BA KEBA KEBA!
Mafunda na Mafunda ma Batu Bantina Mvita ku Ucrânia
Mu kilumbu 24 Ngonda Yimuadi mvu 2022, tsi yi Rússia yikotisa masodi ku tsi yi Ucrânia, ayi wutona mvita wumvanga batu kutina mu zitsi zinkaka. a
Nataliia, wunkalanga ku divula di Kharkiv, ku Ucrânia wutuba: “Befu tususuka bo tuyuwa zibomba kudumvuka. Ayi yisi ko bikuma muingi kusudikisa mawu buboti. Vayi bo tuyiza zaba ti vadi zikomboio zidi mu kusadisa batu kubotuka ku Ucrânia, befu tubaka makani ma kubika tsi. Befu tubika biuma bitu bioso ayi kadika mutu wunata to mua mochila wuba biuma binkinza. Dedi, minkanda, bilongo, nlangu ayi mua biuma muingi kudia.”
Nadija, mvandi wutuba: “Ava mvita wutona, ni mutu kabasa yindula ko mawu. Vayi tususukila zinela zitona kunhikuka mu kibila ki zibomba ziaba dumvuka. Yibaka makani ma kubotuka va divula beni ayi yinata to mua biuma biba nkinza. Va meni mu 8:00 yibaka komboio yaba kuenda ku divula di Lviv, bosi yibaka machimbombo yaba kuenda ku Polónia.”
Mu dilongi adidi tunkuiza mona
Banani bantuadisa mambu amomo mamvanga batu kubika tsi’awu?
Mambu amomo matonini, bo masodi ma Rússia makotidi ku Ucrânia ayi batonini mvita. Vayi Kibibila kinluta monisa tho yi mambu amomo mamvanga batu kutina mu zitsi ziawu:
Mu nza yimvimba zimfumu zi luyalu banunganga ko kukieba zitsatu zi batu badi mu kuyadila. Bawu bansadilanga bimfumu biawu muingi kutuadisa ziphasi kuidi bankaka.—Mpovi 4:1; 8:9.
Satana nkadi’ampemba, bo kadi mu ‘kuyadila ntoto wumvimba,’nandi wumvanganga mamoso muingi kutuadisa ziphasi va ntoto. Diawu Kibibila kintubila: “Nza yimvimba yidi mu luyalu lu nkua Mambi.”—Yoane 14:30; 1 Yoane 5:19.
Kubotula kuandi mambu moso mantuadisanga ziphasi kuidi batu mu bivevi na bivevi di mimvu, Kibibila kibikula ti: “Bilumbu bitsuka, yala ba thangu yi phasi muingi kukindama.” (2 Timoteo 3:1) Mvandi Kibibila kibikula ti kuala ba zindikununu zi ntoto, bivuka, kukhambu ku bidia ayi bimbevu—mambu moso amomo, mamvanganga batu kubika bibuangu biawu bankalanga.—Luka 21:10, 11.
Kuidi batu abobo balenda bakila kivuvu?
Kibibila kimmonisa ti Mvang’itu Yave, b widi Nzambi yimmonisanga luzolo ayi kiadi kuidi batu bambika zinzo ziawu muingi kukuenda mu zitsi zinkaka. (Deutelonomi 10:18) Nandi wunkanikisa ti wala dedikisa mambu amomo batu badi mu kuviokila. Diawu Nzambi wala sadila luyalu luandi bantedilanga Kintinu ki diyilu muingi kuvinginina mintinu mioso midi va nza. (Danieli 2:44; Matai 6:10) Ayi Yave wala sadila Kintinu kiandi muingi kubunga Satana. (Loma 16:20) Kintinu ki Nzambi kiawu kiala yadila ntoto woso, kiala manisa kithatu, zindilu zi zitsi ayi batu boso va ntoto bala ba dikanda dimueka to. Valasa bue ba ko mutu wala tombulu kubika nzo’andi Kibila Yave wukanikisa: “Kadika mutu wala kala kutsi nti wu vinu ayi wu mfigu’andi kalasa mona ko boma kibila Yave mfumu minkangu tubidi mawu.”—Mika 4:4.
Bukiedika, Kintinu ki Nzambi kiawu to kiala manisa mambu madi mu kumonika. Yave wala sadila Kintinu kiandi muingi kumanisa mimvita ayi mambu mankaka mamvanga batu kukuenda mu zitsi zinkaka. Tala mua mambu Yave kala vanga:
Mu matedi mimvita. Minkunga 46:9 luntuba: “[Yave] wala manisa mimvita.” Muingi wubuela zaba buidi Nzambi kala vangila mawu, tala dilongi dintuba “Como haverá paz na Terra?”
