Zisonika Matai 1:1-25
1 Buku yi kinongu ki Yesu Klistu, muana Davidi, muana Abalahami:
2 Abalahami wubuta Isaki,Isaki wubuta Yakobi,Yakobi wubuta Yuda ayi zikhomba ziandi;
3 Yuda na nkazi’andi Tamali,babuta Pelezi ayi Zera; Pelezi wubuta Eziloni,Eziloni wubuta Lamu;
4 Lamu wubuta Aminadabi,Aminadabi wubuta Nasoni,Nasoni wubuta Salmom;
5 Salmom na nkazi’andi Laabi, babuta Bowazi;Bowazi na nkazi’andi Luti, babuta Obedi,Obedi wubuta Jessé;
6 Jessé wubuta Davidi, no wuyiza ba ntinu,Davidi na nkazi wuba wu Ulia babuta Salomo;
7 Salomo wubuta Roboão,Roboão wubuta Abia,Abia wubuta Aza;
8 Aza wubuta Yozafati,Yozafati wubuta Jeorão,Jeorão wubuta Uzia;
9 Uzia wubuta Yotami,Yotami wubuta Akazi,Akazi wubuta Ezekia;
10 Ezekia wubuta Manase,Manase wubuta Amoni,Amoni wubuta Yosia;
11 Yosia wubuta Yekonia ayi zikhomba ziandi, mua thangu ava baba nata mu buvika ku Babiloni.
12 Ayi bo baba nata mu buvika ku Babiloni, Yekonia wubuta Selitieli,Selitieli wubuta Zolobabeli;
13 Zolobabeli wubuta Abiudi,Abiudi wubuta Eliakimi,Eliakimi wubuta Azoli;
14 Azoli wubuta Zadoki,Zadoki wubuta Akimi,Akimi wubuta Eliudi;
15 Eliudi wubuta Eliazali,Eliazali wubuta Matani,Matani wubuta Yakobi;
16 Yakobi wubuta Yozefi nnuni Malia ngudi Yesu, no bantedilanga mvandi Klistu.
17 Mu phila ayoyo, zimbandu zioso kutonina kuidi Abalahami nati Davidi, ziba 14 di zimbandu, kutonina kuidi Davidi nati baba nata ku buvika ku Babiloni, ziba 14 di zimbandu, kutonina mu thangu baba nata ku buvika ku Babiloni nati Klistu, ziba 14 di zimbandu.
18 Buakabu bumonikina mbutukulu Yesu Klistu: Mu thangu ngudi’andi Malia bankanikisa dikuela kuidi Yozefi, nandi wuyiza ba buemba mu nzila phevi yinlongo, mangolo ma Nzambi, ava bawu bakuelana.
19 Vayi nnuni’andi* Yozefi mu kuba mutu wusonga, kabasa tomba ko kumfuisa zitsoni va mesu ma batu boso,* diawu kaba tombila kuvambana* yandi ku kinsueki.
20 Vayi bo kamana kuyindula matedi mambu amomo, mbasi yi Yave yimmonikina mu ndosi ayi yinkamba: “Yozefi muana Davidi, bika kumona boma kunata nkazi’aku Malia ku nzo’aku, kibila buemba buidi yandi, bube kuizila mu mangolo ma phevi yinlongo yi Nzambi.
21 Nandi wunkuiza buta muana wu dibakala ayi ngie fueti kumvana dizina di Yesu, kibila nandi wunkuiza vukisa dikabu diandi mu masumu mawu.”
22 Mambu moso amomo mabe monikina, muingi kudukisa mambu Yave katuba mu nzila ḿbikudi’andi:
23 “Talanu! Muana nkietu wukhambu zaba dibakala, wala ba buemba ayi wala buta muana dibakala ayi bala kumvana dizina di Emanueli, dinsundula, Nzambi widi yitu.”
24 Bosi, Yozefi wuyiza kotuka mu ndosi beni ayi wuvanga mamoso mu phila mbasi yi Yave yintumina. Bosi wunata nkazi’andi Malia ku nzo.
25 Vayi kasa bundana ko yandi nyitu nati kayiza buta muana dibakala, ayi Yozefi wumvana dizina di Yesu.
Footnotes
^ Mu kikhulu ki basi yuda, mutu widi makangu, baba kuntadilanga buka ti widi wukuela.
^ Voti: “nyalu nguba.”
^ Mu kikhulu ki basi yuda, muingi mutu widi makangu kabaka nsua wu kukuela mutu wunkaka, vaba tombulu theti kuvana nkanda wu luvambanu muingi kumanisa makangu.
