Buku yi Mavanga 22:1-30
22 “Babakala, zikhomba ayi matata, tekanu matu mambu yamu kamba muingi kuyikakidila.”
2 Bo bayuwa ti nandi waba kolukila mu mbembu yi kiebeleo, baluta ba sui. Bosi nandi wutuba:
3 “Minu yidi musi yuda, yibutikila ku Tarsu divula di Silisia, vayi yilongukila ku divula adidi ayi Ngamalieli nandi wuba nlongisi’ama. Bandongisa mu kulandakana Minsiku mi bakulu bitu, mu kuba kifuza mu Nzambi dedi bo benu muididi bubu.
4 Minu yaba kuamisanga ayi yaba vondisanga minlandikini mi nzila yikiedika, yaba kuba kanganga ayi yaba kuba tulanga mu buloku, kuba kuandi babakala ayi mvandi bakietu;
5 Nkulutu wu zinganga nzambi ayi bakulutu boso ba dikabu balenda ta kimbangi mu mawu. Mvandi baphana minkanda miphana nsua wu kue kanga zikhomba ku Damasco ayi kuba tuala ku Yelusalemi, muingi kukuamisa baboso baba kuna.
6 Vayi mu nzila, mu kilokula ki 12 va muinya, bo yaba fikama ku divula di Damasco, mu kinzimbukila yimona kiezila kingolo kifumina ku diyilu ayi kiaba lezama va kibuangu yiba.
7 Ayi minu yibua va tsi, bosi yiyuwa mbembu yaba kukhamba: ‘Saulu, Saulu, kibila mbi widi mu kukhuamisina?’
8 Minu yimvutudila: ‘Ngie widi nani?’ Nandi wukhamba: “Minu yidi Yesu, musi Nazaleti, no ngie widi mu kukuamisa.’
9 Babakala baba yama bamona kiezila, vayi basa kuwa ko mbembu yi mutu waba koluka yama.
10 Bosi minu yinyuvula: ‘A Mfumu, mbi yifueti vanga?’ Nandi wuphutudila: ‘Telama ayi yenda ku Damasco, kuakuna wunkuiza zabila mamoso babe kusodila muingi wuvanga.’
11 Vayi, bo yaba khambu nunga kumona mu kibila ki kiezila beni, yivitila ku Damasco mu lusalusu lu batu baba yama, bo batsimba mu koko.
12 Bosi, dibakala dimueka baba tedilanga Anania, waba tumukinanga Minsiku ayi no basi yuda baba kalanga ku Damasco baba tubilanga buboti,
13 wuyiza thomba. Nandi wufikama vo yiba ayi wukhamba: ‘Saulu, khomb’ama, bika mesu maku mazibuka! Ayi muna thangu beni, mesu mami mazibuka ayi yinunga kummona.
14 Nandi wukhamba: ‘Nzambi yi bakulu bitu, wu kusodidi muingi wuzaba luzolo luandi, wumona mutu Wusonga ayi wuyuwa mbembu yimbasikila mu munu’andi,
15 kibila ngiewu wala kuntela kimbangi va ntuala batu boso, mu mambu wuyuwa ayi wumona.
16 Buabu, mbi widi mu kuvingila? Telama, botama muingi wuba wudiodila mu masumu maku mu kusadila dizina diandi.’
17 Vayi, bo yivutuka ku Yelusalemi, minu yaba sambila ku tempelu, bosi yitona kumona kimona mesu
18 ayi yimona Mfumu kukhamba: ‘Basika mu thinu ku Yelusalemi, kibila basinkuiza vitika ko kimbangi wunkuiza bavana mu matedi minu.’
19 Bosi minu yinkamba: ‘A Mfumu, bawu bazebi buboti ti mu zinzo zioso zi zikhutukunu, minu yaba kanganga ayi yaba bulanga baboso baba kikinina mu Mfumu.
20 Ayi bo baba tengula menga ma Estefanu kisadi kiaku, minu yiba vana, yaba kikinina mawu ayi yaba kieba bikhutu bi mbata bi batu baba kumvonda.’
21 Kheti mu mambu moso amomo, nandi wukhamba: ‘Yenda, kibila minu yinkuiza kufila kuidi mimvila midi ku kinanu.’”
22 Bawu bayuwa mambu amomo. Bosi va kimueka batenduka mu mbembu yinangama, mu kutuba: “Vondanu dibakala adiodio, kibila kasa fuana ko kutatamana kuzinga!”
23 Mu thangu baba tenduka, bawu baba loza bikhutu biawu bi mbata va khonzu ayi baba kuba ntoto ku yilu,
24 mfumu masodi wutuma banata Polo ku khati nzo yi masodi ayi wutuma bambula theti, bosi bamfundisa muingi kazaba buboti kibila mbi nkangu wu batu baba kuntendukila mu phila ayoyo.
25 Vayi, bo bamana kunkanga muingi kumbula bikoti, Polo wuyuvula nkulutu masodi wuba vana: “Bukiedika kuandi ti nsiku wumvana nsua kubula theti musi Loma, bosi kumfundisa?”
26 Bo nkulutu masodi beni kayuwa mawu, wuyenda kuidi mfumu masodi ayi wunkamba: “A mfumu, mbi ngie wuntomba kuvanga? Dibakala adiodio widi musi Loma!”
27 Mu phila ayoyo mfumu masodi wufikama vo kaba ayi wunkamba: “Khamb’abu, ngie widi musi Loma?” Nandi wumvutudila: “Ngete.”
28 Bosi mfumu masodi wunkamba: “Minu yisumba luaku lu kuba musi Loma mu zimbongo ziwombo.” Vayi Polo wumvutudila: “Minu yibutuka na luaku alolo.”
29 Mu phila ayoyo, babakala baba bakubama muingi kumfundisa ayi kumbula, batatuka mu thinu. Ayi mfumu masodi wuba beni mu boma bo kazaba ti mutu kakangisa wuba musi Loma.
30 Diawu, mu kilumbu kilanda, bo kaba tomba kuzaba kibila mbi basi yuda baba kumfudisila, wunkutula mu ziphanga ayi wutumisa zimfumu zi zinganga nzambi ayi mimfundisi mioso, muingi bakutakana. Bosi wunata Polo kuna wanda ayi wuntelimisa va khati’awu.
