Tala mwana widi va mfikula. Buka va nafeka kadi ayi boma kammona, bakana ko buawu? Ngyewu wumana bubela?— Bantu boso baḿbelanga buawu nkumbu ziǹkaka. Kibibila kiǹtubila bakundi ba Yave baba mu kyunda ayi boma. Wumweka twanlonguka mu bawu, dizina dyandi diba Elia.

Elia, wuba ǹkundi wu Yave, waba zingilanga ku Isaeli ava Yesu kabutuka va ǹtoto. Akabe (Ahab) wuba ǹtinu wu Isaeli, angi kabasa sambilanga ko Nzambi yikyedika, Yave. Akabe na ǹkazi’andi Isabeli, nzambi yiluvunu baba sambilanga yiba dizina Bali. Isabeli ǹkazi wu Akabe, ǹtima wumbi ka ba ayi waba tomba kuvondisa Elia ayi baboso baba sambilanga Yave, Nzambi yikyedika. Ngye zebi mbi Elia kavanga?—

Elia wutina! Nandi wuyenda kinanu kaswama ku nsi dimanya dinneni. Mu mbwenu’aku kibila mbi kavangila mawu?— Buawu, nandi boma kabamona. Angi nkanu kasa tombila ko kumona boma. Kibila mbi? Kibila nandi wuzaba ti Yave wulenda  kuǹsadisa. Mu bilumbu bivyoka kumbusa, Yave wumonisina Elia mangolo mandi. Nkumbu yiǹkaka mwingi kammonisina ti nandi wuyuwa ǹsambu’andi kadinda, Yave ku diyilu wufila mbazu va ǹtoto yivika baǹkwa mambi. Buawu tulenda tubila ti Yave wuba wukubama mwingi kusadisa Elia nkumbu ayiyi mvandi!

Bo kaba ku nsi dimanya, Yave wuyoluka yandi ayi wuyuvula Elia: ‘Kibila mbi wididi akuku ngyeveka?’ Elia wuvutula: ‘Kibila minu to yibesyala yi nkidi sadila mfumu Nzambi. Yididi va miveka, kibila mu kyunda yidi ayi boma yimmona bu kufwa.’ Elia kaba mwena ti baboso baba sadilanga Yave bamana kufwa, nafeka to wusyala. Angi Yave wukamba Elia: ‘Ḿve, mo masiko makyedika, vadi 7.000 di bantu bankidi mbwongimina. Bika mona boma, kibila mambu mawombo madi yami, ngyewu fweti vanga mawu!’ Mu mbwenu’aku, Elia wuyangalala bo kayuwa mambu amomo?—

Mbi wulenda longuka mu mambu mamonikina Elia?— Wulendi ko kuyimona banga ngyeveka to widi ove kumona boma. Ngyewu widi na bakundi bakuzolanga ayi banzolanga Yave. Wulenda longuka mvandi ti Yave ǹkwa ngolo zyoso ayi nandi wulenda kusadisa mu mambu moso. Be tya beni kuzaba ti ngyewu wisi ko ngyeveka?—