MALONGI 11
Bawu Basonika Matedi Yesu
Ngye widi mu kumona bantu badi va mfikula ayiyi?—Mazina mawu: Matai, Luka, Malako, Yoane, Petelo, Yakobi, Yuda ayi Polo. Ba kaboso bazinga mu bilumbu bi Yesu ayi basonika matedi mu nandi. Bika tubwela zaba matedi mu miǹsoniki beni.
Mbi wuzebi mu bantu abobo?
Baba tatu balonga na Yesu, baba tanguninanga bapostolo. Zebi mazina mawu?—Matai, Yoane ayi Petelo. Bapostolo Matai ayi Yoane bazaba mboti Yesu ayi basonika zibuku zidi mu Kibibila ziǹtubila luzingu lwandi. Yoane mvandi wusonika buku baǹtanguninanga Nzayikusu ove Nsongolo ayi miǹkanda mitatu, baǹtedilanga 1 Yoane, 2 Yoane, ayi 3 Yoane. Petelo wusonika ǹkanda wu nteti ayi wumwadi wu Petelo. Mu ǹkand’andi wumwadi, Petelo wusonika matuba Yave ku diyilu matedi mu mwan’andi: ‘Awuwu nandi mwan’ami. Minu yikunzolanga beni ayi nyenzi yidi mu nandi.
Babakala baǹkaka badi va mfikula, mvawu basonika zibuku zitulongisa matedi Yesu. Wumweka mu bawu dizina dyandi Malako. Mu kutala mu kumona, nandi mvandi wuba bo bakanga Yesu. Diawu kamwena mamoso mamonika. Wuǹkaka dizina dyandi Luka, nandi wuba ḿbuki. Ḿba kumbusa lufwa lu Yesu kayiza bela wumweka mu baklisto ove ǹlandikini wu Yesu.
Miǹsoniki myodi midi va mfikula, baba zinkomba zi Yesu. Ngyewu, zebi banani?— Mazina mawu, Yakobi ayi Yuda. Va ntonono, bawu basa zolanga ko kulandakana Yesu. Nkumbu ziǹkaka baba kummwenanga banga muntu wulauka. Angi kuǹtwala batela mana mu Yesu ayi bayiza ba baklisto.
Ǹsoniki widi va nsuka mu mfikula, dizina dyandi Polo. Angi ava kaba nlandikini wu Yesu, dizina dyandi diba, Saulu. Nandi kabasa zolanga ko baklisto, ayi kimbeni kiwombo kaba mu bawu. Ngyewu, zebi bivanga nandi kubalula mayindu ayi kuba wumweka mu baklisto?— Kilumbu kiǹkaka bo kaba dyata mu nzila, nandi wuyuwa mbembo yi Yesu yibasikila ku diyilu ayi yi yuvula Polo: ‘Kibila mbi wididi kinkesi mu minlandikini myami?’ Mu bilumbu bilandasana, Polo wubalula mayindu ayi wuyiza ba nlandikini wu Yesu. Nandi wusonika 14 di zibuku zi Kibibila, kutona buku yi Loma ti Ebeleo.
Befu tuǹtanganga Kibibila kadika kilumbu, buawu vo bwisi ko buawu?— Bo tuǹtanganga Kibibila, tunlongukanga beni matedi Yesu. Ngyewu tidi kubwe zaba matedi Yesu?—
