Mu Ngonda yitheti yi mvu 2021, Dingumba Dintuadisi bakundula kilongulu kimona kidi ntu diambu: Baka Mayangi ma Mvu ka Mvu! a ayi kiawu tunkuiza sadilanga muingi kuvananga ndogukulu yi Kibila. Budi wubela bo wuyuwa mawu? Matthew, wunkalanga ku Canada wutuba: “Yiba beni mayangi! Ayi bo yaba mona zivideo ayi bo baba sudikisa kibila mbi bakubikila kilongulu beni, mayangi mama mabuelama beni. Yiba beni phuila yi kutambula ayi kutona kusadila kilongulu beni.”

 Buku Baka Mayangi ma Mvu ka Mvu! Yidi phila yimona yi kuvanina ndongukulu yi Kibibila. Vayi vadi mambu mankaka buku ayoyo yidi disuasana na bilongulu binkaka tuaba sadilanga. Dedi, boti ngie wunsadilanga buku Baka Mayangi ma Mvu ka Mvu! Mu nkanda wunkuiza mona ti buku ayoyo yidi beni disuasana na zibuku zinkaka tuaba sadilanga. Muingi tuvisa mawu buboti, tumfiongunina buidi bavangila buku ayoyo.

 Minkanda midi phiba. Kibila mbi vabe tombulu mawu? Mu buku Baka Mayagi ma Mvu ka Mvu! Muidi kuvioka 600 di zifikula, ayi thalu ayoyo yidi kuvioka 10 di zikhumbu di zifikula zidi mu buku, Mbi Kibibila kilenda Kutulonga! Mvandi mu buku beni muidi vama vawombo bakhambu sonika ni diambu voti kufikula. Mu kutadila mambu amomo, boti minkanda mi buku beni misi ko phiba khanu zifikula zidi ku tsielu yimueka zilenda monika ku tsielu yinkaka. Muingi mawu mabika monika, zikhomba bansadilanga mu Dingumba Dimbasisanga Bilongulu mu Nza Yimvimba (IPD) ku Wallkill, Nova York, bafiongunina mintindu minna mi minkanda tunsadilanga mu bilongulu bitu. Bosi, Dingumba Dintadilanga Matedi Bilongulu mvawu bafiongunina minkanda beni ayi basola nkanda wulutidi phiba. Kheti minkanda amiomio milutidi bulaku na minkanda minkaka tunsadilanga mu bilongulu bitu, vayi miawu minsadisanga minlonguki mi Kibibila kutanga buku Baka Mayangi ma Mvu ka Mvu! mu khambu vuvuka mu kibila ki zifikula zidi mu tsielu yinkaka zimmonika ku tsielu yinkaka.

 Kapa Yidi Disuasana. Kapa yi buku Baka Mayangi ma Mvu ka Mvu! yidi disuasana na zibuku zitu zinkaka. Kibila mu buku beni batula nkanda widi nkadu fufulu ayi mawu mansadisanga muingi zifikula zidi mu kapa zimonika buboti. Mua nkanda beni mvandi yinsadisanga muingi kapa yi buku beni yibika fika monika yikhulu bo bansadila beni yawu. Vayi nkanda awowo batula mu kapa yi buku ayoyo, yidi kuvioka 5 di zikhumbu mu bukalu kena minkanda minkanka bansadilanga muingi kutula mu zikapa zi zibuku zitu zinkaka. Diawu, zifiliali ziwombo basala mu khituadi muingi kununga kubaka nkanda beni widi mua nkadu fufulu mu kukhambu sadila beni zimbongo.

 Kibila mbi basadila biuma bidi beni bukalu? Khomba mueka widi mu Dingumba Dimbasisanga Bilongulu (IPD) wutuba: “Tuntomba basadila beni buku ayoyo ayi yibika fika monika yikhulu.” Eduardo, widi mu dingumba adiodio ku Brazil wutuba: “Tuidi beni mayangi mu kumona phila kimvuka ki Yave kidi mu kusadila bisadulu bilutidi muingi buku ayoyo yiba beni kitoko, ayi yibika fika vavuka bo bansadila yawu. Vayi kheti bobo, mvandi bansadilanga buboti minkhailu mi zikhomba.”

