DILONGI 15
Nani Yesu?
Yesu widi mutu wuzabakana beni mu nza yimvimba. Vayi kheti bobo, batu bawombo basa zaba ko mawombo matedi Yesu ayi badi mayindu maviakana matedi nandi. Vayi mbi Kibibila kinlonga matedi Yesu?
1. Nani Yesu?
Yesu widi mbasi yidi mangolo wunkalanga ku diyilu. Ava Yave kavanga kioso kiuma, nandi wuvanga theti Yesu. Diawu ba kuntedilanga “wutheti mu bivangu bioso.” (Kolosai 1:15) Kibibila kintuba ti Yesu nandi ‘Muana wumueka to’ wu Nzambi. Mawu mansundula ti nandi to Yave kavanga mu khambu lusalusu lu mutu wunkaka. (Yoane 3:16) Yesu wusala va kimueka na Tat’andi Yave. Nandi wunsadisa kuvanga biuma bioso binkaka. (Tanga Zingana 8:30.) Diawu kikundi kiawu kididi beni kingolo. Yesu widi mvuala wu Nzambi; voti, nandi Yave kansadilanga muingi kuzabikisa zitsangu ziandi kuidi zimbasi zinkaka ayi batu va ntoto. Diawu Kibibila kikuntedila ‘Diambu.’—Yoane 1:14.
2. Kibila mbi Yesu kayizila va ntoto?
Nduka 2.000 bi mimvu kumbusa, Yave wuvanga mangitukulu bo kabotula luzingu lu Muan’andi ku diyilu ayi wuntula mu kivumu ki nkieto wumueka baba tedilanga Malia. Mu phila ayoyo, Yesu wuyiza butukila mu nyitu yi kinsuni. (Tanga Luka 1:34, 35.) Yave wufila Yesu va ntoto muingi kaba Mesia voti Klisto ayi kavukisa batu boso va ntoto. a Zimbikudulu zioso zitedi Mesia, zisundukila mu Yesu. Mawu masadisa batu kuvisa ti Yesu nandi “Klisto, Muana wu Nzambi yi moyo.”—Matai 16:16.
3. Kuidi Yesu kadi bubu?
Bo Yesu kafua, Yave wumvulubusa na nyitu yi kiphevi. Bo katuka ku diyilu, ‘Nzambi wunnangika va kibuangu kilutidi.’ (Filipi 2:9) Bubu Yesu widi mbasi widi mangolo mawombo. Yave to wunlutidi mu mangolo.
BUELA LONGUKA
Bakula nani Yesu, ayi kibila mbi didi diambu dinkinza kulonguka matedi nandi.
4. Yesu kasi ko Nzambi Nkua Ngolo Zioso
Kibibila kitulonga ti Yesu widi mbasi widi mangolo ku diyilu. Vayi kheti bobo, nandi wuntumukinanga Tat’andi Yave Nzambi. Buidi tuzabidi mawu? Tala VIDEO muingi wumona disuasana didi mu Yesu ayi Nzambi Nkua Ngolo Zioso.
Matangu madi va wanda, mankuiza tusadisa kuvisa ti Yave ayi Yesu badi disuasana. Tanga kadika lutangu bosi, tubilanu biuvu binlanda:
Tanga Luka 1:30-32.
-
Buidi mambu mbasi katuba mammonisina ti Yesu ayi Yave basi ko mutu wumueka?
Tanga Matai 3:16, 17.
-
Bo Yesu kamana kubotama mbi mbembu yibasikila ku diyilu yituba?
-
Mu mbuenu’aku, yiba mbembu yinani?
Tanga Yoane 14:28.
-
Va dikanda nani widi mfumu tata, voti muana?
-
Yesu wutedila Yave, Tata. Mbi mawu matulonga?
Tanga Yoane 12:49.
-
Bukiedika ti Yesu wunyindulanga ti nandi widi dedi mueka na Tat’andi? Buidi wummuena, bawu badi badedakana?
5. Bivisa bimmonisa ti Yesu widi Mesia
Mu Kibibila muidi zimbikudulu ziwombo zitusadisa kuzaba nani Mesia voti mutu Nzambi kasola muingi kuvukisa batu. Tala VIDEO muingi wuzaba zimbikudulu zinkaka zisalimina mu Yesu bo kaba va ntoto.
Tanga zimbikudulu beni, bosi tubilanu biuvu binlanda:
Tanga Mika 5:2 muingi wuzaba kuidi Mesia kabutukila. b
-
Bukiedika ti mbikudulu ayoyo yisalama?—Matai 2:1.
Tanga Minkunga 34:20 ayi Zakalia 12:10 muingi wumona mambu Kibibila kibikula matedi buidi lufua lu Mesia lunkuiza bela.
-
Zimbikudulu beni zisalama? —Yoane 19:33-37.
-
Wummuena ti Yesu naveka wuvanga mangolo muingi zimbikudulu aziozio zisalimina mu nandi?
-
Bivisa mbi mawu ma kuvana matedi Yesu?
6. Didi diambu dinkinza kulonguka matedi Yesu
Kibibila kitulonga ti didi diambu dinkinza kulonguka matedi Yesu ayi matedi mambu mbi Nzambi kantomba befu tuvanga. Tanga Yoane 14:6 ayi Yoane 17:3, bosi tubilanu kiuvu kinlanda:
-
Kibila mbi didi diambu dinkinza kulonguka matedi Yesu?
Yesu wuzibula nzila muingi batu baba bakundi ba Nzambi. Nandi wulonga batu matedi Yave ayi mu kibila kiandi tulenda baka luzingu lu mvu ka mvu.
BATU BANKAKA BANTUBANGA: “Zimbangi zi Yave bakikininanga ko mu Yesu.”
-
Buidi wummuena mawu?
MBI NGIE BELONGUKA
Yesu widi mbasi yidi beni mangolo voti lulendu. Nandi Muana Nzambi ayi Mesia.
Vutukila Mambu Mamfunu
-
Kibila mbi Yesu bakuntedilanga ‘wutheti mu bivangu bioso’?
-
Mbi Yesu kavanga ava kayiza va ntoto?
-
Buidi tuzabidi ti Yesu nandi Mesia?
TALA MAMBU MANKAKA
Tala bivisa binkaka bimmonisa ti Yesu nandi Mesia.
“Bukiedika ti Zimbikudulu zi Kibibila Zimvana Bivisa ti Yesu Nandi Mesia?” (Dilongi didi mu jw.org)
Bukiedika ti Nzambi wubuta Yesu dedi bo batu bambutilanga bana? Mbi Kibibila kintuba matedi mambu amomo?
“Kibila Mbi Bantedilanga Yesu Muana Nzambi?” (Dilongi didi mu jw.org)
Tala kibila mbi Kibibila ki kikininanga ko malongi ma batu batatu mu Nzambi yimueka to.
Tala buidi luzingu lu nkieto wumueka lubalukila bo kavisa mbi Kibibila kinlonga matedi Yesu.
“Uma judia explica por que reavaliou sua fé” (Despertai!, Maio de 2013)
a Mu dilongi 26 ayi 27 tunkuiza mona kibila mbi batu bantombila phulusu ayi buidi Yesu katu kudila.
