Ngenesi 14:1-24
14 Mu bilumbu beni, Anrafeli nandi wuba ntinu ku Senear, Arioki nandi wuba ntinu ku Elazar, Kedorlaomer nandi wuba ntinu ku Elão, ayi Tidal nandi wuba ntinu ku Goim.
2 Mintinu amiomio, banuanisa Bera ntinu wu Sodoma, Birsa ntinu wu Ngomola, Sinabi ntinu wu Admá, Semeber ntinu wu Zeboim, ayi mvandi ntinu wu Bela voti Zoar.
3 Mintinu mioso amiomio, bakutikisa masodi mawu ku ḿbuinga Sidim, wunsundula mar salgado.
4 Mintinu amiomio baba tumukinanga ntinu Kedorlaomer mu 12 di mimvu, vayi mu mvu 13 bawu bambalukila.
5 Diawu mu mvu 14, ntinu Kedorlaomer va kimueka na mintinu minkaka miba yandi kithuadi, banuanisa ayi banunga Zirefaim ku Asteroti-Karnaim, Zizuzim ku Hã, zi Emim ku Savé-Kiriataim,
6 mvandi wununga zi Horeu ku mongo Seir nati ku El-Parã, kibuangu kidi va ndeku thandu.
7 Bosi bavutuka ayi bavitila ku En-Mispati voti Kades. Banunga basi Amaleki ayi banunga mvandi Ziamorreu baba kalanga ku Hazazom-Tamar.
8 Mu thangu ayoyo, ntinu wu Sodoma va kimueka na ntinu wu Ngomola, ntinu wu Admá, ntinu wu Zeboim ayi mvandi ntinu wu Bela voti Zoar, bakutakana muingi kunuanisa zimbeni ziawu mu ḿbuinga Sidim.
9 Mintinu mitanu amiomio, banuanisa Kedorlaomer ntinu wu Elami, Tidali ntinu wu Goim, Anrafeli ntinu wu Sinear ayi Arioki ntinu wu Elazar, mintinu minna.
10 Ku ḿbuinga Sidim kuba mabulu mawombo maba betume,* ntinu wu Sodoma ayi wu Ngomola bo bameka kutina, babua mu mabulu beni. Vayi bankaka batina ku kizunga kiba mongo.
11 Mintinu amiomio minna, banunga ayi banata biuma bi luvalu ayi bidia biba ku Sodoma ayi Ngomola, bosi bayenda kuawu.
12 Banata mvandi Ló muana khazi Abalami waba kalanga ku Sodoma va kimueka na biuma biandi bi luvalu.
13 Vavuka dibakala dimueka wuye zabikisa mawu kuidi Abalami musi Ebeleo. Mu thangu beni, Abalami waba kalanga va ndeku minti mi Manre, musi Amorreu, khomba yi Escol ayi Aner. Babakala abobo, baba kithuadi na Abalami.
14 Bo Abalami kayuwa ti banata musi dikanda diandi ku buvika, nandi wukutikisa 318 di bisadi biandi bikubama, babutukila ku nzo’andi ayi nandi wulandakana zimbeni ziandi nati ku Dani.
15 Va builu, Abalami wuvasa bisadi biandi mu mangumba, bawu banuanisa ayi banunga zimbeni ziawu. Nandi wukuka zimbeni ziandi nati ku Hobá kibuangu kidi ku khonzu norte yi Damasco.
16 Nandi wuvukisa Ló musi dikanda diandi, bakietu, ayi batu bankaka va kimueka na biuma bioso zimbeni ziawu banata.
17 Bo Abalami kanunga ntinu Kedorlaomer ayi mintinu baba yandi kithuadi, ntinu wu Sodoma wuyiza dengana Abalami va ḿbuinga Savé wunsundula ḿbuinga wu ntinu.
18 Ayi Melkizedeki ntinu wu Salem wunatina Abalami mapha ayi vinu, nandi wuba nganga nzambi yi Nzambi Lutidi Zangama.
19 Bosi Melkizedeki wusakumuna Abalami ayi wutuba:
“Bika Nzambi Lutidi Zangama,no wuvanga diyilu ayi ntoto kasakumuna Abalami,
20 ayi bika Nzambi Lutidi Zangama,no be kusadisa kununga zimbeni ziaku, kazitusu.”
Bosi Abalami wumvana khuku ki kumi mu biabioso katuala mu mvita.
21 Bosi ntinu wu Sodoma wukamba Abalami: “Phutudila batu, vayi bonga kuaku biuma bioso bi luvalu betuala.”
22 Vayi Abalami wukamba ntinu wu Sodoma: “Yinleva phesi mu dizina di Yave, Nzambi Lutidi Zangama no wuvanga diyilu ayi ntoto,
23 ti minu yisinkuiza bonga ko ni kiuma kiaku, ni kheti mua nsinga voti minsinga mi zisandali muingi wubika tuba: ‘Busina boso Abalami kadi, minu yimveni buawu.’
24 Yisinkuiza bonga ko ni kiuma, kubotula kuandi biuma bisadi biama bama dia. Vayi matedi Aner, Escol ayi Manre, batu ba bekuenda yami, bika bawu babonga ndambu’awu.”
Footnotes
^ Voti: “lukatrão.”
