Buku yi Mavanga 27:1-44
27 Bo babaka makani ti tufueti kuenda ku Italia, Polo ayi bankaka baba mu buloku baba tula mu nsua wu nkulutu wu masodi ma Angustu baba tedilanga Yulio.
2 Tumaka mu dikumbi diaba nanguka ku Adramítio, muingi kukuenda mu malondo maviakana maba ku dibueti di Azia, ayi befu tunanguka. Tuba na Alistalaku, musi divula di tesalonika didi ku dibueti di Maseduani.
3 Mu kilumbu kilanda, befu tusesa theti ku Sidon; ayi Yulio wuvangila Polo mamboti mu kumvana luaku lukue tala bakundi muingi katambula lukiebu luawu.
4 Bo tubotuka kuna, tuyendila mu dikumbi ku khonzu ḿbu wu Shipre, kibila phemu yaba fumina ko tuaba kuenda.
5 Bosi tuviokila ku khonzu ḿbu wuba ku khonzu Silisia ayi ku Pamfilia, bosi tusesa ku londo lu Mila, ku Lisia.
6 Ayi ku londo* beni, kuawu nkulutu masodi kabakila dikumbi di Alexandria diaba kuenda ku Italia ayi nandi wu tumakisa muawu.
7 Bo tuviokisa bilumbu biwombo mu kue diatanga malembe malembe, bosi tuvitila mu phasi ku Kenido. Ayi bo phemu yiba ku tutula nkaku kutatamana kukuenda ntuala, diawu tuyendila ku khonzu Krete ayi tuvitila ku Salimone.
8 Ayi mu phasi, tuviokila muyendila ḿbu ayi tuvitila va kibuangu baba tedilanga Malondo Mamboti*, maba mafikama na divula di Laseya.
9 Thangu yiwombo yivioka ayi diyiza ba diambu diphasi kukuendila mu dikumbi, mvandi kilumbu ki jejum* ki yiviokila. Diawu Polo kavanina ndubu ayiyi:
10 “Babakala, mu phila yimmuena, viaje ayiyi yisinkuiza ba ko yimboti, kibila tuisinkuiza zimbisa ko to mimfuna mitu ayi dikumbi, vayi mvandi tunkuiza tula luzingu luitu va kingela.
11 Vayi nkulutu wu masodi kasa kuwila ko Polo mu mambu katuba, vayi wusola kulandakana mambu mutu vuidi dikumbi ayi bo baba nata diawu batuba.
12 Bo londo beni dikhambu ba difuana muingi kuviokisila thangu yi kiozi ki ngolo, nduka batu boso bavana diyindu di kubotuka vana muingi kutuka ku Fenikisi, londo di Krete, diaba vananga luaku lu kukuendila ku Nordeste voti ku Sudeste ayi kuviokisila kuna thangu yi kiozi kingolo.
13 Mu thangu phemu yaba fumina ku khonzu yi sude yaba vevumuka mu malembi, bawu bamuena ti banunga kudukisa makani mawu. Diawu banangunina kisengu kinsikimisanga dikumbi, batona kudiatisa dikumbi mu ndeku ḿbu wu Krete.
14 Vayi mua thangu to yivioka, vayiza monika kivuka kingolo kifumina ku khonzu Nordeste kizabikini mu dizina di Eurakiloni,
15 ayi kiawu kivevumuna dikumbi mu mangolo ayi basa bue nunga ko kusikika ntu wu dikumbi kuntuala mu kibila ki phemu; diawu befu tubika to phemu yi tunata.
16 Bosi tuviokila va kibuangu ki nsika kiba va mua kiseki* bantedilanga Kawuda. Vayi kheti bobo diba diambu diphasi kutuadisa mua buatu tuaba nata mu dikumbi.
17 Ayi bo bakandika mua buatu beni mu dikumbi, batona kusadila minsinga mingolo muingi kukindisa kukanga bibaka bi dikumbi. Ayi mu kibila ki boma baba ti diawu dilenda sinda mu nsengiseni wu Silite, diawu bakuludila minledi mindiatisanga dikumbi ayi phemu yitona kunata dikumbi.
18 Bo phemu yaba nyikuna beni dikumbi mu zikhonzu zioso, diawu mu kilumbu kilanda batona kuloza mu ḿbu mimfuna miba mu dikumbi.
19 Ayi mu kilumbu kintatu, baveka mu mioko miawu, batona kuloza bisadulu binkaka binkinza bi dikumbi mu ḿbu.
20 Vavioka bilumbu biwombo mukhambu mona muinya ayi zimbuetila, kibila tuaba viokila mu kivuka ki ngolo. Diawu kivuvu kioso tuba ki kuvuka, kitona kumana.
21 Bo vavioka thangu yiwombo mukhambu dia ni kiuma, Polo wutelama va khati’awu ayi wuba kamba: “Babakala, bukiedika, boti lube kikinina dilongi yibe luvana bo tube ba ku Krete, khanu tuisimviokila ko mu ziphasi azizi ayi kubunga mimfuna.
