DILONGI 07

Buidi Yave Kadidi?

TATIKA

Buidi Yave Kadidi?

Bo wunyindulanga matedi Yave Nzambi, mayindu mbi ma kukuizilanga va kilunzi? Ngie wunyidulanga ti Nzambi widi beni nkinza ayi wisi ko bu kumfikimina? Voti ngie wunyindulanga ti kasi ko mutu, vayi madi mangolo dedi bukadidi nzazi? Mu mbuenu’aku buidi Yave kadidi? Mu Kibibila, Yave wusudikisa zikhadulu ziandi ayi kiawu kintuba ti nandi wukuvuanga nkinza.

1. Kibila mbi tukhambu muenanga Nzambi?

“Nzambi widi Pheve.” (Yoane 4:24) Yave kasi ko nyitu yi kinsuni dedi befu. Vayi Nandi widi phevi yinzingilanga ku diyilu. Diawu befu tukhambu kummuenanga.

2. Zikhadulu mbi Yave Kadi?

Bukiedika ti tulendi mona ko Yave, vayi befu kulonguka matedi nandi tuala luta kunzaba, ayi tuala kunzola kibila nandi widi mutu wukiedika ayi widi zikhadulu zimboti. Kibibila kintuba: “Yave wunzolanga busonga, ayi nandi kalendi kuekula ko batu badi bakuikama mu nandi.” (Minkunga 37:28) Nandi mvandi widi “nkua mamboti ayi nkua kiadi.” Ayi bulutidi, nandi wummonanga kiadi batu badi mu kutovuka. (Yakobi 5:11) “Yave widi wufikama kuidi batu badi mintima mikofakana; ayi wunsadisanga batu badi mu kiunda kingolo.” (Minkunga 34:18, tala nota) Vayi ngie zebi ti mambu tumvanga malenda nyongisa ntima wu Yave? Dedi, mutu wunsola kuvanga mambu mambi, wumbikanga ntima wu Yave mu kiunda. (Minkunga 78:40, 41) Vayi mutu wunsola kuvanga mambu mamboti, wunkuangidikanga ntima wu Yave.—Tanga Zingana 27:11.

3. Buidi Yave kammonisinanga ti wu tuzolanga?

Luzolo, yawu khadulu yilutidi mu zikhadulu zioso Yave kadi. Diawu Kibibila kintubila ti, “Nzambi Luzolo.” (1 Yoane 4:8) Tuzabidi ti Nzambi luzolo, kubika to mu kutanga khadulu beni mu Kibibila, vayi mvandi mu kutala biuma nandi kavanga. (Tanga Mavanga 14:17.) Dedi yindula mua nkadu mu phila katuvangila. Wutuvanga na meso muingi tubaka bu kumuena zindimba ziviakana, mvandi wutuvanga na makutu muingi tubaka bu kukuwila zimbembu ayi minkunga miviakana. Yave wutuvanga mvandi na ludimi muingi kumona lueki lu bidia biviakana. Kavangila mambu moso amomo, muingi luzingu luitu luluta ba mayangi.

BUELA LONGUKA

Tomba kuzaba, mbi Yave kasadila muingi kuvanga biuma abiobio bi kukuitukila. Bosi mona buidi Yave ka tumonisinanga zikhadulu ziandi.

4. Phevi Yinlongo madi mangolo ma Nzambi

Dedi bo tunsadilanga mioko mitu muingi kuvanga kisalu, Yave mvandi wunsadilanga phevi’andi yinlongo. Kibibila kimmonisa ti phevi yinlongo, yisi ko mutu, vayi madi mangolo ma Nzambi. Mangolo beni mawu kansadilanga muingi kuvanga biuma. Tanga Luka 11:13 ayi Mavanga 2:17, bosi tubilanu biuvu binlanda:

Befu tulenda dinda phevi yinlongo ayi Yave kalenda tuvana yawu, buabu buidi wummuena, phevi yinlongo yidi mutu voti mangolo ma Nzambi? Kibila mbi wunyindudila abobo?

Yave wusadila phevi’andi yinlongo muingi kuvanga biuma bi kukuitukila. Tanga Minkunga 33:6 ayi 2 Petelo 1:20, 21, bosi tubilanu kiuvu kinlanda:

Mu ziphila mbi Yave kasadila phevi’andi yinlongo?

5. Yave widi zikhadulu zimboti

Mose wuba kisadi kikuikama ki Nzambi, vayi waba tomba kuzaba buboti Mvangi’andi. Diawu Mose kakambila Nzambi: “Nzabikisa zinzila ziaku muingi yi kuzaba buboti.” (Esodu 33:13) Yave wuvana mvutu kuidi Mose, mu kunzabikisa zikhadulu ziandi. Tanga Esodu 34:4-6, bosi tubilanu biuvu binlanda.

Zikhandulu mbi Yave kazabikisa kuidi Mose?
Khadulu mbi yi Yave ngie wunluta zolanga?

6. Yave wumvuanga batu nkinza

Mu thangu yikhulu dikabu di Nzambi diba ku buvika ku Ngipiti. Buidi ziphasi babe viokila zinyongisina ntima wu Yave? Yuwa AUDIO ayi landakana, voti tanga Esodu 3:1-10. Bosi tubilanu biuvu binlanda.

AUDIO: Yave Wuba Kuazuka mu Ziphasi Baba Viokila (2:45)

Buidi kinongu akiokio kimmonisina kiunda Yave kambanga bo batu bantovuka?—Tala matangu 7 ayi 8.
Mu mbuenu’aku, bukiedika ti Yave wuntomba kusadisa batu? Nandi kalenda nunga kuvanga mawu? Sudikisa.