Nkanda Wuntatu wu Yoane 1:1-14
1 Minu nkulutu, yinsonikina kuidi Ngaio khomba yi luzolo, no yinzolanga beni mu bukiedika.
2 Khomb’ama yi luzolo, yinsambilanga muingi mamoso matatamana kukuenda buboti mu matedi ngiewu ayi buvinya buaku, dedi bo wididi mu thangu ayiyi.
3 Kibila minu yinkuangalalanga beni mu thangu zikhomba bankuizanga ayi banta kimbangi ti ngie wunsimbidila kiedika ayi wuntatamana kudiatila mu kiedika.
4 Vasi ko kibila kinkaka kinluta kuthuadisanga mayangi kena akiki: kukuwa ti bana bama bantatamana kudiatila mu kiedika.
5 Khomb’ama yi luzolo, ngiewu wummonisanga lukuikumunu mu mambu wumvangilanga zikhomba, kheti kuidi bo wukhambu zaba.
6 Bawu batubidi beni mu matedi luzolo luaku kuidi zikhomba mu kimvuka. Diawu, lemvuka wuba sengula mu phila yimboti, yidi yifuana va mesu ma Nzambi.
7 Kibila bawu bamvangilanga mawu, mu dizina diandi mu khambu tambula ni kiuma kuidi batu mu nza.
8 Mu kibila akiokio, befu tuidi nsua wu kuyambanga* zikhomba ziphila ayoyo, muingi tuba batu bambuelanga mioko kiedika.
9 Vadi diambu yisonikina kuidi kimvuka kinu, vayi Diotelefe no wuntombanga kuyitula va kibuangu kitheti va khat’inu, wumbayisanga zithuadusulu zioso tumvananga.
10 Diawu bo yala kuiza akoko, yala tubila mambu moso kamvanganga ayi luvunu loso kantiamunanga mu matedi befu. Kubotula kuandi amomo, nandi wummanganga kuyamba zikhomba mu lukinzu ayi wummekanga* kutula nkaku zikhomba zinkaka batidi kuvanga mawu, ayi wunkanikisanga kuba kuka mu kimvuka.
11 Khomb’ama yi luzolo, bika kulandakana kifuani ki batu bamvanga mambu mambi, vayi landakana kifuani ki batu bamvanga mambu mamboti. Kibila mutu wumvanga mambu mamboti widi mu thuadusulu yi Nzambi. Vayi no wumvanga mambu mambi kasi ko mu thuadusulu yi Nzambi.
12 Zikhomba zioso bantubilanga buboti matedi Demetiliu ayi zikhadulu ziandi mvandi zimmonisa mawu. Befu mvitu tunta kimbangi matedi nandi ayi ngie zebi buboti ti kimbangi tumvana kidi kikiedika.
13 Yidi mambu mawombo muingi kukamba, vayi yisintomba ko kutatamana ku kusonikina mawu mu minkanda.
14 Kibila mu thangu yikhufi, yintomba kuiza kutala muingi tuyoluka.
Bika ndembama yi Nzambi yiba yaku.
Zikhomba ba kuveka zimboti. Ayi vana mvandi zimboti ziama kuidi zikhomba akoko, kadika mutu mu bawu.
