Mu kilumingu, kilumbu 20 Ngonda Kumi Yimueka, mvu 2022, lukutukunu Nações Unidas bamvanganga muingi kutubila matedi mbalukulu thangu, bantedilanga COP27 lumeni. Kheti bawu babeki makani ma kuvana zimbongo kuidi yoso kuandi tsi yintovuka beni mu kibila ki mbalukulu thangu, bawombo badi mu kutuba ti mawu masinzonza ko ngudi diambu.

•   Mu kilumbu 19, Ngonda Kumi Yimueka, mvu 2022, ntuadisi wu Nações Unidas bantedilanga António Guterres, wutubidi: “Minu yintomba befu boso, tukonanu zimbongo zi kusadila muingi kusadisanga zitsi zioso bankuiza tovukanga mu kibila ki mbalukulu thangu.Yizebi ti mawu masinkuiza zonza ko ngudi diambu . . . kibila phila nza tunzingilanga yeka, makhidi mambu maphasi ma kuzonza.”

•   Mu kilumbu 20, Ngonda Kumi Yimueka, mvu 2022, Mary Robinson wuba ntinu ku Irlanda ayi wuba Ntuadisi wu Dingumba di Nações Unidas Dinnuaninanga batu, wutuba: “Mu kibila ki mbalukulu thangu, tuidi mu kumona ti mu bilumbu binkuiza, tuala monikina ziphasi ziwombo.”

 Matoko ayi bikhupa, badi mu kuyindula beni matedi buidi nza yala bela mu bilumbu binkuiza. Vayi, bukiedika ti zimfumu zi luyalu balenda sala va kimueka muingi kudedikisa mambu matedi mbalukulu thangu? Mbi Kibibila kintuba?

 Kibibila kintuba ti kheti mu mangolo moso zimfumu zi luyalu balenda vanga muingi kukika mambu matedi mbalukulu thangu, bawu balendi nunga ko kudedikisa mamoso. Kibila mbi? Tala bibila biodi:

•   “Kiuma kitekama kilendi lulama ko.”—Mpovi 1:15.

   Mbi Mawu Mansundula?: Zimfumu zi luyalu balendi nunga ko kuvanga mamoso bantomba, kibila Nzambi kasa vanga ko batu muingi bakiyala. (Yelemia 10:23) Kheti ba kubundana, zimfumu zi luyalu balendi nunga ko kudedikisa mambu mu nza, kheti mu mangolo moso bamvanga.

•   “Kibila batu bala kukizola baveka, bala ba minzodi mi zimbongo, . . . balasa wizananga ko.”—2 Timoteo 3:2, 3.

   Mbi Mawu Mansundula?: Kibibila kibikula ti batu bawombo mu bilumbu bitu, bala ba buimi ayi balasa wizana ko na bankaka muingi kutuadisa mamboti.

 Vayi, tualasa zingila buboti, mu kibila ki mambu zimfumu zi luyalu bankanikisanga. Nzambi wusola Nyadi wufuanakana muingi kuyala nza, Yesu Klistu. Kibibila kintuba matedi nandi:

•   “Kintinu kiala ba mu mavangiti mandi. Nandi wala tedulu Nlongi wupisuka, Nzambi yidi Mangolo, Tata Yinzinganga Mvu Ka Mvu, Mfumu yi Ndembama.”—Yesaya 9:6, tala nota.

 Yesu, nandi ntinu wu Kintinu ki Nzambi. Kiawu kidi Kintinu kiala yadila ntoto, tona ku diyilu. (Matai 6:10) Nandi widi mangolo, nduenga, ayi widi phuila yi kukieba buboti nza ayi batu bankalanga muawu. (Minkunga 72:12, 16) Mu thuadusulu’andi, Kintinu ki Nzambi kiala manisa baboso ‘bambivisa ntoto’ kiala vanga ntoto kuba wulioma.—Nzaikusu 11:18, tala nota; Yesaya 35:1, 7.

 Muingi kubuela longuka matedi buidi bala ludikila mambu va ntoto matedi mbalukulu thangu, tanga dilongi dintuba “Mu Nza Yoso Muinha Widi mu Kuluta ba Wungolo—Mbi Kibibila Kinlonga?.”