Buku yi Mavanga 6:1-15
6 Mu bilumbu beni, thalu yi minlandikini yiyiza buelama. Ayi basi Yuda baba kolukanga kingeleko, batona kunyunguta mu matedi basi Yuda baba kolukanga kiebeleo, kibila mu thangu baba kabulanga bidia kadika kilumbu, baba zimbakananga mimfuizi baba kolukanga kingeleko.
2 Mu phila ayoyo, kumi wadi di bapostolo bakutikisa dikabu ayi baba kamba: “Buisi ko buboti tubika kutadila matedi diambu di Nzambi, muingi kukaba bidia mu zimeza.
3 Diawu zikhomba, solanu va khat’inu sambuadi di babakala badi bazabakana mu zikhadulu ziawu zimboti, badi thuadusulu yi phevi ayi badi nduenga muingi bakieba kiyeku akiokio ki nkinza,
4 vayi befu tufueti tatamana kukivana mu minsambu ayi kusadisa dikabu mu matedi diambu di Nzambi.”
5 Mambu amomo batuba, mayangidika beni dikabu ayi basola Estefanu dibakala di kiminu ayi wuba mu thuadusulu phevi yinlongo, Filipi, Polokolo, Nikanoli, Timoni, Palemena ayi Nikolau musi Antiokia, no wuyiza kikinina kinganga ki basi Yuda.
6 Bawu baba nata va ntuala bapostolo, bo bamana kuba sambidila, bosi baba thetika mioko.
7 Mu phila ayoyo, diambu di Nzambi ditatamana kutembakana ayi thalu yi minlandikini mi Yesu, yibuelama beni ku Yelusalemi. Mvandi bawombo mu zinganga nzambi, bayiza kuna kiminu.
8 Estefanu mu kibila ki lunungu kaba va mesu ma Nzambi ayi mu mangolo mawombo Nzambi kamvana, nandi waba vanganga bidimbu biwombo ayi mangitukulu va khati dikabu.
9 Vayi mua batu mu dingumba baba tedilanga batu Bakulu va Kivika, va kimueka na basi Sirene, basi Alexandria, mvandi mua ndambu mu basi Silisia ayi basi Azia, bayiza muingi kuthota Estefanu mu biuvu.
10 Vayi bawu basa kindama ko mu kibila ki nduenga ayi mu phila Estefanu kaba kolukila.
11 Diawu ku kinsueki, bavanga muingi batu bakikinina mambu amama: “Befu tube nkuwa kutubila bubi Mose ayi kuvueza Nzambi.”
12 Ayi bawu bavukumuna dikabu dioso, bakulutu ba dikabu ayi ziescriba, muingi badasukila Estefanu. Diawu mu kinzimbukila bayiza kunkanga ayi bannata ku Sinedrio*.
13 Bawu banata batu bata kimbangi ki luvunu mu kutuba: “Dibakala adidi kasimbika ko kuvueza kibuangu akiki kinlongo ayi Minsiku mi Mose.
14 Dedi, befu tube nkuwa kutuba ti Yesu musi Nazaleti, wala tolumuna kibuangu akiki ayi wela balula bikhulu bioso Mose ka tubikila.”
15 Ayi, mu thangu batu boso baba bakala ku Sinedrio batsikika thalu’awu kuidi Estefanu, bawu bamona ti kizizi kiandi kiba buka ki mbasi*.
