DILONGI 11
Buidi Wulenda Bakila Ndandu mu Matangu Maku ma Kibibila?
Ngie wumana ba mu kiunda mu kuzaba ti vadi kisalu kinneni wufueti vanga? Muingi wununga, ḿba ngie wunkuiza baka makani ma kuvanga kiawu nkadu nkadu. Mawu mvandi wufueti vanga bo wuntanga Kibibila. Ḿba wulenda kukikuvusa, ‘Vadi yilenda tonina?’ Mu dilongi adidi, tuemmona mua mambu ngie wulenda vanga muingi wuluta baka ndandu bo wuntanga ayi wunlonguka Kibibila.
1.Kibila mbi didi diambu dinkinza kutanganga Kibibila kadika kilumbu?
Mutu wuntanganga Kibibila, voti “diambu di Yave,” wala baka mayangi makiedika mu luzingu. (Tanga Minkunga 1:1-3.) Muingi wutona kutanga Kibibila, botulanga thangu kadika kilumbu. Bo wumbuela zaba diambu di Nzambi buawu wunluta zodila kutanga Kibibila.
2.Buidi wulenda buedila baka ndandu mu matangu maku ma Kibibila?
Muingi tubuela baka ndandu mu matangu mitu ma Kibibila, tufueti “yindulanga mambu tuntanga.” (Yosua 1:8, nota) Mawu mansundula kubotulanga thangu muingi kuyindula mambu tuma tanga. Ayi tufueti kuyikuvusanga: ‘Mbi mawu makundonga matedi Yave? Buidi yilenda sadila mambu amomo mu luzingu luama? Buidi yilenda sadila mambu amomo muingi kusadisa bankaka?’
3.Buidi ngie wulenda bakila thangu muingi kutanganga Kibibila?
Ngie wummonanga phasi kubaka thangu muingi kutanga Kibibila? Bawombo mu befu buawu tummuenanga. Yedika “kusadila thangu’aku mu nduenga.” (Efeso 5:16) Mawu mansundula ti ngie wufueti botulanga thangu muingi wutanganga Kibibila kadika kilumbu. Batu bankaka banzolanga kutanga Kibibila meni meni, bankaka va masika, bankaka mu thangu bamvunda, ayi bankaka kutsuka kilumbu ava kulala. Abu ngie thangu mbi wummuena ti yifueni muingi wutangila Kibibila?
BUELA LONGUKA
Tala mambu wulenda vanga muingi wubuela nyevisa matangu maku ma Kibibila. Tala mvandi buidi wulenda kubimina buboti muingi wuluta baka ndandu mu ndongukulu’aku yi Kibibila.
Dedi bo ngie wulenda longukila kuzola bidia wukhambu kolama kudianga buawu mvandi, wulenda longukila kuzola kutanga Kibibila
4. Longuka buidi wulenda zodila kutanga Kibibila
Bukiedika ḿba dilenda ba diambu diphasi kutona kutanga Kibibila. Vayi, ngie wulenda longuka kuba phuila voti kuzola kuvanga mawu. Mawu mammonikanga mu thangu mutu kanlonguka kudia bidia kakhambu kolama. Tanga 1 Petelo 2:2, bosi tubilanu kiuvu kinlanda:
-
Buidi wummuena, kutanganga Kibibila kadika kilumbu, kulenda kusadisa kuluta ba phuila yi kutanga kiawu?
Tala VIDEO ayi mona mbi batu bankaka bavanga muingi bazola kutanganga Kibibila. Bosi tubilanu biuvu binlanda.
-
Dedi bo tube muena mu video, mambu mbi maba vuvisanga matoko muingi babika kutanga Kibibila?
-
Mbi bisadisa matoko amomo kubika kuvonga kutanganga Kibibila kadika kilumbu?
-
Mbi bawu bavanga muingi baluta nyevisa matangu mawu ma Kibibila?
