Zisonika Matai 27:1-66
27 Bo buisi bukia, zimfumu zioso zi zinganga nzambi bakutakana na bakulutu, muingi babaka makani matedi buidi bankuiza vakudila Yesu, muingi kumvonda.
2 Bo bamana kunkanga, bannata ayi banyekula kuidi mfumu Pilatu.
3 Bo Yuda no wuvakula Yesu kazaba ti bazengila Yesu nkanu wu lufua, nandi wumona beni phasi mu ntima, diawu kaye vutudila 30 di zimbongo zi palata kuidi zimfumu zi zinganga nzambi ayi kuidi bakulutu,
4 ayi wuba kamba: “Yivodidi disumu mu kuvakula menga makhambulu kibila.” Bawu bankamba: “Buabu, mbi befu tufueti vanga? Amomo makutedi kuaku ngie veka!”
5 Mu phila ayoyo, nandi wusa loza zimbongo beni kuna khati tempelu ayi wubasika kuandi. Bosi wuyenda kue yiledika.
6 Vayi zimfumu zi zinganga nzambi babonga zimbongo beni zi palata ayi batuba: “Tuisi ko nsua wu kutula zimbongo aziozio mu kasu yi makaba ma nlongo, kibila zidi zimbongo zi menga.”
7 Bo bamana kudedikisa mayindu, bosi basadila zimbongo beni muingi kusumbila kitini ki ntoto* kuidi mutu wumvanganga biuma bi tuphandu muingi kiba kibuangu ki kuzikilanga zinzenza.
8 Diawu kitini beni ki ntoto ba kitedilanga Kitini ki Ntoto ki Menga.
9 Mu phila ayoyo, mambu ḿbikudi Yelemia katuba masunduka: “Ayi basadila 30 di zimbongo zi palata, thalu yo batsikika muingi kusumbila mutu. Mutu no mua ndambu mu basi Isaeli batsikikila thalu yi zimbongo,
10 ayi basumbila ziawu kitini ki ntoto ki mutu wumvanganga biuma bi tuphandu, dedi bo Yave kathumina.”
11 Yesu wuba va ntuala mfumu ayi mfumu beni wunyuvula: “Ngie Ntinu basi Yuda?” Yesu wuntambudila: “Ngie veka widi mu kutuba mawu.”
12 Vayi Yesu kasa vana ko ni mvutu wumueka mu thangu zimfumu zi zinganga nzambi ayi bakulutu baba kumfundila mambu.
13 Diawu Pilatu wunyuvula: “Ngie wisinkuwa ko mambu mawombo badi mu kufundila?”
14 Vayi nandi kasa mvutudila ko ni kheti kutuba diambu dimueka, mawu mavanga Pilatu kukuituka beni.
15 Mu kilumbu ki nkungi, mfumu wuba kifu ki kubasisanga mutu wumueka mu buloku, mutu no dikabu bansola.
16 Ayi mu thangu beni mu buloku muba kidofulu kimueka wuba wuzabakana baba tedilanga Balabasi.
17 Diawu bo bawu baba bakutakana, Pilatu wuba yuvula: “Nani mu bawu benu luntomba minu yibasisa, Balabasi voti Yesu no bantedilanga Klistu?”
18 Kibila Pilatu wuzaba ti bawu bavakudila Yesu, mu kibila ki nsoki.
19 Kubotula kuandi amomo, bo Pilatu kaba wukala ku nzo lufundusu, nkazi’andi wumfila thumu ayiyi: “Bika kukota mu mambu ma dibakala adiodio disonga, kibila mu builu abubu minu yibe loto ndosi matedi nandi ayi yawu yibe kumbika beni mu boma.”
20 Vayi zimfumu zi zinganga nzambi ayi bakulutu, bavukumuna nkangu wu batu muingi badinda ba basisa Balabasi, vayi bazengila Yesu nkanu wu lufua.
21 Bosi Pilatu wuba yuvula: “Nani mu bawu benu luntomba minu yibasisa?” Bawu bankamba: “Balabasi!”
22 Pilatu wuba yuvula: “Buabu, mambu mbi yifueti vangila Yesu, no bantedilanga Klistu?” Baboso bamvutudila: “Ḿbanda va dikunzi!”
