DILONGI 24
Mbi Kibibila Kintuba Matedi Zimbasi?
Yave wuntomba muingi tulonguka matedi dikanda diandi ku diyilu. Mu dikanda beni muidi zimbasi bantedilanga “bana ba Nzambi.” (Yobi 38:7) Mbi Kibibila kintuba matedi zimbasi? Bukiedika ti bawu bansadisanga batu? Bukiedika ti zimbasi zioso badi mu khati dikanda di Nzambi?
1. Zimbasi badi banani?
Yave wuvanga zimbasi ava kuvanga ntoto. Ayi dedi Nandi zimbasi mvandi badi zinyitu zi kiphevi. (Ebeleo 1:14) Ku diyilu kuidi bivevi na bivevi bi zimbasi ayi kadika mbasi widi na kimutu kiandi. (Nzaikusu 5:11) Bawu “bantumamananga zithumu zi Yave ayi bansadilanga ma kantuba.” (Minkunga 103:20) Mu thangu yikhulu, khumbu zinkaka Yave waba sadilanga zimbasi muingi kuzabikisa zitsangu ziandi, kusadisa dikabu diandi ayi kuvukisa bisadi biandi mu thangu baba viokilanga mu ziphasi. Bubu mvandi, zimbasi bansadisanga Baklisto bakiedika mu kisalu ki kusamuna muingi badengana batu bantomba kuzaba kiedika kitedi Nzambi.
2. Nani Satana ayi ziphevi zimbi?
Zimbasi zinkaka basa tatamana ko bakuikama kuidi Yave. Mbasi yitheti wubalukila Nzambi bakuntedilanga “Nkadi’amphemba voti Satana. Nandi wumvukumunanga nza yimvimba.” (Nzaikusu 12:9) Satana waba tomba kuvinginina va luyalu lu Nzambi, diawu kavukumunina Adami, Eva ayi zimbasi zinkaka muingi baba ku khonzo’andi. Zimbasi bayiza ba ku khonzo Satana baku batedilanga ziphevi zimbi. Yave wukukisa zimbasi aziozio ku diyilu ayi bubu bawu badi va ntoto. Vayi bala bungu.—Tanga Nzaikusu 12:9, 12.
3. Buidi Satana ayi ziphevi zimbi ba tuvukumuninanga?
Satana ayi ziphevi zimbi bamvukumunanga batu bawombo mu kusadila kindoki. Batu bansadilanga kindoki badi khituadi na ziphevi zimbi. Dedi, bankaka bankuendanga kuidi zinganga zi minkisi muingi kuvanda, kubikula mambu mankuiza monika ayi kusinga bankaka. Satana mvandi wumvanganga batu bakikinina ti balenda koluka na batu bafua. Vayi Yave katianga ko mambu moso amomo. Diawu nandi katu lubudila: “Bikanu kue tomba ziphevi zimbi voti zinganga zi minkisi.” (Levitiku 19:31) Yave wutuvananga zindubu aziozio muingi kutukieba kuidi Satana ayi ziphevi zimbi. Bawu badi zimbeni zi Nzambi ayi bantomba kutuvanga bubi.
BUELA LONGUKA
Longuka matedi mambu mamboti zimbasi bamvanganga, ayi mintambu midi mu kusadila kindoki. Ayi buidi tulenda kukikiebila muingi Satana ayi ziphevi zimbi babika ku tuvanga bubi..
4. Zimbasi bansadisanga batu kulonguka matedi Yave
Kheti tumonanga ko zimbasi kusamuna, vayi bawu bansadisanga bisadi bioso bi Nzambi muingi banunga kudengana batu badi bakubama muingi kukuwa zitsangu zimboti. Tanga Nzaikusu 14:6, 7, bosi tubilanu biuvu binlanda:
-
Kibila mbi tuntombilanga lusalusu lu zimbasi muingi kusamuna?
-
Buidi wummuena, disi ko diambu dimboti kuzaba ti zimbasi balenda tusadisa kudengana batu bantomba kulonguka Kibibila? Sudikisa.
