Nduka 5 di bivevi na bivevi bi batu bankuenda kuetala batu banta bola mu Copa do Mundo bankubikanga kuidi dingumba bantedilanga FIFA. Bisavu beni biala tonina mu kilumbu 20 Ngonda Kumi Yimueka nati 18 Ngonda Kumi Yimmuadi, Mvu 2022. Batu bawombo badi mu kutuba ti bisavu abiobio, bilenda sadisa mvandi batu kuba kithuadi.

•    Nelson Mandela, wuba Ntinu ku tsi yi África do Sul, wutuba: “Bisavu bi kuta bola, bilenda balula nza. Biawu bilenda bundisa batu mu ziphila zi kukuitukila.

•    Gianni Infantino widi Ntuadisi wu FIFA a, wutuba: “Bisavu bi kuta bola, bilenda. . . bundisa batu va kimueka, bilenda bundisa batu mu mayangi ayi bilenda bundisa batu mu luzolo, kheti mu disuasana tuidi.”

 Bukiedika ti Copa do Mundo voti bisavu binkaka bilenda tuadisa kuandi ndandu? Bukiedika kuandi ti tuala baka ndembama ayi kithuadi?

 Bukiedika bisavu bi thangu ayiyi bi kuta bola bisiala bue tadila to matedi kuta bola. Bimana tuadisa ndandu mu mambu matedi batu, politika, kithatu mu batu ayi kukhambu ku zimbongo.

 Batu bawombo bantubanga ti kumona bisavu bitedi kuta bola, buka Copa do Mundo, bintuadisanga beni mayangi. Vayi kheti bobo, bio bisavu kuandi to, bilendi tuadisa ko kithuadi kinkadidila. Mu bisavu abiobio, khumbu ziwombo mummonikanga mambu Kibibila kintuba ti mala monika mu ‘bilumbu bitsuka.’—2 Timoteo 3:1-5.

 Kibibila kintuba ti mu bilumbu binkuiza, batu boso bala zingila mu kithuadi. Kiawu kintuba ti batu boso va nza, bala ba kithuadi mu luyalu lu Kintinu ki diyilu, bantedilanga “Kintinu ki Nzambi.”—Luka 4:43; Matai 6:10.

 Ntinu wu Kintinu beni, Yesu Klistu, wala vanga mamoso muingi kutuadisa ndembama. Kibibila kintuba:

•    “Batu basonga bala zinga buboti, ayi ndembama yala ba yiwombo.”—Minkunga 72:7.

•    “Nandi wala vukisa kiphumbulu wundinda lusalusu. . . Ayi wala vukisa no bantovula ayi bamvangila mambu mambi.”—Minkunga 72:12, 14.

 Theti bubu malongi ma Yesu ma mana bundisa bivevi na bivevi bi batu mu 239 di zitsi. Bawu balonguka kubika kithatu. Muingi wubuela longuka, tanga kikhuku ki malongi kidi ntu diambu “Kubika kithatu.”