Zisonika Matai 16:1-28
16 Ku kibuangu beni, bafalisi ayi basadusi bamfikama ayi bandinda muingi kaba monisina kidimbu ki diyilu.
2 Vayi nandi wuba vutudila: “Buisi bo bunkuila, benu muntubanga: ‘Kimba yono thangu yala ba yimboti, kibila diyilu didi dibenga’.
3 Ayi va meni benu muntubanga: ‘Bubu kunkuiza ba kiozi ayi kunkuiza noka mvula, kibila diyilu didi dibenga ayi kuidi mvandi matuti.’ Benu lunnunganga kuvisa phila diyilu dikadila, vayi muisinnunga ko kuvisa bidimbu bintubila matedi thangu ayiyi.
4 Mbandu yimbi ayi yi kitsuza yintatamana kutomba kidimbu, vayi ni kidimbu kimueka muisinkuiza mona ko, kubotula kuandi kidimbu ki ḿbikudi Yona.” Bo kamana kutuba mambu moso amomo, nandi wuba bika ayi wuyenda kuandi.
5 Minlandikini miandi bataba ku disimu dinkaka, vayi bawu bazimbakana kunata mapha.
6 Yesu wuba kamba: “Zibulanu mesu ayi banu keba keba, mu matedi luvi* lu bafalisi ayi lu basadusi.”
7 Mu phila ayoyo, bawu batona kuyikuvusa baveka mu kutuba: “Tusa nata ko mapha.”
8 Bo Yesu kazaba mawu, diawu kaba kambila: “Babakala ba kiminu kiluelu, kibila mbi muidi mu kukuazukila mu kukhambu tuala mapha?
9 Nati bubu, muvisidiabu ko mambu yima tuba, ayi muisintebuka ko moyo mapha matanu, mo madikila 5.000 di batu, ayi biphani bikua mukongula?
10 Voti mu matedi sambuadi di mapha mo madikila 4.000 di batu, ayi biphani bikua binneni mukongula?
11 Buidi lube khambu visila ti, yisintubila ko matedi mapha? Minu yibe lukamba muba keba keba mu matedi luvi lu bafalisi ayi lu basadusi.”
12 Bosi bawu bavisa ti, nandi kabasa tubila ko matedi luvi bamvangilanga mapha, vayi matedi malongi ma bafalisi ayi ma basadusi.
13 Bo bavitila ku dibueti di Sezaleia yidi ku Filipi, Yesu wuyuvula minlandikini miandi: “Mbi batu badi mu kutuba mu matedi Muana Mutu?”
14 Bawu bamvutudila: “Bankaka badi mu kutuba ti widi Yoane Ḿbotiki, bankaka badi mu kutuba ti widi Elia, ayi vadi bankaka badi mu kutuba ti widi Yelemia voti wumueka mu mimbikudi.”
15 Bosi nandi wuba yuvula: “Buabu mu mbuenu’inu, minu yidi nani?”
16 Simoni Petelo wumvutudila: “A Mfumu, ngie widi Klistu, Muana Nzambi yi monyo.”
17 Diawu Yesu kankambila: “Mayangi beni kuidi ngiewu, Simoni muana Yona, kibila bakana ko mu lusalusu lu batu ngie bezabila mawu, vayi Tat’ama widi ku diyilu, nandi be kusadisa kuvisa mawu.
18 Mvandi minu yi kukamba: “Ngiewu widi Petelo* ayi va mbata dimanya adiodio, vawu yinkuiza tungila kimvuka kiami, ayi lufua lualasa kununga ko.
19 Minu yala kuvana zitsabi zi Kintinu ki diyilu, ayi biabioso wala kanga va ntoto, biala kangama mvandi ku diyilu, ayi biabioso wala kutula va ntoto, biala kutuka mvandi ku diyilu.”
20 Bosi, nandi wukamba minlandikini miandi muingi babika zabikisa ni mutu ti, nandi widi Klistu.
21 Kutona kuandi mu thangu beni, Yesu wutona kusudikisa kuidi minlandikini miandi ti, kafueti kuenda ku Yelusalemi ayi kuviokila mu mambu mawombo maphasi, mu mioko mi bakulutu, zimfumu zi zinganga nzambi ayi kuidi ziescriba, ayi bala kumvonda, bosi mu kilumbu kintatu Nzambi wala kumvulubusa.
22 Mu kibila akiokio, Petelo wuntumisa va khonzo ayi wutona kunsemba, mu kutuba: “A Mfumu, wuyimona kiadi, mambu amomo malendi kumonikina ko.”
23 Vayi Yesu wubanda Petelo mbusa ayi wunkamba: “A Satana, mbika! Yisintomba ko kukuwa, ngie widi dimanya dintomba kumbuisa, kibila wisi ko mayindu ma Nzambi, vayi ma batu.”
24 Bosi Yesu wukamba minlandikini miandi: “Woso kuandi mutu wuntomba kuba nlandikini’ama, kafueti kuyimanga ayi kunata dikunzi diandi di ziphasi, muingi katatamana kundandakana.
25 Kibila woso wuntomba kuvukisa luzingu luandi, wala luzimbisa, vayi woso wunzimbisa luzingu luandi mu kibila kiama, wala lutambula.
26 Bukiedika, ndandu mbi yidi mutu kubaka nza yimvimba, boti wunkuiza zimbisa luzingu luandi? Voti, mbi mutu kala vana va mvingi luzingu luandi?
27 Kibila Muana Mutu wala kuiza mu nkembu wu Tat’andi na zimbasi ziandi, bosi wala vana mfutu kuidi kadika mutu mu kutadila mavanga mandi.
28 Bukiedika yiku lukamba ti: “Bankaka badi avava, ava bafua, bala mona Muana Mutu kukuiza mu Kintinu kiandi.”
Footnotes
^ Voti: “fermento.”
^ Petelo kikuma ki kingeleko kinsundula, dimanya dinneni voti kitini ki dimanya.
