Yave wuntomba muingi ngie wunzaba buboti. Kibila mbi? Kibila nandi wuntomba wubuela zaba matedi zikhadulu ziandi, mambu kankanikisa mu ngie mu bilumbu binkuiza ayi wubuela longuka matedi nandi muingi wumfikama. Vayi bukiedika kuandi ti ngie wulenda ba nkundi wu Nzambi? (Tanga Minkunga 25:14.) Mbi ngie wufueti vanga muingi wuba nkundi wu Nzambi? Kibibila kimvana mimvutu mi biuvu abiobio. Kibibila mvandi kintuba ti Nzambi nandi nkundi wulutidi mu bakundi boso ngie wulenda baka.

1. Thumusunu mbi Yave kakuvana?

Kibibila kintuba “Lufikama Nzambi ayi nandi wala kulufikama.” (Yakobi 4:8) Mbi mawu mansundula? Masundula ti Yave widi mu kutumisa muingi wuba nkundi’andi. Bankaka ḿba balenda yindula, buidi yilenda bela nkundi wu Nzambi boti yilendi kummona ko. Mu Kibibila Yave wutuvana mamoso muingi tunzaba, mu phila ayoyo befu tulenda kumfikama. Bo tuntanga Kibibila kikundi kitu na Yave kinluta ba kifikama kheti tulendi kummona ko.

2. Kibila mbi Yave widi nkundi wulutidi befu tulenda baka?

Vasi ko mutu wunluta kuzola kena Yave. Nandi wuntomba muingi ngie wubaka mayangi mu luzingu. Ngie wulenda “kunyekudila bizitu biaku bioso, kibila nandi wukukiebanga.” (1 Petelo 5:7) Yave widi wukubama muingi kusadisa, kubomba, ayi kukuwa bakundi bandi.—Tanga Minkunga 94:18, 19.

3. Muingi tuba bakundi ba Yave mbi tufueti vanga?

Yave wunzolanga batu boso, vayi “widi kikundi kifikama na batu basonga.” (Zingana 3:32) Yave wuntomba bakundi bandi bavanga mangolo muingi kuvanga mambu nandi kantuba ti madi mamboti, ayi kulenda mambu nandi kantuba ti madi mambi. Bawombo banyindulanga ti, balendi nunga ko kuvanga mambu moso Yave kantuba ti madi mamboti. Vayi Yave kaba fundisanga ko. Nandi wumvitikanga baboso ba kuntombanga mu bukiedika muingi kunkuangidika ayi kuba bakundi bandi.—Minkunga 147:11; Mavanga 10:34, 35.

 BUELA LONGUKA

4. Abalahami wuba nkundi wu Yave

Mambu Kibibila kintuba matedi Abalahami (baba tedilanga Abalami) ma tuzabikisa mbi binsundula kuba nkundi wu Nzambi. Tanga matedi Abalahami mu Ngenesi 12:1-4. Bosi tubilanu biuvu binlanda:

• Mbi Yave kadinda Abalahami kavanga?

• Mbi Yave kakanikisa kuidi Abalahami?

• Mbi Abalahami kavanga?

5. Mbi Yave kantomba bakundi bandi bavanga?

Befu tuntombanga bakundi bitu ba tuvangilanga mambu mamboti.

• Mambu mbi ngie wuntombanga nkundi’aku kakuvangila?

Tanga 1 Yoane 5:3, bosi tubilanu kiuvu kinlanda:

• Mbi Yave kantombanga mu bakundi bandi?

Muingi tutumukina Yave tufueti kubalula mavanga mitu, phil’itu yi kuyindudila voti kimutu kitu. Tanga Yesaya 48:17, 18, bosi tubilanu kiuvu kilanda:

• Kibila mbi Yave kantombilanga bakundi bandi ba balula nzingulu’awu?

 6. Buidi Yave kansadisilanga bakundi bandi

 MBI NGIE BELONGUKA

Yave wuntomba muingi ngie wuba nkundi’andi, ayi nandi wala kusadisa wubuela kumfikama.

Vutukila Mambu Mamfunu

• Buidi Yave kansadisilanga bakundi badi?

• Kibila mbi Yave kantombila bakundi bandi babalula nzingulu’awu?

• Ngie wunyindulanga ti phasi beni kuba nkundi wu Yave? Kibila mbi wunyindudilanga abobo?