Tala mambu malenda kusadisa wutona kutanga Kibibila:
-
Sola Kibibila ki lufiatu ayi kikhambulu phasi mu kutanga. Dedi wulenda sadila Tradução do Novo Mundo yidi mu zimbembu ziwombo.
-
Tona kutanga binongu wunluta zolanga. Tala mua mambu mu quadro “Landakana Matangu Maku ma Kibibila.”
-
Sonikanga mambu mankinza wunlonguka. Ngie wulenda sadila quadro “Wuntebuka moyo vama mbi besinina kutanga?
-
Sadila JW Library®. Muingi wutanga ayi kukuwa matangu ma Kibibila mu telefone, mu tablet voti mu computador.
-
Sadila mambu Madi kutsuka Tradução do Novo Mundo. Muidi zimapa, ziquadro ayi tsudukusu yi bikuma yinkuisa buela nyevisa matangu maku ma Kibibila.
5. Kubama mu ndongukulu’aku yi Kibibila
Tanga Minkunga 119:34, bosi tubilanu kiuvu kinlanda:
-
Kibila mbi didi diambu dinkinza kuvanganga nsambu ava kutanga Kibibila voti ava kukubama mu ndongukulu’aku yi Kibibila?
Buidi wulenda buedila baka ndandu mu kadika dilongi di buku ayiyi? Bo wunkubama mu ndongukulu’aku yedika kuvanga mambu amama:
-
Tanga binduika bioso bidi mu dilongi.
-
Tanga matangu moso ma Kibibila, ayi tomba kuvisa buidi mawu madidi nguizani na mambu wunlonguka.
-
Tula ndimba mu bikuma voti mintanda mimvana mvutu mu kadika kiuvu, kuvanga mawu mala kusadisa kutubila matedi dilongi beni na nlongisi’aku.
Ngie Zebi?
Zimbangi zi Yave bamana sadila zitsekudulu ziwombo zi Kibibila. Vayi befu tunluta sadilanga Tradução do Novo Mundo da Bíblia Sagrada kibila yawu yidi yi lufiatu ayi yisi ko phasi mu kuvisa ayi yinsadilanga dizina di Nzambi. —Dilongi didi mu jw.org “Zimbangi zi Yave Bansadilanga Kibibila Kiviakana?” (Dilongi didi mu jw.org)
BATU BANKAKA BANTUBANGA: “Kulonguka Kibibila kuidi beni phasi. Mvandi yidi mambu mawombo makuvanga ayi yimbanga beni wuvonga.”
-
Buidi wummuena mayindu amomo?
MBI NGIE BELONGUKA
Muingi wuluta baka ndandu mu mambu diambu di Nzambi dintuba, botulanga thangu muingi kutanga Kibibila, sambila muingi wuvisa mambu widi mu kutanga, ayi kubama buboti mu kadika ndongukulu.
Vutukila Mambu Mamfunu
-
Mbi binkuiza kusadisa kuluta baka ndandu mu mambu Kibibila kinlonga?
-
Mu ngiewu, thangu mbi yifueni muingi wutanganga ayi kulonguka Kibibila?
-
Kibila mbi didi diambu dinkinza kukubikanga ndongukulu’aku yi Kibibila?
TALA MAMBU MANKAKA
Longuka mambu mankaka malenda luta nyenvisa matangu maku ma Kibibila.
Tala mayindu matatu malenda kusadisa bo wuntanga Kibibila.
“Buidi Kibibila Kilenda Kusadidila?— Kitini 1: Zaba Buboti Kibibila Kiaku” (Dilongi didi mu jw.org)
Bakula buidi wulenda longukila kuzola kutanga Kibibila.
“Buidi Kibibila Kilenda Kusadisila?— Kitini 2: Zaba Buboti Kibibila Kiaku” (Dilongi didi mu jw.org)
Longukila mu bifuani bi batu batona kutanga Kibibila tona thama.