 Mu Ngonda Yintatu yi mvu 2021, tutona kubasisa buku Baka Mayangi ma Mvu ka Mvu! Ayi mu thangu beni, kimvuka ki COVID-19 kiba beni kingolo diawu tudengana bikaku biwombo. Dedi, zibeteli ziba zizibama diawu zikhomba bambuelanga mioko basa ba ko bu kutusadisila. Ayi mvandi, tusa ba ko bu kutumisina zikhomba muingi kuba Zibetelita. Mu kibila akiokio, bibuangu binkaka bi kubasisila bilongulu bisa ba ko batu bafuana muingi kuvanga mawu. Ayi mu kibila ki nsua wu mintinu bazibika bibuangu binkaka bi kubasisila bilongulu mu mua thangu.

 Buidi tunnungina bikaku abibio? Bo babue zibula bibuangu bikubasisila bilongulu, zibetelita ziwombo baba byeku binkaka batambula kyeku ki kubuela mioko mu mua thangu bibuangu bi kubasisila bilongulu. Joel widi mu Dingumba Dimbasisanga Bilongulu (IPD) wutuba: “Mayindu baba ma kukivana ayi phuila baba yi kulonguka bisalu bimona bisadisa beni muingi kisalu akiokio kivangama.”

 Kheti mu bikaku bioso abiobio, tuma basisa bivevi bi zibuku Baka Mayangi ma Mvu ka Mvu! Muingi kuvanga mawu, vantombulu bisadulu biwombo. Dedi, ziplaca, mua minkada midi mua fufulu, minkada midi phiba, zitinta ayi ziadezivo. Bo vavioka zingonda zitanu tona tutona kubasisa buku beni, tusadila kuvioka 2.3 milhões di zidolar muingi kusumba bisadulu bintombulu. Muingi kusadila buboti zimbongo, tubasisa to thalu yi zibuku zikhomba mu kimvuka bantomba.

 Buidi minlongisi mi Kibibila ayi minlonguki miawu babela bo batambula buku ayoyo? Paul, wunkalanga ku Austrália wutuba: “Baka Mayangi ma Mvu ka Mvu! yidi buku yimboti beni ayi minu yinzolanga kuvana ndongukulu yi Kibibila mu kusadila yawu. Phila yawu yikubuku yidi beni yimboti ayi yinkindisa batu kukoluka. Dedi, muawu muidi biuvu binkindisa nlonguki kutuba mambu madi mu ntim’andi, zivideo, zifoto, zigrafico ayi makani ma nlonguki. Bukiedika, buku ayoyo yidi beni yimboti ayi yikukhindisa yibuela pisuka mu kulonga.”

 Nlonguki mueka wu Kibibila wunkalanga ku Estados Unidos wutuba: “Minu yinzolanga beni buku ayoyo yimona. Yawu yi kutsadisanga kuvisa mayindu mamfunu. Zivideo zi yikunanga ntim’ami ayi zi kutsadisanga kusadila mambu yinlonguka.” Nlonguki awowo, wunlongukanga Kibibila khumbu wadi mu sabala ayi wunlandakananga zikhutukunu zioso.

 Bakhidi basisa bivevi bi zibuku Baka Mayangi ma Mvu ka Mvu! mu zimbembu ziwombo. Nati mu thangu ayiyi, Dingumba Dintuadisi divana nsua babasisa buku ayoyo mu 710 di zimbembu. Ayi thalu ayoyo yidi kuvioka 340 di zikhumbu babasisa buku Mbi Kibibila Kilenda Kutulonga!

 Kuidi tumbakilanga zimbongo muingi kubasisa zibuku? Mu minkhailu mumvananga muingi kubuela mioko kisalu kimvangamanga mu nza yimvimba ayi khumbu zinkaka bansadilanga donate.pr418.com. Tukutonda mu koko kuaku kuyalubuka. Kibila mawu mansadisanga kubasisa zibuku muingi kusadisa batu bantomba kulonguka matedi Yave ayi kubaka “mayangi ma mvu ka mvu.”—Minkunga 22:26.