Buku yi Mavanga 9:1-43
9 Saulu waba tomba kuvonda minlandikini mioso mi Mfumu mu kibila ki nganzi, diawu kayendila kuidi nkulutu wu zinganga nzambi.
2 Ayi wundinda muingi kasonikina bakulutu ba zinzo zi lukutukunu ziba ku Damasco nkanda, wu kumvana nsua wu kukanga ayi kunata ku Yelusalemi babakala ayi bakietu boso baba landakana Nzila yi Mfumu*.
3 Mu nzila, bo kaba fikama divula di Damasco, mu kinzimbukulu vamonika kiezila kiwombo ki muinda wufumina ku diyilu.
4 Nandi wubua ayi wuyuwa mbembu yaba kunkamba: “Saulu, Saulu, kibila mbi widi mu kukhuamisina*?”
5 Saulu wunyuvula: “Ngie widi nani?” Ayi nandi wumvutudila: “Minu yidi Yesu, no ngie widi mu kukuamisa.
6 Vayi telama, kota ku divula, kuakuna bankuiza kukambila mbi fueti vanga.”
7 Ayi babakala baba diata yandi batelama mu khambu tuba ni diambu, bawu bayuwa mbembu, vayi basa mona ko ni mutu.
8 Bosi Saulu wutelama va tsi kaba. Kheti mesu mandi maba mazibuka*, vayi kabasa nunga ko kumona ni kiuma. Diawu babakala baba yandi, bansimbila mu mioko ayi bannata ku divula di Damasco.
9 Nandi kasa nunga ko kumona mu bilumbu bitatu, mvandi kasa dia ko ayi kasa nua ko ni kiuma.
10 Ku Damasco kuba nlandikini wumueka wu Yesu baba tedilanga Anania. Ayi Mfumu wummonikina mu kimona mesu ayi wuntela: “Anania!” Nandi wutambudila: “Minu kawu, Mfumu.”
11 Mfumu wunkamba: “Kubama ayi yenda mu rua* bantedilanga Yisulama, ku nzo Yuda, tomba dibakala bantedilanga Saulu, muisi Tarsu. Mu thangu ayiyi, nandi widi mu kusambila,
12 ayi mu kimona mesu, nandi bemona dibakala dimueka bantedilanga Anania, bekota va kibuangu kadi ayi bentetika mioko, muingi kanunga kubue mona.
13 Vayi Anania wumvutudila: “A Mfumu, minu yiyuwizi bawombo kutubila matedi dibakala adiodio, mu mambu moso mambi kavangidi bisadi biaku ku Yelusalemi.
14 Ayi akuku, nandi wutambudi nsua kuidi zimfumu zi zinganga nzambi, muingi kukanga baboso bansadila dizina di mfumu.”
15 Vayi Mfumu wunkamba: “Yenda, kibila dibakala adiodio, widi wusolu kuidi minu muingi kanata dizina diami kuidi batu ba nza*, mintinu ayi kuidi bana ba Isaeli.
16 Kibila minu yinkuiza monisa kuidi nandi mambu moso kankuiza viokila mu kibila ki dizina diami.”
17 Mu phila ayoyo, Anania wuyenda, wukota ku nzo ayi wutetika mioko miandi kuidi nandi ayi wunkamba: “Saulu, khomb’ami, Mfumu Yesu no be kumonikina mu nzila yo bekuizila, nandi bethuma muingi yiza kusadisa wubue mona ayi wutambula phevi yinlongo.”
18 Mu kinzimbukila, mu mesu mandi mubua biuma biba buka mako*. Ayi nandi wuvutuka kumona. Bosi wutelama, bambotika,
19 wudia ayi wubaka mangolo.
Nandi wubue kala mua bilumbu va kimueka na minlandikini minkaka ku Damasco.
20 Mu nsualu, wutona kusamuna mu zinzo zi lukutukunu matedi Yesu, wuba zabikisa ti nandi widi Muana Nzambi.
21 Vayi baboso baba kunkuwa, baba kuituka ayi baba tuba: “Dibakala adiodio, kasi ko nandi wube kuamisanga mu nganzi batu ku Yelusalemi babe sadilanga dizina adiodio? Nandi kasa kuiza ko akuku muingi kuba buila ayi kuba nata kuidi zimfumu zi zinganga nzambi?”
22 Vayi Saulu waba buela kifuza kiandi ayi waba vanga basi Yuda ku Damasco, kukuituka mu phila kaba sudikisila ti Yesu, nandi Klistu.
