Nkanda Kuidi Filemo 1:1-25
1 Minu Polo yidi mu buloku mu kibila ki Yesu Klistu, va kimueka na Timoti khomb’itu, yikusonikina ngiewu Filemo khomba wu luzolo ayi nkundi wu kisalu.
2 Mvandi kuidi Afia khomb’itu yi nkietu, kuidi Alikipu wunnuananga yitu nzingu va kimueka ayi kuidi zikhomba zioso bankutakananga ku nzo’aku.
3 Bika ndembama ayi mamboti malutidi ma Nzambi ayi ma Mfumu’itu Yesu Klistu, maba yinu.
4 Khumbu zioso yi kunatanga mu minsambu miama, minu yimvutulanga matondo kuidi Nzambi’ama,
5 kibila yintatamana kukuwa zitsangu zimboti matedi kiminu kiaku, luzolo luaku mu Mfumu’itu Yesu Klistu ayi kuidi baboso Nzambi kasola.*
6 Yinsambilanga muingi kiminu tuidi, kikuvanga kukikinina biuma bioso bimboti tuidi mu nzila Klistu.
7 Khomb’ami, yimueni beni mayangi ayi yibeki mbombolo mu kukuwa matedi luzolo luaku, kibila mu nzil’aku mintima mi batu Nzambi kasola, mibakizi khindusulu.
8 Diawu, kheti mu nzila Yesu Klistu yidi nsua wu kukamba mambu masulama wufueti vanga,
9 vayi yimmona ti buboti ku kukindisa muingi ngie veka wuvangila mawu mu luzolo, kibila minu Polo yima nuna ayi mu thangu ayiyi, yidi mu buloku mu kibila ki Yesu Klistu.
10 Yidi mu kudinda muingi wutsadisa mu matedi muan’ami Onezimu, kibila minu yikitukizi buka tata kuidi nandi, mu mambu yidi mu kuviokila mu buloku.
11 Kumbusa, nandi kasa ba ko tsadulu kuidi ngiewu, vayi mu thangu ayiyi, nandi widi beni tsadulu kuidi ngiewu ayi mvandi kuidi minu.
12 Minu yi kumfila muingi kavutuka kuidi ngiewu, kibila nandi widi mutu yinzolanga beni.
13 Bo yikhidi mu buloku mu kibila ki zitsangu zimboti, minu khanu yintomba kakala yama akuku, muingi kambuela mioko va mvingi’aku.
14 Vayi yisintomba ko kuvanga ni diambu dimueka mukhambu kuzabikisa theti, kibila yisintomba ko wuvangila mawu mu lukuiku, vayi mu luzolo luaku veka.
15 Ḿba buawu nandi ka kutatukila mu mua thangu, muingi bo kamvutuka katatamana kuba yaku,
16 kubika kuandi buka mvika, vayi diambu dinkaka dilutidi mboti kena mvika, mu kuba khomba yi luzolo. Kuidi minu, nandi nkinza wuwombo kakeli, vayi bulutidi kuidi ngiewu, kuba kuandi mu kithuadi kinu mu mambu ma kinsuni ayi mvandi mu Mfumu.
17 Diawu, boti yidi nkundi’aku, lemvuka, yamba Onezimu mu mioko miodi dedi bo wulenda vangila mawu kuidi minu.
18 Mvandi, boti diambu dimbi ka kuvangila voti biuma biaku kandeva, buna minu yinkuiza futa biawu.
19 Minu veka Polo yinsonika mawu mu kutuba ti: minu yinkuiza kufuta. Ayi vasintombulu ko yi kutebula moyo pholo yinneni widi kuidi minu. Yawu yitedi mvandi luzingu luaku.
20 Bukiedika khomb’ami, yintomba beni kutambula lusadusu alolo kuidi ngiewu mu kithuadi na Mfumu. Kindisa ntim’ami mu kithuadi na Klistu.
21 Yi kusonikina, kibila yidi lufiatu ti ngie wunkuiza vanga mambu yi kudinda. Mvandi yizebi ti wunkuiza vanga kuvioka mambu yi kudinda.
22 Vayi, kubotula kuandi mambu amomo, khubikila mvandi kibuangu muingi yivikila. Kibila yidi kivuvu ti mu nzila minsambu mumvanga, minu yinkuiza basika mu buloku.
23 Nkundi’ami wu buloku Epafala, no widi yama kithuadi mu Yesu Klistu, wu kufila zimboti,
24 mvandi bakundi bama ba kisalu, Malaku, Alistalaku, Dema ayi Luka, ba kufila zimboti.
25 Bika mamboti malutidi ma Mfumu’itu Yesu Klistu, maba yinu.
Footnotes
^ Lit: “banlongo.”