22 Vayi kheti bobo, minu yiku mukindisa luba kibakala, kibila ni mutu wumueka kasinkuiza fua ko, vayi dikumbi diawu to dinkuiza tolumuka.
23 Kibila va builu bubedi, mbasi yi Nzambi yo minu yivuidi ayi yimvangilanga kisalu kinlongo, wumonikini va khonzu’ami.
24 Ayi nandi wukhembi: ‘Polo, bika kumona boma, kibila ngie fueti vitila va ntuala Sezali. Mvandi Nzambi wunkuiza kuvukisa ayi wunkuiza vukisa baboso bankuenda yaku mu dikumbi.’
25 Diawu babakala, banu kibakala, kibila minu yidi lufiatu mu Nzambi ti, mamoso mankuiza monikina dedi bo bakhambidi mawu.
26 Vayi tunkuiza sinda va nsengiseni widi va kiseki kimueka.”
27 Kiba kilumbu kumi yinna, ayi phemu yaba vevumuna dikumbi mu zikhonzu zioso ku ḿbu Adria, buawu va khati builu batu baba tuadisa dikumbi babakula ti tuaba belama kutuka ku disimu di ntoto.
28 Bo bazonga vama beni baba, babakula ti vaba mu kutala ayi mu kumona, 20 braças* mu kuvinda*, ayi bo banunguka kuntuala ayi babue zonga, babakula ti vaba 15 braças*.
29 Ayi bo baba boma ti dikumbi dilenda kandana mu mamanya, diawu bakuludila bisengu binna binsikikanga dikumbi kumbusa ayi baba tomba beni buisi bufika kia.
30 Vayi mu thangu batu baba nata dikumbi babaka mayindu ma kutina mu buatu, bawu bakulula mua buatu ayi baba tomba mvandi kukulula bisengu binsikikanga dikumbi ku ntuala.
31 Bo Polo kazaba mawu, diawu kakambila nkulutu masodi ayi masodi mankaka: “Batu abobo ba kukhambu tatamana mu dikumbi, benu luisinkuiza vuka ko.”
32 Diawu masodi bazenga minsinga mi buatu ayi bakulula buawu.
33 Bo buisi buaba kia, Polo wukindisa baboso muingi badia, mu kuba kamba: “Bubu kiawu kilumbu kumi yinna luidi mu kuvingila mu phuila vayi ludidiabu ko ni kiuma.
34 Diawu dilongi yiku luvana; ludia kibila biawu binkuiza luvanga buboti, ayi ni mutu mu benu kasinkuiza fua* ko.”
35 Bo kamana kutuba mambu amomo, nandi wubonga dipha, wusambila mu kuvutula matondo va ntuala batu boso, wubukuna diawu ayi wutona kudia.
36 Mu phila ayoyo, baboso bayiza baka mangolo ayi batona kudia.
37 Thalu yi batu boso baba mu dikumbi yiba 276 di batu.
38 Bo bamana kudia ayi bayukuta, bosi batona kudekula mimfuna mu dikumbi mu kuloza biduku bi trigo* mu ḿbu.
39 Meni meni bo buisi bukia, basa zaba ko kibuangu batuka, vayi bamona disimu di ntoto ayi lukueku, diawu babakila makani boti kuba kusindisa dikumbi beni vana.
40 Diawu bazenga minsinga mi bisengu binsikikanga dikumbi ayi babuisa biawu mu ḿbu. Ayi muna thangu beni, bakutula minsinga miba mu khongolo* bosi bamakisa nledi wu phemu wuba kuntuala ayi dikumbi ditona kufikama ku disimu.
41 Bosi kintu ki dikumbi kisimama mu dikhuku di nsengisini dio nlangu wu ḿbu waba buila mu zikhonzu zia ziwadi. Ayi diawu disa bue nyikuka ko, vayi mayo ma ḿbu matona kuvava mbusa dikumbi.
42 Mu phila ayoyo, masodi babaka makani ma kuvonda batu boso baba mu buloku muingi ni wumueka kabika kutina mu kue sukanga.
43 Vayi nkulutu masodi wubaka makani ma kuvukisa Polo ayi wukamba masodi babika kuvanga mambu bakana. Bosi wutuma muingi batu bazebi kusiuka batuama kudoduka mu ḿbu, muingi bavitila ku disimu.
44 Bosi bankaka balandakana kumbusa, mu kusadila mabaya vayi bankaka mu kusadila bivesu bi dikumbi.
Footnotes
^ Voti: “porto.”
^ Voti: “ziportu zimboti.”
^ Voti: “kuyifuisa nzala; kusingama; kumina nsoki.”
^ Voti: “ilha.”
^ Voti: “kiziba.”
^ yinsundula 36 di zimetro. Tala Ap. B14
^ yinsundula 27 di zimetro. Tala Ap. B14
^ ni nlengi wumueka mu mintu minu wisinkuiza zimbala ko
^ Voti: “zitheti bamvangilanga falini yi mapha.”
^ Voti: “kibindukulu ki dikumbi; guiador.”
