Nkanda wu Yuda 1:1-25
1 Yuda, kisadi ki Yesu Klistu, mvandi khomba yi Tiagu. Yinsonikina kuidi basolu, bo Nzambi, Tat’itu kanzolanga ayi kankiebanga mu kibila ki Yesu Klistu.
2 Bika kiadi, ndembama ayi luzolo bitatamana kuba yinu.
3 Zikhomba ziama zi luzolo, kheti yibina vanga mangolo muingi ku lusonikina matedi phulusu’itu, vayi yimueni ti nkinza ku musonikina, muingi ku mukindisa mu kunuana nzingu mu kiminu kio baklistu basolu batambula khumbu yimueka to.
4 Yimvangila mawu, kibila dedi bo mimbikudi babikudila thama, va khat’inu veka batu ba mavanga mambi, bamvuezanga Nzambi ayi bankitulanga mamboti mandi malutidi kuidi befu, banga kibila muingi kuvangila mambu matsoni ayi bantubanga luvunu, mu kusuamina kumbusa Mfumu’itu Yesu Klistu.
5 Kheti benu luzebi mambu amomo buboti, vayi yintomba ku lutebula moyo ti Yave wuvukisa dikabu diandi ku Ngipiti ayi wubunga batu bakhambu tatamana kumonisa kiminu.
6 Mu matedi zimbasi bakhambu tatamana mu biyeku biawu ayi babika kibuangu kiawu ku diyilu, nandi wu balundila ziphanga kala kuba kangila mvu ka mvu ku kitombi kingolo mu kilumbu kinneni ki lufundusu.
7 Bobuawu mvandi, bo basi Sodoma, basi Ngomola ayi mavula mankaka maba mafikama bakivana mu kuvanga mambu ma kitsuza ayi kutomba ku yikuangidika mu kubundana nyitu mu phila yikhambu fuana, bawu badi ndubu kuidi befu, kibila batovuka mu kutambula mbungulu yi mvu ka mvu.
8 Vayi kheti bobo, batu abobo mvawu bantatamana kuyindula to mambu mambi mu kubivisa zinyitu ziawu mu mambu ma butsuza, mu kuvueza batu bantuama ntuala ayi mu kutubila bubi batu bantambulanga nkembu wu Nzambi.
9 Vayi mu thangu Misiela Mfumu yi zimbasi kasombula na Nkadi’ampemba mu matedi nyitu yi Mose, nandi kasa meka ko kumfundisa mu kusadila bifingu, vayi nandi wunkamba to: “Bika Yave ka kufundisa.”*
10 Vayi batu abobo, bantubilanga bubi mambu moso bakhambu visa. Ayi mambu moso bamvisanga, bamvisilanga mawu buka bibulu. Diawu bantatamana kuyibunga baveka.
11 Kiadi ayi kiunda kuidi bawu, kibila balandakana nzila yi Kaini, bavukumuka mu kulandakana mayindu mambi ma Balaão, muingi kutambula mfutu ayi babungu mu kuvukumuka mu manyunguta ma Korá.
12 Batu abobo bambanga va khat’inu mu minkungi lumvanganga buka ti muingi kumonisa luzolo kuidi zikhomba, vayi bawu badi buka mamanya manneni masuama kutsi nlangu, buka minsungi mi mamemi banyindulanga to mamboti mawu veka mu khambu mona zitsoni,* badi buka matuti makhambu nokisanga zimvula mamvevubuka mu phemu, buka minti mikhambu butanga mimbutu batumuna khumbu wadi.
13 Mvandi badi buka mayo ma nganzi ma ḿbu mambasisanga difulu* muingi kuyituadisa zitsoni ayi badi buka zimbuetila zindiatila mu divunza. Bawu baba kubikila kibuangu kidi kitombi kingolo bala bakuba mvu ka mvu.
14 Enoki dibakala di sambuadi wubutukila mu nkuna wu Adami, mvandi wubikula matedi bawu bo katuba: Talanu! Yave wuyiza na nkangu wunneni wu zimbasi zinlongo
15 muingi kufundisa baboso, kuvana nzengulu kuidi bankua mambi mu mambu moso mambi bavanga ayi muingi kutulula bankua masumu, mu mambu mambi bantubanga matedi nandi.
16 Batu abobo, bawedi manyunguta, bankuananga matedi luzingu luawu, banlandakananga zinyenzi* ziawu, bakinyemisanga mu biuma badi ayi banyemisanga bankaka muingi kubaka ndandu mu mawu.
17 Vayi benu zikhomba ziama zi luzolo, tebukanu moyo mambu bapostolo ba Mfumu’itu Yesu Klistu baba tubanga.
18 Bawu baba tubanga: “Mu bilumbu bitsuka, vala ba mimvuezi bala vangila mambu mu kulandakana zinyenzi ziawu mu mambu mambi.”
19 Bawu bantuadisanga luvasanu, badi mavanga buka bibulu ayi phevi yinlongo yi Nzambi yiba tuadisanga ko.
20 Vayi benu zikhomba ziama zi luzolo, kindasananu mu kiminu ayi lusambila mu thuadusulu yi phevi yinlongo,
21 muingi lutatamana mu luzolo lu Nzambi, bo mumvingila nlemvu wu Mfumu’itu Yesu Klistu wu tuvana luaku lu kuzinga mvu ka mvu.
22 Mvandi tatamananu kumonisa kiadi kuidi batu bankaka badi divuda,
23 luba vukisa mu kuba sadisa kubotuka mu nzila yi mbungulu ayi tatamananu kumonisa bankaka kiadi. Vayi, banu keba keba muingi lubika tambakana mavanga mawu ma masumu.
24 Bika Nzamb’itu yi nkembu ayi yi mayangi, widi mangolo ma ku lukieba muingi lubika bua mu masumu ayi wulenda ku musadisa kuba badiodila va ntual’andi,
25 kuidi nandi, Nzambi yimueka to mvukis’itu, mu nzila mfumu’itu Yesu Klistu, katambula nkembu, nzitusu, mangolo kuba kuandi bubu ayi mvu ka mvu. Amem.
Footnotes
^ Lit: “ka kusemba.”
^ Lit: “ba yidikilanga to baveka mu khambu mona boma.”
^ Voti: “lifusi; lichuva.”
^ Voti: “zinzinunu.”
