Nkanda Wummuadi wu Yoane 1:1-13
1 Minu nkulutu yi kusonikina, ngiewu nkietu wusolu ayi bana baku. Minu yimu zolanga mu bukiedika, kubika kuandi to minu vayi baboso bazebi kiedika.
2 Befu tu muzolanga beni mu kibila ki kiedika kidi yitu ayi kiala tatamana mvu ka mvu.
3 Bika Nzambi Tat’itu yi diyilu ayi Muan’andi Yesu Klistu, batatamana ku tuvana kiedika, ku tumonisa luzolo, kiadi, ndembama ayi mamboti malutidi.
4 Yinkuangalalanga beni mu kuzaba ti, bana baku bankaka bantatamana kudiatila mu kiedika, dedi bo Tat’itu ka tutuminanga.
5 Buabu yi kudinda, tuzolasananga befu na befu (alolo luisi ko lutumu lumona yi kusonikina, vayi luidi lutumu tutambula tona vana thonono.)
6 Ayi luzolo lunsundula: kutatamana kudiatila mu zithumu ziandi. Alolo luawu lutumu benu muyuwa tona vana thonono. Diawu, tatamananu kudiatila mu luzolo.
7 Kibila mu nza, mueka batu bawombo ba luvunu bakhambu kikininanga ti Yesu Klistu, wubutukila mu kinsuni. Bawu, badi bankua luvunu ayi bakikininanga ko mu Klistu.
8 Luba keba keba, muingi kisalu kioso tuma vanga va khat’inu, kibika ba kiphamba, vayi lutatamana kubakila kiawu ndandu.
9 Woso kuandi mutu wukhambu landakana malongi ma Klistu ayi wunlonga mambu mankaka, kasi ko lunungu va mesu ma Nzambi. Vayi woso wuntatamana kulandakana malongi ma Klistu, widi lunungu va mesu ma Tata ayi ma Muana.
10 Diawu, boti mutu bekuiza mu zinzo zinu ayi kasa mutuadila ko malongi amomo, bikanu kuntambula ayi bikanu kumvana mboti.
11 Kibila woso mutu wu kumvana mboti, widi mu kubuela mioko mavanga mandi mambi.
12 Kheti yidi mambu mawombo muingi ku mukamba, vayi yisintomba ko ku musonikina mawu mu minkanda, kibila yintomba kuiza mutala ayi kukoluka yinu, muingi mayangi minu mabuelama.
13 Bana ba khomb’aku yinkietu, wusolu, ba kuveka zimboti.