23 Nandi wuba yuvula: “Kibila mbi? Diambu mbi dimbi kabe vanga?” Vayi babue tenduka mu kutuba: “Ḿbanda va dikunzi!”
24 Mu kumona ti vasa ba ko diambu dinkaka di kuvanga ayi baba tuadisa divunza, Pilatu wubonga nlangu ayi wusukula mioko va ntuala nkangu wu batu, ayi wutuba: “Minu yisi ko fotu mu menga ma dibakala adidi. Amomo ma lutedi kuinu.”
25 Dikabu dioso dimvutudila: “Bika befu ayi bana bitu tuba fotu mu menga mandi.”
26 Bosi nandi wubasisa Balabasi, vayi wutuma muingi babula Yesu bikoti ayi wunyekula muingi bambanda va dikunzi.
27 Masodi ma Pilatu banata Yesu ku nzo mfumu’awu ayi baboso bazungidila Yesu.
28 Bosi bavula bikhutu biandi ayi bamvuika kiyunga kibenga.
29 Bosi bavanga kolowa* yi zitsendi ayi bamvuika yawu ku ntu, mvandi bansimbisa nti ku koko kuandi ku lubakala. Bafukama va ntual’andi ayi baba kumvueza mu kutuba: “Mboti, Ntinu basi Yuda!”
30 Bosi bantabudila* matha, babonga mua nti beni ayi batona kunkuata wawu ku ntu.
31 Ayi bo bamana kumvueza, bambotula kiyunga beni ayi babue mvuika bikhutu biandi, bosi bannata muingi bambanda va dikunzi.
32 Bo babasika, badengana dibakala dimueka musi Sirene baba tedilanga Simoni ayi bankuika kanata dikunzi beni.
33 Bo bavitila va kibuangu baba tedilanga Ngolongota, kinsundula Kibuangu ki Mivesi Mintu,
34 bamvana vinu yisobakana na kititi ki ndudi muingi kanua, vayi bo kabimba yawu, nandi wumanga kubue yinua.
35 Bo bamana kumbanda va dikunzi, bawu bata kisavu mu kusadila dimanya buka di lido* muingi babaka bu kukabinina bikhutu biandi biba va mbata.
36 Ayi bawu bakala vana, muingi kunkengidila.
37 Mvandi babanda mu dikunzi beni, mua kitini ki dibaya diba va mbata ntu’andi diaba monisa kibila banzengila nkanu. Muawu muba bisono biaba tuba: “Awuwu widi Yesu, Ntinu basi Yuda.”
38 Vaba mvandi mivi miodi babanda mu makunzi maba va khonzu Yesu, wumueka ku khonzu’andi yi lubakala ayi wunkaka ku khonzu’andi yi lukietu.
39 Baboso baba viokilanga vana, baba finganga Yesu, baba nyikunanga ntu,
40 ayi baba tubanga: “Ngie waba tubanga ti wulenda tolumuna tempelu ayi kubue tunga yawu mu bilumbu bitatu, wuyivukisa ngie veka! Boti ngie widi muana Nzambi kuluka va dikunzi adiodio!”
41 Bobuawu mvandi, zimfumu zi zinganga nzambi va kimueka na ziescriba ayi bakulutu, batona kumvueza mu kutuba:
42 “Nandi wuvukisidi bankaka, vayi kasi yivukisa ko naveka! Boti nandi widi Ntinu wu Isaeli, bika kakuluka va dikunzi, ayi mu phila ayoyo, befu tunkuiza nkikinina.
43 Nandi wutula lufiatu luandi mu Nzambi, diawu boti nandi widi lunungu va mesu mandi, bika Nzambi kamvukisa, kibila nandi wutuba: “Minu yidi muana Nzambi.”
44 Bobuawu mvandi, mivi babanda mu makunzi maba va khonzu’andi, mvawu baba kumvueza.
45 Kutona mu kilokula kinsambanu nati mu kilokula kivua, kizunga kioso kinani ki ntoto kiyiza ba beni kitombi.
46 Mu kilokula kivua, Yesu wutenduka mu mbembu yinangama: “Eli, Eli, lama sabactani?” mawu mansundula, “Nzambi’ama, Nzambi’ama, kibila mbi ma kukhuekudila?”