Mambu makhambulu masonga ayi buphunha. Minkunga 72:14 luntuba: “ [Yave] wala vukisa batu mu mambu makhambulu masonga ayi ma buphunha.” Muingi wuzaba buidi batu balenda vukila mu mayindu ma kithatu, tala dilongi dintuba “Como parar o ciclo do ódio.”
Buphumbulu. Minkunga 72:12 luntuba: “[Yave] wala vukisa kiphumbulu kintenduka muingi bansadisa.” Mo wuvisa buidi Yave kala manisina mambu mantuadisanga buphumbulu tala dilongi dintuba “Será que é possível acabar com a desigualdade econômica?”
Kukhambu ku bidia. Minkunga 72:16 luntuba: “Vala mena mbongo yiwombo va ntoto.” Muingi wuzaba buidi Yave kala manisina nzala va ntoto tala dilongi “Um mundo sem fome”.
Bukiedika ti Kibibila kilenda sadisa batu badi mu kutina mvita?
Ngete, kiawu kilenda bavana kivuvu kinsika mu matedi bilumbu binkuiza kuntuala ayi kilenda basadisa kununga mambu bamviokila mu thangu ayiyi.
Nsua wu Kibibila: “Mutu wukhambulu nduenga wunkikininanga mu dioso kua diambu, vayi nkua nduenga wumfionguninanga buboti ndiatulu’andi.”—Zingana 14:15.
Tsudukusu yi lutangu: Meka kuyindula mambu wulenda viokila ayi malenda tula luzingu luaku va kingela. Bo weka ku tsi yinkaka, fiongunina ziphila wulenda kukikiebila kuidi bito ngueni balenda kuvanga bubi.
Nsua wu Kibibila: “Diawu, befu kubaka ki kudia ayi ki kuvuata, tufueti kuangalala mu mawu.”—1 Timoteo 6:8.
Tsudukusu yi lutangu: Bika kue yindulanga thangu zioso biuma wubika. Ngie kukuangalala mu biuma binkinza widi, ngie wala luta baka mayangi.
Nsua wu Kibibila: “Diawu, mambu moso luntombanga batu ba luvangila, benu mvinu lufueti kuba vangila mawu”—Matai 7:12.
Tsudukusu yi lutangu: Monisa mamboti ayi ba mvibudulu. Zikhadulu aziozio, zinkuiza sadisa bankaka ba kukinzika ayi ba kuyamba buboti.
Nsua wu Kibibila: “Lubika vutudila mambi mu mambi.”—Loma 12:17.
Tsudukusu yi lutangu: Boti babe kuvangila diambu dimbi, ka wubika nganzi yi kuvanga kuvutudila mambi babe kuvangila, khanu ziphasi to wunkuiza buela mu luzingu luaku.
Nsua wu Kibibila: “Mu mambu moso amomo, yinkindamanga mu kibila ki mutu awowo wu kuphananga mangolo.”—Filipi 4:13.
Tsudukusu yi lutangu: Bika Nzambi kaba mutu lutidi nkinza mu luzingu luaku. Ayi vanganga minsambu muingi ka kuvana mangolo ma kukindimina mu mambu widi mu kuviokila.
Nsua wu Kibibila: “Lubika kuazuka mu kibila ki kioso kiuma, vayi mu mamoso, mu kusambila, mu kulomba ayi mu kutonda, luzabikisa zitsatu zinu kuidi Nzambi; buna ndembama yi Nzambi, yo yiviokizi diela dioso, yela kieba mintima ayi mayindu minu.”—Filipi 4:6, 7.
Tsudukusu yi lutangu: Boso kua bubela mambu widi mu kuviokila, dindanga Nzambi muingi ka kuvana ndembama mu mayindu ayi mu ntima. Tala dilongi dibongulu mu “Filipi 4:6, 7—‘Não estejais inquietos por coisa alguma.’”
a Bo masodi ma Rússia makota ku wu Ucrânia mu kilumbu ki 24 mfumu yi Nações Unidas wuntadilanga matedi batu bantina mvita wutuba ti, vaba tombulu kuvana lusalusu mu nzaki ku wu Ucrânia. Kibila bo vavioka 12 di bilumbu, kuvioka 2 milhões di batu batina mu zi tsi zifikama. Mvandi 1 milhão di batu babotuka mu bibuangu bankalanga muingi kukuenda mu mavula mankaka madi ku Ucrânia.
b Yave, didi dizina di Nzambi. (Minkunga 83:18) Tala dilongi “Quem é Jeová e por que seu nome é importante?”
Mba Ngie Wunkuiza Zola Mvandi
MALONGI MA KIBIBILA
Meka Ndongukulu’itu yi Kibibila
Baka ndongukulu yi Kibibila mu khambu futa mu kulonguka diambu dimueka dimueka.