23 Bosi bo vavioka bilumbu biwombo, basi Yuda baba tomba phila yi kumvondila.
24 Vayi Saulu wuzaba makani baba mu nandi. Bawu mvawu baba kengidilanga mielu mi divula builu yi muinya, muingi babaka bu kumvondila.
25 Diawu minlonguki miandi bannatina ayi va builu, bankuludila mu kiphanya mu divudu di kibaka ki divula.
26 Bo kavitila ku Yelusalemi, nandi wumeka kuba va kimueka na minlandikini minkaka, vayi baboso boma baba kummona, kibila babasa kikinina ko ti nandi weka nlandikini wu Yesu.
27 Vayi Balinabasi wunsadisa ayi wunnata kuidi bapostolo; bosi nandi wuba zabikisa buidi Mfumu kamonikina Saulu mu nzila, buidi kayolukila yandi, ayi phila Saulu kayolukila mu kibakala matedi dizina di Yesu ku Damasco.
28 Bosi Saulu wutatamana va kimueka ayi bawu, waba diatanga yawu ku Yelusalemi mu khambu mona boma ayi kukoluka mu kibakala mu matedi Mfumu.
29 Nandi waba kolukanga ayi waba findananga ziphaka na basi Yuda mu mbembu yi kingeleku. Vayi bawu baba tomba kumvonda.
30 Bo zikhomba bazaba mawu, bannengumuna ku divula di Sezaleia ayi bamfila ku Tarsu.
31 Bosi bimvuka bioso ku Yuda, ku Ngalili ayi ku Samalia, biyiza ba mu ndembama ayi biyiza ba bikinda. Ayi bo bimvuka beni biaba tatamana kudiatila mu nzila yi Yave* ayi mu mbombolo yi phevi yinlongo, biawu biaba konzuka.
32 Bo Petelo kaba diengila kizunga kioso kinani, nandi wunengumuka mvandi ku Lida, muingi kue tala minlandikini* mi Yesu baba kalanda kuna.
33 Nandi wudengana kuna dibakala dimueka baba tedilanga Ene. Dibakala beni waba kalanga to va kika mu nana di mimvu, kibila wuba kikata.
34 Petelo wunkamba: “Ene, bika Yesu ka kubelusa. Telama ayi yala kika kiaku.” Muna thangu beni, nandi wutelama!
35 Bo batu boso baba kalanga ku Lida ayi mu thandu Saloni bammona, bawu bakikinina kuba minlandikini mi Mfumu.
36 Ku Jope kuba nlandikini wu Yesu baba tedilanga Tabita, dizina dinsundula Doloka. Nandi waba vangilanga batu mambu mawombo mamboti, ayi waba sadisanga biphumbulu.
37 Vayi mu bilumbu beni, nandi wuyiza bua kubela ayi wufua. Bosi bayobisa nyitu’andi ayi banata yawu ku sala yiba ku kibanga.
38 Bo divula di Jope diba difikama na divula di Lida ayi bo minlandikini bayuwa ti Petelo widi ku divula beni, bafila babakala buadi muingi bankamba: “Lemvuka, yiza mu thinu.”
39 Diawu, Petelo wukubama mu thinu ayi wuyenda yawu. Bo kavitila, bannata ku sala yiba ku kibanga ayi mimfuizi mioso banzungidila. Bawu baba dila ayi baba kummonisa bikhutu bi mbata ayi bikhutu binkaka Doloka kaba tungila bo kaba wu monyo.
40 Petelo wutuma baboso babasika, bosi nandi wufukama ayi wusambila. Bo kabaluka ko kuba mvumbi, nandi wutuba: “Tabita, kotuka!” Bo kazibula mesu, nandi wumona Petelo ayi wukala.
41 Petelo wunsimba mu koko ayi wuntelimisa. Bosi wutela minlandikini minkaka, mimfuizi ayi wummonisa wumonyo kuidi bawu.
42 Batu boso ku divula di Jope bazaba mawu ayi mu kibila akiokio, bawombo bakikinina mu Mfumu.
43 Ayi nandi wukala ku Jope bilumbu biwombo ku nzo Simoni, no waba vanganga kisalu ki minkanda mi bibulu.
Footnotes
^ Mawu mansundula nzila yi nzingulu ayi malongi ma buklistu.
^ Voti: “kuthovudila.”
^ Voti: “matiemuka.”
^ Voti: “nzila.”
^ Voti: “bapakanu, batu ba zitsi zinkaka.”
^ Voti: “makua.”
^ Lit: “boma bu Yave.”
^ Voti: “banlongo.”
