Ngenesi 50:1-26
50 Bosi Yozefi wubumbakana tat’andi, wudila ayi wumvana besu.
2 Ayi Yozefi wutuma muingi mimfelimi bayumisa nyitu yi tat’andi mu kuyivinda bilongo. Mu phila ayoyo, mimfelimi beni bayumisa nyitu yi Isaeli,
3 ayi baviokisa 40 di bilumbu mu kuvanga mawu, kibila yawu thangu yaba tombuluanga muingi basi Ngipiti kukumisa nyitu yi mutu wufua. Ayi basi Ngipiti batatamana kudila mu kibila ki lufua lu Yakobi mu 70 di bilumbu.
4 Bo bilumbu bi lutu bivioka, Yozefi wukamba zifumu baba sadilanga ku nzo Falawo: “Boti minu yidi lunungu va mesu minu, lemvukanu natanu tsangu ayiyi kuidi Falawo:
5 Tat’ama wuphanga kuleva phesi mu kukhamba: “Minu yembelama kufua. Ayi minu kufua, ngie fueti kuenzikila ku dibumbi dio yivanga ku Kanani.” Diawu yidi mu kudindila nsua kuidi Falawo muingi yezikila tat’ama kuna, ayi minu kumana kuvanga mawu, yala vutuka.’”
6 Falawo wukamba Yozefi: “Yenda zika tat’aku dedi bo nandi ka kuvangila kuleva phesi.”
7 Bo Yozefi kaye zika tat’andi, bisadi bioso bi Falawo, bakulutu bansadilanga ku nzo Falawo ayi bakulutu boso ba Ngipiti banlandakana.
8 Mvandi baboso baba kalanga ku nzo Yozefi, zikhomba ziandi ayi baboso baba kalanga ku nzo tat’andi, bayenda. Bana balezi ayi bibulu, bawu to basiala ku divula di Gozen.
9 Mvandi batu bannatanga makalu ma mimvalu, balandakana Yozefi. Diba dingumba dinneni.
10 Bosi bawu bavitila va kibuangu bansosilanga mbongu baba tedilanga Atadi kidi ku kizunga ki Yolidani. Bo bavitila vana, bawu bavanga matanga ayi baba mu lutu mu sambuadi di bilumbu.
11 Bo basi Kanani baba kalanga ku kizunga beni bamona matanga maba vangimina va kibuangu bansosilanga mbongu, bawu batuba: “Amomo madi matanga ma kukuitukila ma basi Ngipiti.” Diawu bavanina kibuangu beni kiba ku kizunga ki Yolidani dizina Abel-Mizraim.*
12 Bana ba Yakobi bavangila mamoso mu kutadila zithuadusulu tat’awu kaba vana.
13 Bosi bana bandi banzikila ku Kanani ku nsuku dimanya widi ku Makpela va ndeku minti mi Manre wo Abalahami kasumba kuidi Efrom musi Hitita, muingi diba dibumbi diandi.
14 Bo bamana kuzika Yakobi, Yozefi, zikhomba ziandi ayi baboso bayenda yandi, bavutuka ku Ngipiti.
15 Bo bamana kuzika tat’awu, zikhomba zi Yozefi batuba: “Ḿba Yozefi wu tulundila nganzi ayi nandi wunkuiza tuvutudila momawu mambu tumvangila.”
16 Diawu bafidila thumu ayiyi kuidi Yozefi: “Papa ava kafua wutuba mambu amama:
17 Lufueti kamba mambu amama kuidi Yozefi: “Minu tat’aku yikudinda, lemvukila nzimbala ayi disumu zikhomba ziaku bavola mu ku kuvangila mambu mambi.” Buabu, lemvukila nzimbala yi bisadi bi Nzambi yi tat’aku.” Bo Yozefi kayuwa mambu amomo, nandi wudila.
18 Bosi zikhomba zi Yozefi bayiza ayi bafukama vantual’andi mu kutuba: “Befu tueka mimvika miaku.”
19 Yozefi wuba kamba: “Kibila mbi lummuena boma? Minu yidi Nzambi muingi kulufundisa?
20 Kheti benu luba mayindu ma kuphangila mambu mambi, vayi Nzambi wubalula mambu beni mu phila yimboti muingi kuvukisa luzingu lu batu bawombo.
21 Diawu bikanu kumona boma, minu yinkuiza tatamana kuvana bidia kuidi benu ayi kuidi bana binu.” Mambu Yozefi katuba mabomba ayi mavumbika mabanza ma zikhomba ziandi.
22 Yozefi ayi batu baba kalanga ku nzo tat’andi, batatamana kuzingila ku Ngipiti. Ayi Yozefi wuzinga 110 di mimvu.
23 Yozefi wumona batekulu bandi kubutuka, bana ba Efraim, mvandi wumona bana ba Makir muana wu Manase ayi Yozefi wuba tadila buka bana bandi veka.
24 Bosi Yozefi wukamba zikhomba ziandi: “Minu yembelama kufua, vayi yidi lufiatu ti Nzambi wala sikika thalu’andi kuidi benu ayi wala lubasisa ku ntoto awuwu muingi kulunata ku ntoto kakanikisa kuidi Abalahami, Isaki ayi Yakobi.”
25 Bosi Yozefi wuvanga bana ba Isaeli baleva phesi ayi wuba kamba: “Bukiedika, Nzambi wala vutula thalu’andi kuidi benu. Levanu phesi ti bo luala kuenda, mvandi luala nata mimvesi miama.
26 Yozefi wuzinga 110 di mimvu bosi wufua. Bo kafua, bayumisa nyitu’andi ayi batula yawu mu kasu ku Ngipiti.
Footnotes
^ Dizina dinsundula ‘matanga ma basi Ngipiti.’
