MALONGI 2
Lebeka Wubika Yave mu Mayangi
Lebeka wuba nkyeto waba zolanga beni Yave. Nandi wuba ǹkazi wu Isaki. Ayi mvandi wuba luzolo mu Yave. Bwidi Lebeka ayi Isaki bazabisinina? Bwidi Lebeka ka monisina ti waba tomba kubika Yave mu mayangi? Twaḿbwela kulonguka matedi mu nandi.
Matata ma Isaki baba, Abalahami ayi Salai. Bawu baba kalanga ku ǹtoto wu Kanani. Bantu baba zingilanga mu nsi beni, baba sa bwongiminanga ko Yave. Diawu Abalahami ka nkambu tila mwan’andi kakwedila mu nsi beni. Angi dikanda di Abalahami baba zingilanga ku ǹtoto wu Halani. Diawu, nandi katumina wumweka mu bisadi byandi wuba dizina di Eliezeli, mwingi kenda ti ku Halani kuba matata mandi mwingi katombila kuna mwan’andi Isaki ǹkazi.
Lebeka wukivana mu kisalu mwingi kunwikina nlangu zikamela zyoso
Eliezeli wuyenda na bisadi biǹkaka bi Abalahami. Bawu badyata beni mwingi kutuka ayi banata kumi di zikamela zyaba nata bidya ayi minkayilu. Bwidi Eliezeli kabina zabila nkyeto kafweti sodila Isaki?Bo Eliezeli na bisadi biǹkaka bavitila ku ǹtoto wu Halani, bawu batelama va kisima ki nlangu kibila Eliezeli wuzaba ti vawu bankyeto baba kwiza tekilanga va masika nlangu. Nandi wudinda mu lusambulu kwidi Yave: ‘Mi kudinda mwana nkyeto nlangu wu kunwa, na kukikinina kuvana mvandi zikamela zyami, ma yibaka bu kuzabila ti nandi nkyeto ngyewu Nzambi’ami be sola.’
Vasa vyoka ko ntangu yiwombo, mwana ndumba baba tedilanga Lebeka wuǹkwiza yizanga ti va baba. Kibibila kiǹtuba ti nandi kitoko beni kaba. Bo kavitila va baba, Eliezeli wunnyuvula: ‘wulenda kumpana nlangu yinwa?’Nandi wuvutula: ‘Ngete! Ayi zikamela zyaku mvandi yilenda kuba tekila nlangu banwa.’ Ngye zebi! Zikamela nlangu wuwombo bannwanga. Diawu Lebeka miǹtulu miwombo kavanga mwingi kunwikina bibulu byoso. Ngyewu widi mu kumona Lebeka va mfikukula mpila kakivanina mu kisalu?— Bukyedika ti awowo wuba mvutu wu Yave mu lusambulu Eliezeli kadinda ayi mawu, maǹtwadisa beni mayangi.
Eliezeli wuvana minkayilu miwombo kwidi Lebeka. Bosi nandi wutumisa Eliezeli na baba yandi mwingi bavitila ku nzo matata mandi. Eliezeli bosi wusudikisa matata ma Lebeka kibila Abalahami mfum’andi kaḿfidila kuna. Nandi wubakamba mvandi mpila Yave katambudila ǹsambu’andi. Dikanda di Lebeka bayangalala beni ayi bakikinina kakwela Isaki.
Lebeka wuyenda na Eliezeli ku Kanani ayi wukwela Isaki
Mu mpil’aku, wummwena ti Lebeka wuzola diyindu di kukwela Isaki?— Lebeka wuzaba ti Yave nandi wuveka Eliezeli. Buawu, bo dikanda dyandi bayuvula Lebeka ti nandi wuzola kukwela Isaki ayi kuzingila ku ǹtoto wu Kanani, nandi wuvutula: ‘Ngete minu yi tidi.’ Mu ntangu beni nandi wuyenda na Eliezeli. Bo bavitila ku Kanani nandi wukwela Isaki.
Yave wusakumuna beni Lebeka bo kavanga ma kabatomba. Bo mimvu miwombo mivyoka, Yesu wuyiza butukila va dikanda dyandi! Ngye kuvanganga maǹkwangidika Yave, banga Lebeka, Yave wala kusakumuna.
