Mu thangu tumviokila mu ziphasi, disi ko disumu kuyikuvusa: “Kibila mbi yidi mu kutovukila?” Wunkuiza yangalala kuzaba mvutu Kibibila kimvana matedi kiuvu akiokio.

1. Buidi ziphasi zitonina va ntoto?

Satana nkadi’ampemba wubalukila Yave. Nandi wabe tomba kuvinginina Yave va luyalu, diawu kavukumunina Adami ayi Eva muingi baba ku khonzu’andi. Buidi Satana kavangila mawu? Mu kuvuna Eva. (Ngenesi 3:1-5) Nandi wuvanga Eva kuyindula ti Yave waba kuba sueka mambu mamboti. Ayi wunkamba ti, nandi kasinkuiza fua ko na kulevula nsiku wu Nzambi. Mu phila ayoyo, Satana wuvanga batu kukikinina ti bankuiza baka mayangi ba kukhambu tumukina Nzambi. Diawu Kibibila kintedila Satana “nkua luvunu ayi tata yi luvunu.”—Yoane 8:44.

2. Makani mbi Adami ayi Eva babaka?

Yave wumonisa kuidi Adami ayi Eva ti nandi widi nkua kukaba. Nandi wutuba ti balenda dia kuawu makundi moso maba ku lumbu lu Edeni vayi kubotula to ma nti wumueka. (Ngenesi 2:15-17) Vayi bawu babaka makani ma kudia dikundi dio Nzambi kaba kandimina. Eva “wubonga dikundi ayi wutona kudia. Bosi Adami wudia.” (Ngenesi 3:6) Disa ba ko diambu diphasi kutumukina Yave kibila baba bavedila ayi vaba makundi mankaka ku lumbu lu Edeni. Vayi mu lutia luawu bawu babayisa Nzambi, basumuka ayi babalukila luyalu luandi. Makani babaka ma batuadisa beni ziphasi.—Ngenesi 3:16-19.

3. Mbi makani ma Adami ayi Eva matuadisa?

Bo Adami ayi Eva badia dikundi, bawu basumuka. Mu kibila akiokio, bawu batambikisa disumu kuidi nkunu’awu woso. Kibibila kintuba matedi Adami: “Mu kibila ki mutu wumueka to disumu dikota mu nza ayi lufua luyizila mu nzila yi disumu, diawu lufua lukotila mu batu boso.”—Loma 5:12.

Disumu di tuvanganga kutovuka mu ziphila ziwombo, dedi: tuntovukilanga mu kibila ki makani tumbakanga, mu kibila ki makani ma batu bankaka ayi khumbu zinkaka tuntovukilanga kibila tuidi vama ayi kilokolo kikhambu fuana.—Tanga Mpovi 9:11.

 BUELA LONGUKA

4. Mutu widi fotu mu ziphasi zitu

Batu bawombo bankikininanga ti Nzambi nandi widi fotu mu ziphasi zitu. Mawu madi makiedika? Tala VIDEO.

Tanga Yakobi 1:13 ayi 1 Yoane 5:19, bosi tubilanu kiuvu kinlanda:

• Bukiedika ti Nzambi nandi widi fotu mu ziphasi tumviokilanga?

5. Tala mambu luyalu lu Satana luntuadisanga

1. Adami ayi Eva baba bavedila ayi baba zingilanga ku lumbu lu Edeni. Vayi bawu babaka makani ma kukuwa Satana ayi babalukila luyalu lu Yave

2.   Bo babalukila Yave, disumu, ziphasi ayi lufua bikota mu nza

3. Yave wala manisa ziphasi, disumu ayi lufua. Batu boso bala ba bavedila ayi bala vutuka kuzingila ku paladizu

6. Buidi Yave kambelanga bo tumviokila mu ziphasi

Bukiedika ti Nzambi kavuanga ko nkinza ziphasi tuidi mu kuviokila? Mona mbi ntinu Davidi ayi mvuala Petelo basonika. Tanga Minkunga 31:7 ayi 1 Petelo 5:7, bosi tubilanu kiuvu kinlanda:

• Buidi wummuena mu kuzaba ti Yave wumvuanga nkinza mambu tumviokilanga ayi tidi ku tusadisa?

 MBI NGIE BELONGUKA

Satana, Adami ayi Eva, bawu badi fotu mu ziphasi zioso tumviokilanga. Yave wutu vuanga beni nkinza, diawu nkadu to wunkambu nandi wala manisa ziphasi zioso tumviokilanga.

Vutukila Mambu Mamfunu

• Luvunu mbi Satana kakamba Eva?

• Buidi makani Adami ayi Eva babaka ma tutuadisilanga ziphasi?

• Buidi tuzabidi ti Nzambi wumbanga mu kiunda bo tuntovuka?