5. Tatuka kindoki
Satana ayi ziphevi zimbi badi zimbeni zi Yave. Ayi mvandi badi zimbeni zitu. Tanga Luka 9:38-42, bosi tubilanu kiuvu kinlanda:
-
Mambu mbi ziphevi zimbi bamvangilanga batu?
Tulendi bika ko ziphevi zimbi batuadisa luzingu luitu. Tanga Deutelonomi 18:10-12, bosi tubilanu biuvu binlanda:
-
Buidi ziphevi zimbi bankuedikilanga ku tuvukumuna ayi kukoluka yitu?
-
Mu matedi kindoki, mambu mbi ngie wummonanga va kisunga wunkalanga?
Buidi wummuena, Yave widi bibila muingi ku tukandimina kuba kithuadi na kindoki? Sudikisa.
Tala VIDEO, bosi tubilanu biuvu binlanda.
-
Mu video tube mona ti, Paula bekanga mua kiuma mu koko ku muan’andi. Bukiedika ti mawu mansadisa kutatuka mambu ma kindoki? Sudikisa.
-
Mbi vaba tombulu Paula kavanga muingi kukikieba kuidi ziphevi zimbi?
Tona muna tona Baklisto bakiedika basi ko kithuadi na ziphevi zimbi. Tanga Mavanga 19:19 ayi 1 Kolinto 10:21, bosi tubilanu kiuvu kinlanda
-
Kibila mbi didi diambu dinkinza kutulula kioso kua kiuma kidi kithuadi na mambu ma kindoki?
6. Nunga mvita wu kutatuka Satana ayi Ziphevi zimbi
Satana nandi wuntuadisanga ziphevi zimbi. Vayi Yesu bantedilanga mvandi Misiela nandi nkulutu wu zimbasi zioso zikuikama ayi nandi wuba tuadisanga. Lulendu mbi Misiela kadi? Tanga Nzaikusu 12:7-9, bosi tubilanu biuvu binlanda:
-
Buidi wummuena, nani lutidi mangolo, Misiela ayi zimbasi zikuikama voti Satana ayi ziphevi zimbi?
-
Bukiedika ti minlandikini mi Yesu bafueti mona boma bu Satana ayi ziphevi zimbi?
Ngie wulenda nunga Satana ayi ziphevi zimbi. Tanga Yakobi 4:7, osi tubilanu kiuvu kinlanda:
-
Buidi wulenda nungina mvita wu kutatuka Satana ayi ziphevi zimbi?
BATU BANKAKA BANTUBANGA: “Disi ko diambu dimbi kuviokisa thangu mu kutala zifilme voti kuta bisavu bimmonisa mambu matedi kindoki.”
-
Kibila mbi didi diambu dimbi kuyindudila phila ayoyo?
MBI NGIE BELONGUKA
Zimbasi zikuikama ba tusadisanga. Satana ayi ziphevi zimbi badi zimbeni zi Yave ayi bawu bansadilanga kindoki muingi kuvuna batu.
Vutukila Mambu Mamfunu
-
Buidi zimbasi zikuikama bansadisilanga batu kulonguka matedi Yave?
-
Nani Satana ayi ziphevi zimbi?
-
Kibila mbi ngie wuntombila kutatuka mambu ma kindoki?
TALA MAMBU MANKAKA
Tala bivisa bimmonisa ti Yesu nandi Misiela.
Tala bivisa bimmonisa ti Satana widi mutu wukiedika kubika kuandi mambi madi mu khati ntima wu batu.
Tala buidi nkieto wumueka kanungina kutatuka kithuadi kaba na ziphevi zimbi.
“Ela descobriu que a vida tem objectivo” (A Sentinela, 1 de Julho de 1993)
Mona buidi Satana kansadilanga kindoki muingi kuvuna batu.
“A verdade sobre magia encatamento e feitiçaria” (O Caminho Para Vida Eterna, parte 5)
