Kibanga ki Nsungi ki kilumbu 1 Ngonda Yinsambanu mvu 1912, kituba ti “Bawombo mu mintangi mitu, bazebi buboti ziphofo.” Kibanga beni ki Nsungi kibue tuba ti “ziphofo . badi bilongulu bantanganga. Ayi bambasisanga biawu mu phila yifuana yi basadisa kuvisa mambu bantanga. Ziphofo ziwombo bantondanga mu kuzaba zitsangu zimboti zi mambu mankuiza kuntuala.”

 Mu thangu basonika mambu amomo, kuisa ba ko dingumba dinkaka mu nza diaba basisanga zibuku mu braile. Vayi Zimbangi zi Yave to babe basisanga ziawu ayi bakhidi mavanganga. Bubu, tumbasisanga bilongulu mu braile—kuvioka 50 di zimbembo. Buidi tunnunginanga kuvanga mawu?

 Yaya Michael Millen widi mu dingumba di minsekudi ku Patterson, Nova York wutuba, theti befu tunsekulanga bilongulu mu mbembu yi braile. “Mu mimvu mima vioka, tuaba sadilanga software yi baboso muingi kusekula bilungulu vayi software beni yabasa nunganga ko kusekula biawu mu zimbembu zioso tuaba tomba. Diawu, bubu tunsadilanga programa yi kusekudila yivanga zikhomba. Yawu yitusadisanga kusekula nduka zimbembu zioso zi braile zidi mu nza. Ayi yidi lufiatu ti programa beni yawu yilutidi mu nza yimvimba.”

 Bilongulu mu braile, bisi ko to bisono bintubila matangu madi muna vayi mvandi muidi bisono binsudikisa mu phila yisulama zifikula zidi mu kilongulu. Dedi, fikula yidi va thonono buku Baka Mayangi ma Mvu ka Mvu! mu braile ba yisudikisa abubu: “Dibakala wundiata mu nzila yidi biteka bimboti, yidi miongo, mamanya mu zikhonzo ayi minti.” Yaya Jamshed widi phofo vayi kheti bobo widi nsadisi wu bakulutu ba kimvuka ayi ntuami ntuala wutuba: “Yinzolanga beni phila bansudikisilanga zifikula mu bilongulu.”

 Bo bammana kusekula bilongulu, bamfilanga biawu mu zifiliali zimbasisanga bilongulu mu braile. Bosi bantulanga biawu mu minkanda mifuana voti mingolo, muingi mibika fika vavuka bo bansadila biawu. Bosi bamfilanga biawu kuidi zikhomba. Ayi boti kibuangu beni phasi kidi muingi zikhomba batambula bilongulu, tumfutanga zimbongo mu agência muingi zikhomba bafika tambula biawu ayi basadila mu zikhutukunu.

 Kisalu kioso akiokio, kintombuluanga thangu yiwombo ayi zimbongo. Kisengu kitu kimbasisanga bilongulu ku Wallkill, Nova York kilenda nunga kubasisa 50.000 ki Bibibila ki batu bammonanga, vayi mu matedi Kibibila mu braile, kiawu kilenda nunga to kubasisa Bibibila biodi mu yoyawu thangu. Kibibila ki braile mu Kingelesu kidi kikabuka mu bitesu biodi. Kitesu 2 kidi 25 di bikhuku ayi bisadulu bansadilanga muingi kuvanga biawu, bidi kuvioka 123 di zikhumbu mu thalu yi zimbongu kena bisadulu tunsadilanga muingi kuvanga Kibibila ki batu bammonanga. a Muingi kuvanga zikapa zi 25 di bikhuku beni vantombuluanga 150 di zidolar!

 Buidi zikhomba bansadisanga muingi kubasisa bilongulu mu braile bantadilanga kisalu kiawu? Nadia, wunsadilanga ku filiali yi África do Sul wutuba: “Zikhomba zitu badi ziphofo bandengananga beni bikaku. Diawu minu yimmonanga ti luidi lusakumunu kubuela mioko muingi kuba sadisa. Ayi mvandi yimmonanga ti Yave wuku bazolanga beni.”

 Vayi boti mutu wufua meso kasa zaba ko kutanga braile? Mua mimvu kumbusa tubasisa mua buku Longuka Kutanga Braile, muawu muba bisono bi batu bammonanga ayi bisono bi braile. Yawu yivangulu muingi mutu wummonanga kanunga kusadisa mutu wufua meso ayi baba buadi balenda tangila yawu va kimueka. Mvandi yaba kuizanga na kisonokono ki ziphofo. Baba sadilanga bisadulu abiobio muingi kufikula mutu badi mu kutubila mu kinongu ki Kibibila ayi mawu maba kuba sadisanga kulunda ayi kuvisa mambu banlonguka.

 Buidi zikhomba zitu bafua meso bambakilanga ndandu mu bilongulu beni? Ernst, wunkalanga ku Haiti, waba landakananga zikhutukunu vayi kasa ba ko ni kilongulu mu braile. Mu phila ayoyo, vaba tombulu nandi kuvanga mangolo mu mambu kankuwa muingi kanunga kuvana mimvutu ayi kuvanga biyeku biandi. Vayi Ernst wutuba: “Bubu minu yilenda nanguna koko ayi kuvana mvutu yoso kua thangu ayi yikimuenanga ti yidi wumueka mu zikhomba. Mvandi tuntambulanga biobiawu bidia bi kiphevi!”

 Yaya Jan widi nkulutu wu kimvuka ku Áustria wufua meso ayi wuntuadisanga Kibanga ki Nsungi ayi ndongukulu yi Kibibila wutuba: “Bilongulu bitu mu braile binluta visukanga kena zibuku zinkaka. Dedi mu bilongulu bitu muidi zinota, zi tsielu ayi tsudukusu yi zifikula mu phila yifuana.”

 Mu mimvu mima vioka yaya Seon-ok, widi ntuami ntuala ku Coreia du Sul, wufua meso ayi matu waba fiatilanga to mu lusadusu lu zikhomba. Vayi bubu nandi kalenda tanga naveka Kibibila mu braile. Zibuku zinkaka mu braile zidi beni phasi muingi kutanga kibila mintanda misi ko miduka; mintanda minkaka misi ko milulama ayi zibuku zinkaka zidi minkanda milebakana. “Vayi Zimbangi zi Yave bansadilanga minkanda mimboti ayi bisono bikhambulu phasi muingi kutanga”. Nandi wubue tuba: “kumbusa, minu yaba longukanga Kibibila mu lusadusu lu bankaka, vayi bubu yilenda longuka Kibibila minu veka. Yinkuangalalanga bo yinkubika zikhutukunu zi kadika sabala ayi kuvana mimvutu. Minu yitanga bilongulu bitu bioso mu braile. Mu kibila akiokio ḿba ngie wulenda tuba ti minu yinzolanga beni kutanga.”

 Dedi mu bilongulu bitu binkaka, bilongulu bi braile mvandi muidi mambu amama: “Kilongulu akiki kisumbusuanga ko. Angi kidi kithuadi mu kisalu ki ndongukulu yi Kibibila mu nza yimvimba kinsadusuluanga mu minkhayilu mi luzolo lu ntim’aku.” Matondo beni mu minkhayilu miaku wumvananga mu kusadila donate.pr418.com. Minkhayilu miaku minsadisanga tubaka bidia bi kiphevi kuidi batu boso, kubunda mvandi ziphofo.