47 Bo bayuwa mawu, bankaka mu batu baba vana batuba: “Dibakala adiodio, widi mu kutela Elia.”
48 Ayi mu thinu wumueka mu bawu wuduma, wubonga kitini ki esponja wubuika kiawu mu vinu yiba ngami,* bosi wutula kiawu mu mua nti ayi wuvana Yesu muingi kanua.
49 Vayi bankaka baba tuba: “Ḿbikanu! Muingi tumona boti Elia wunkuiza mvukisa.”
50 Bosi Yesu wubue tenduka ayi wumana monyo.*
51 Muna thangu beni, nledi* wuba ku tempelu wukhakuka mu bitini biodi, kutona ku yilu nati ku wanda. Vamonika ndikununu yi ntoto ayi mamanya manneni mabudika.
52 Mabumbi mazibuka ayi zinyitu ziwombo zi banlongo bazika mu mabumbi ziaba monika
53 ayi batu bawombo baba kuna bamona zinyitu beni. (bosi, bo Yesu kavulubuka, batu boso bafumina ku biziami bakota* ku divula dinlongo)*
54 Vayi bo nkulutu wu masodi ayi bo baba kengidila Yesu bamona ndikununu yi ntoto ayi mambu moso maba monika, bayiza ba beni mu boma ayi batuba: “Bukiedika, awowo wubedi Muana Nzambi.”
55 Ayi vaba bakietu bawombo baba tala ku kinanu. Bawu baba minlandikini mi Yesu tona ku Ngalili ayi baba kunsadisanga.
56 Mu bawu, vaba: Malia Madalena mvandi Malia ngudi Tiagu ayi Yozesi, ayi ngudi bana ba Zebede.
57 Bosi, bo buisi buyila, vavitila dibakala di busina, musi Alimateia baba tedilanga Yozefi, no wuba mvandi nlandikini Yesu.
58 Nandi wuyenda kuidi Pilatu ayi wundinda nsua muingi kanata nyitu yi Yesu. Bosi Pilatu wutuma muingi bamvana yawu.
59 Yozefi wubonga nyitu beni, wuzinga yawu va dilensola* di thalu diba didiodila
60 ayi wutula nyitu beni mu dibumbi dimona kazibula va khati dimanya dinneni. Bosi wununguna dimanya dinneni muingi kuzibika dibumbi beni ayi wuyenda kuandi.
61 Vayi Malia Madalena ayi Malia wunkaka, batatamana vana bakala va ntuala dibumbi beni.
62 Bo kilumbu ki khubumunu* kivioka, mu kilumbu kilanda, zimfumu zi zinganga nzambi ayi bafalisi bakutakana va kimueka na Pilatu
63 ayi batuba: “A mfumu, befu tuntebuka moyo ti nkua luvunu wunani bo kaba wumoyo waba tubanga ti: ‘Bo vala vioka bilumbu bitatu, Nzambi wala kuphulubusa.’
64 Diawu, a mfumu, tuma muingi bakengidila buboti dibumbi diandi nati mu kilumbu kintatu muingi minlandikini miandi babika kue yiba nyitu’andi ayi bakamba dikabu ti: “Nandi bevulubuka mu bafua! Mu phila ayoyo, khanu luvunu alolo lunkuiza luta ba lungolo kena luvunu lutheti.”
65 Pilatu wuba kamba: “Benu lulenda nata kuinu masodi. Yendanu ayi kengidilanu buboti dibumbi diandi mu phila yilutidi yo mulenda nunga.”
66 Mu phila ayoyo bawu bayenda, bazibika buboti dibumbi ayi batula kidimbu va dimanya, bosi babika vana masodi muingi bakengidila.
Footnotes
^ Voti: “tereno.”
^ Voti: “thata; nthata.”
^ Voti: “banlobutila.”
^ Muingi kuzaba kio kadika mutu kankuiza bonga.
^ Voti: “ngangumunu.”
^ Voti: “wubika kubue vumuka.”
^ Voti: “kurtina.”
^ Ḿba muingi kue zabikisa bankaka mambu bamona.
^ Dinsundula ‘Yelusalemi.’
^ Voti: “dikenge; nledi.”
^ kintanu.
