Yave kasi ko Nzambi yi divunza. (1 Kolinto 14:33) Diawu dikabu diandi bamvangilanga mambu mu phila yisulama. Buidi bantuadisilanga bimvuka? Buidi tulenda buedila mioko muingi kimvuka ki Yave kibika ba divunza?

1. Nani Mfumu kimvuka?

“Klisto nandi Mfumu wu kimvuka.” (Efeso 5:23) Ku diyilu nandi widi mu kutuadisa kisalu kioso kimvuka ki Yave kimvanganga. Yesu nandi “wu sola nnanga wukuikama”. (Tanga Matai 24:45-47.) Dedi bapostolo mu sekulu yitheti ayi bakulutu ku Yelusalemi, babe tuadisanga kimvuka mvandi Dingumba Dintuadisi dintuadisanga kimvuka ki Yave mu nza yimvimba. (Mavanga 15:2) Vayi zikhomba aziozio basi ko zimfumu zi kimvuka ki Yave. Dedi Zimbangi zioso zi Yave, mvawu bantanganga Kibibila, bansadilanga mambu kiawu kintuba ayi banlandakananga zithuadusulu zi Yesu.

2. Banani bakulutu ba kimvuka ayi mbi bamvanganga?

Bakulutu ba kimvuka badi Baklisto bayonzuka mu kiphevi, banlongukanga mu Kibibila buidi bafueti kengidila mamemi ma Yave mu kuba sadisa ayi kuba bomba. Bawu batambulanga ko zimbongo mu kisalu bamvanganga vayi bawu “bansadilanga bika ti mu lukuiku vayi mu luzolo bika ti muingi batomba ndandu vayi mu luzolo lu ntima.” (1 Petelo 5:1, 2) Bakulutu ba kimvuka bantambulanga lusalusu lu minsadisi mi bakulutu, ayi minsadisi beni bantambulanga kiyeku kimona ki kuba mvandi bakulutu ba kimvuka.

Dingumba Dintuadisi bambiekanga bakulutu bankaka ba kimvuka muingi baba minkengididi mi bimvuka. Minkengididi beni bankuendanga kuetala bimvuka biwombo muingi kuvana zithuadusulu ayi mbombolo. Mvandi mu kusadila Kibibila, bawu bambiekanga zikhomba zinkaka muingi baba bakulutu ba kimvuka voti minsadisi mi bakulutu.—1 Timoteo 3:1-10, 12; Tito 1:5-9.

3. Biyeku mbi Zimbangi zioso zi Yave badi?

Batu boso badi mu kimvuka ki Yave “banzitisanga dizina di Yave” mu kukuenda mu zikhutukunu ayi mu kusamunanga zitsangu zi Yave mu phila balenda nungina.—Tanga Minkunga 148:12, 13.

 BUELA LONGUKA

4. Yesu widi Mfumu wunkua mamboti

Yesu wuntumisa baboso mu luzolo. Tanga Matai 11:28-30, bosi tubilanu kiuvu kinlanda:

• Phila Mfumu mbi Yesu kadi ayi buidi nandi kantombila befu tutadila kimfumu kiandi?

5. Bakulutu ba kimvuka banlongisilanga mu kifuani kiawu

1. Bakulutu ba kimvuka bankindisanga kiphevi kiawu ayi ki basi dikanda diawu

2. Bakulutu ba kimvuka bankiebanga baboso mu kimvuka

3.   Bakulutu ba kimvuka bantatamananga kusamuna

4. Bakulutu ba kimvuka bamvanganga malongi mu kimvuka. Ayi mvandi bansadisanga kudiodisa nzo yi Kintinu

6. Buidi tulenda buedila mioko bakulutu ba kimvuka

Kibibila kituvana kibila kinkinza muingi tubuela mioko bakulutu ba kimvuka. Tanga Ebeleo 13:17, bosi tubilanu biuvu binlanda:

• Kibila mbi Kibibila kitu kindisila muingi tutumukinanga mu ntima woso zikhomba bantuamanga ntuala mu kimvuka ki Yave? Kibila mbi didi diambu dinkinza kuvanga mawu?

Tanga Luka 16:10, bosi tubilanu kiuvu kinlanda:

• Kibila mbi didi diambu dinkinza kutumukinanga bakulutu ba kimvuka kheti mu mambu tummuena ti masi ko beni nkinza??

 MBI NGIE BELONGUKA

Yesu nandi mfumu kimvuka. Mu mayangi tuntumukinanga bakulutu ba kimvuka mu kusala yawu va kimueka kibila bawu batu bombanga ayi batu longilanga mu kifuani kiawu.

Vutukila Mambu Mamfunu

• Nani mfumu kimvuka?

• Buidi bakulutu ba kimvuka bansadisilanga kimvuka?

• Kiyeku mbi kadika kisadi ki Yave kadi?