BA KEBA KEBA!
Muinha Wungolo Wunkumisa Ntoto—Mbi Kibibila Kinlonga?
“Ku China, mvu awuwu wawu wulutidi ‘kuteba muinha wungolo’ ayi yawu khumbu yintatu yima luta kukumisa ntoto.”—The Guardian, Kilumbu 7, Ngonda Yivua, Mvu 2022.
“Mu mimvu mitanu minlandila, ntoto wunkuiza kuma beni mu bibuangu biwombo ku África.”—Zitsangu zi ONU, Kilumbu 26, Ngonda Yinana. Mvu 2022.
“Nduka Europa yoso, muinha wungolo wunkuiza kumisa ntoto. Mba ayoyo yawu thangu mawu manluta monikina mu 500 di mimvu mima vioka.”—BBC News, Kilumbu 23, Ngonda Yinana, mvu 2022.
Batu bawombo bamfionguninanga mambu amomo, batubizi ti kukuma ku ntoto kunkuiza tatamana kubuelama. Tulenda ba kivuvu mu bilumbu binkuiza kuntuala? Mbi Kibibila kinlonga?
Kukuma ku ntoto ayi zimbikudulu zi Kibibila
Kibibila kibikula matedi bilumbu bitu:
‘Kuela ba . . . nzala mu bibuangu bioso.’—Luka 21:11.
Kukuma ku ntoto khumbu ziwombo kumvanganga kukhambu bidia. Ziphasi ayi lufua nzala kantuadisanga, mbikudulu yi Kibibila yidi mu kusalama.—Nzaikusu 6:6, 8.
Kibila mbi ntoto widi mu kubuelimina kukuma?
Mu Kibibila muidi kibila kimueka kimmonisa kibila mbi ntoto widi mu kubuelimina kukuma. Kiawu kintuba:
‘Dibakala kasa fuana ko kutuadisa ni kheti bitambi biandi.’—Yelemia 10:23.
Mawu mansundula ti batu balendi nunga ko ‘kutuadisa bitambi biawu,’ voti kukiyala. Mu kukhambu tuadisa buboti, khumbu zinkaka bamvanganga ntoto kukuma ayi kukhambu nlangu.
Batu balonguka beni, bankikininanga ti mambu batu bamvanganga, mawu madi mu kutuadisa muinha wungolo ayi kuvanga ntoto kubuelama kukuma mu nza yimvimba.
Makani mambi bambakanga, khumbu ziwombo mamvanganga kubunga misitu, kubifisa phemu ayi kukhambu sadila buboti biuma bidi mu tsi ntoto, ayi kubifisa nlangu tunnuanga.
Kibibila kimvana kivuvu.
Tulenda ba kivuvu mu bilumbu binkuiza kuntuala?
Kibibila kinkanikisa ti Nzambi wala ludika mambu tuidi mu kukuazukila bubu. Buidi?
1. Nzambi wala ‘bunga batu babunganga ntoto.’ (Nzaikusu 11:18) Nandi wala bunga batu bambi ayi banyindulanga to mu bawu veka, mavanga mawu mamvanganga kuba beni phasi kubaka nlangu va ntoto.—2 Timoteo 3:1, 2.
2. ‘Kuala ba nlangu wuwombo mu bibuangu biyuma.’ (Yesaya 35:1, 6, 7) Nzambi wala ludika buboti ntoto ayi muala ba nlangu wuwombo bo ntoto wala kituka paladizu.
3. ‘Ngie wunkiebanga ntoto, wumvanganga wawu wuba mbozi ayi wubuta makundi.’ (Minkunga 65:9) Nzambi wala sakumuna ntoto ayi kuala ba bidia biwombo ayi nlangu wuwombo.