi kisadi kitambula talanta yimueka, wuyenda, wusika dibulu ayi wuzika zimbongo beni katambula kuidi mfumu’andi.
19 “Bo vavioka thangu yiwombo, mfumu bisadi beni wuvutuka, ayi wuba dinda kipholo.
20 Bosi no wutambula zitalanta zitanu, wuyiza va ntuala mfumu, wutuala zitalanta zitanu zinkaka va mbata ayi wutuba: ‘A mfumu ngie wuphana zitalanta zitanu, tala, yibakizi zitalanta zitanu zinkaka va mbata.’
21 Mfumu’andi wunkamba: ‘Buboti beni kisadi kimboti ayi kikuikama! Ngie wumonisini lukuikumunu mu kukieba biuma biluelu. Yinkuiza kuvana biuma bilutidi muingi wukieba, diawu yangalala va kimueka na mfumu’aku.’
22 Bosi kisadi wutambula zitalanta wadi wuyiza va ntuala mfumu’andi ayi wutuba: ‘A mfumu ngie wuphana zitalanta wadi, tala, yibakizi zitalanta wadi zinkaka va mbata.’
23 Mfumu’andi wunkamba: ‘Buboti beni kisadi kimboti ayi kikuikama! Ngie wumonisini lukuikumunu mu kukieba biuma biluelu. Yinkuiza kuvana biuma bilutidi muingi wukieba, diawu yangalala va kimueka na mfumu’aku.’
24 Bosi kisadi wutambula talanta yimueka wuyiza va ntuala mfumu’andi ayi wutuba: ‘A mfumu, minu yizebi ti ngie ntima wungolo wukala, wumvelanga mimbutu vo bekhambu kunina ayi wunlundanga mbongo yo bekhambu kongula.
25 Diawu yimuena boma ayi yizika talanta yo wuphana. Buawu tambula talant’aku.’
26 Mfumu’amdi wumvutudila mu kunkamba: ‘Kisadi kimbi ayi kidi bolo*, fuanu ngie wuzaba kuaku ti minu, yimvelanga mimbutu vo yibe khambu kunina ayi yinlundanga mbongo yo yibe khambu kongula?
27 Bo ngie wuzaba mawu, khanu wuvana zimbongo ziama kuidi basi banco, ayi mu phutukulu’ama, khanu bawu bavutudi ziawu na zimbongo zinkaka va mbata.
28 ‘“Diawu, bonganu talant’andi ayi vananu yawu kuidi no widi kumi di zitalanta.
29 Kibila noso widi bala buela kumvana ayi nandi wala baka bilutidi. Vayi noso khambulu, bala kumbonga kheti bio bidi yandi.
30 Ayi lukuba kisadi beni kimbi ku nganda, ko kuidi kitombi. Kuakuna kala didila ayi kala kuetilanga menu.’
31 Bo Muana Mutu kala kuiza mu nkembu’andi, va kimueka na zimbasi ziandi zioso, nandi wala kala va kikundu kiandi ki kimfumu.
32 Mimvila mioso, bala kutikisa miawu va ntual’andi, ayi nandi wala vasa batu dedi bo nsungi wu mamemi kamvasilanga mamemi na zikhombo.
33 Ayi wala tula mamemi ku lubakala luandi ayi zikhombo ku lukietu.
34 Ntinu wala kamba bo bala ba ku lubakala luandi: ‘Yizanu benu lusakumunu kuidi Tat’ami, kotanu mu Kintinu kio Nandi ka mukubikila tona vana thonono nza.
35 Kibila bo yiba mu nzala benu luphana kiuma ki kudia. Bo yiba mu phuila, benu luphana kiuma ki kunua. Bo yiba nzenza va khat’inu, benu luthambula buboti,
36 bo yiba pheni nkua, benu luphana bikhutu bi kuvuata. Bo yiba bela, benu lukhieba. Bo yiba mu buloku, benu muyiza thala.’
37 Bosi, batu basonga bala kumvutudila: ‘A Mfumu, thangu mbi befu tuku mona mu nzala ayi tuku dikila, voti mu phuila ayi tuku vana kiuma muingi kunua?
38 Thangu mbi wubela nzenza va khat’itu ayi befu tuku yamba buboti, voti ngie wuba pheni nkua ayi befu tuku vuika bikhutu?
39 Thangu mbi befu tuku mona ngie kubela, voti mu buloku ayi befu tuyiza kutala?’
40 Ntinu wala kuba vutudila, mu kuba kamba: ‘Bukiedika yiku lukamba ti: Mambu moso benu luvangila kuidi zikhomba ziama azizi zikhambulu beni mfunu, kuidi minu luvangila mawu.’
41 “Bosi wala kamba badi ku khonzu’andi yi lukietu: ‘Botukanu va ntual’ama benu batu basingu, yendanu ku mbazu yikhambu dokanga bakubikila Nkadi’ampemba ayi zimbasi ziandi.
42 Kibila bo yiba mu nzala, benu musa kuphana ko kiuma ki kudia; ayi bo yiba mu phuila, benu musa kuphana ko kiuma ki kunua.
43 Bo yiba nzenza va khat’inu, benu musa kuthambula ko buboti; bo yiba pheni nkua, benu musa kuphana ko bikhutu bi kuvuata; bo yaba bela ayi yiba mu buloku, benu musa kukhieba ko.’
44 Ayi bawu bala kumvutudila: ‘A Mfumu, thangu mbi befu tuku mona mu nzala, mu phuila voti wuba nzenza, wuba pheni nkua, waba bela voti wuba mu buloku, vayi befu tukhambu kusadisa?’
45 Bosi nandi wala kuba vutudila: ‘Bukiedika yiku lukamba ti: Mo benu lukhambu vangila kuidi wumueka mu zikhomba ziama bakhambulu beni nkinza, kuidi minu mukhambu vangila mawu.’
46 Bawu bala baka mbungulu yi mvu ka mvu, vayi batu basonga bala baka luzingu lu mvu ka mvu.
Footnotes
^ Yiba ntindu nzeta yaba basikilanga mu minti mi olive, baba tulanga mu minda muingi milema.
^ Voti: “mintutu.”
^ Voti: “kuzima.”
^ Voti: “balubuka.”
^ Voti: “kidi buyemba.”
