DILONGI 30

Batu Bafua Wunzolanga Bala Vulubuka

TATIKA

Lufua luntuadisanga ziphasi ayi kiunda. Diawu Kibibila kintedila lufua mbeni. (1 Kolinto 15:26) Mu dilongi 27, wulongukidi ti Yave wunkuiza bunga mbeni yi befu boso, lufua. Vayi mbi biala monika kuidi batu boso bafua? Mu dilongi adidi wunkuiza longuka matedi kivuvu kimboti Yave ka tukanikisa. Mvandi wunkuiza mona ti nandi wala vulubusa bivevi na bivevi bi batu muingi bazinga mvu ka mvu. Vayi bukiedika ti mambu amomo mala salama? Batu beni bala vulubuka muingi kuzingila ku diyilu voti va ntoto?

1. Mbi Yave kala vanga kuidi batu boso bafua tunzolanga?

Yave wuntomba kuvulubusa batu boso bafua muingi babue zinga. Dibakala dimueka babe tedilanga Yobi wuba kiminu ti Yave kalendi kunzimbakana ko na kufua. Diawu kakambila Nzambi: “Ngie wala kuthela, minu yala [kutambudila] Ngiewu wala tomba kuvutula bivangu biaku.”—Tanga Yobi 14:13-15.

2. Buidi tuzabidi ti bafua bala vulubuka?

Bo Yesu kaba va ntoto, Yave wumvana lulendu muingi kuvulubusa bafua. Yesu wuvulubusa muana nkieto mueka wuba 12 di mimvu ayi muana mfuizi wumueka. Ayi Yesu wununga kuvulubusa nkundi’andi Lazalu kheti vavioka bilumbu 4 tona kafua. (Malako 5:41, 42; Luka 7:12-15) Vayi ava kavulubusa nkundi’andi Lazalu, Yesu wudila ayi wusambila kuidi Yave. Bo kamana kuvanga nsambu, nandi wutuba: “Lazalu basika kunganda.” Ayi “dibakala wuba wufua—wubasika.” (Yoane 11:43, 44) Yindula mayangi basi dikanda ayi bakundi ba Lazalu baba.

3. Kivuvu mbi tuidi mu batu bafua tunzolanga?

Kibibila kitu kanikisa: “Kuala ba luvulubukusu.” (Mavanga 24:15) Batu boso Yesu kavulubusa bo kaba va ntoto, basa kuenda ko ku diyilu. (Yoane 3:13) Bawu baba mu mayangi bo Yesu kaba vulubusa muingi babue zinga va ntoto. Bobuawu mvandi, mu bilumbu binkuiza Yesu wala vulubusa bivevi na bivevi bi batu muingi bazinga ku paladizu va ntoto. Nandi wutuba ti batu “boso badi ku biziami” kheti batu tuyindulanga ti basi ko mu kilunzi ki Yave, bala vulubuka.—Yoane 5:28, 29..

BUELA LONGUKA

Mona bivisa bi Kibibila bimmonisa ti bafua bala vulubuka. Ayi longuka buidi luvulubukusu lu bafua lulenda kuvanina kivuvu ayi mbombolo.

4. Yesu wuvana bivisa ti kalenda vulubusa bafua

Buela longuka mambu Yesu kavangila nkundi’andi Lazalu. Tanga Yoane 11:14, 38-44, bosi tubilanu biuvu binlanda:

Bivisa mbi tuidi ti Lazalu wuvulubuka?—Tala lutangu 39.
Boti Lazalu wuyenda ku diyilu, bukiedika kuandi ti khanu Yesu wubue mvulubusa muingi kabue zinga va ntoto?

Tala VIDEO.

VIDEO: Yesu Wuvulubusa Lazalu (1:16)

5. Bawombo bala vulubuka

Tanga Minkunga 37:29, bosi tubilanu kiuvu kinlanda:

Batu boso bala vulubuka, kuidi bala zingila?

Yesu, kalasa vulubusa ko to batu bambuongiminanga Yave. Tanga Mavanga 24:15, bosi tubilanu kiuvu kinlanda:

Mutu mbi wufua ngie waba zolanga, wuntomba kavutuka kubue zinga?

Muingi wuyindula: Tata kamonanga ko phasi kukotula muan’andi widi mu kulala. Bobuawu mvandi, Yesu kalasa mona ko phasi kuvulubusa bafua

6. Luvulubukusu lulenda kutuvana mbombolo ayi kivuvu

Kinongo ki muana Yayilusi kivana khindusulu ayi mbombolo kuidi baboso baba mu kiunda. Tanga kinongo kioso mu Luka 8:40-42, 49-56.

Ava kavulubusa muana beni, Yesu wukamba Yayilusi: ‘Bika kumona boma, vayi lekila kiminu.’ (Tala lutangu 50.) Buidi kivuvu ki luvulubukusu kilenda kusadisila . . .

Mu thangu mutu wunzolanga kamfua?
Bo luzingu luaku luidi va kingela?

Tala VIDEO, bosi tubilanu kiuvu kinlanda.

VIDEO: Buidi Kivuvu ki Luvulubukusu Kituvanina Kibakala? (3:21)

Buidi kivuvu ki luvulubukusu kivanina kibakala ayi mbombolo kuidi dikanda di Felicia?

BATU BANKAKA BANTUBANGA: “Didi diambu diphasi kukikinina ti bafua balenda bue zinga.”

Buidi ngie wummuena?
Matangu mbi ma Kibibila ngie wulenda sadila muingi kusudikisa ti kuala ba luvulubukusu?

MBI NGIE BELONGUKA

Kibibila kinkanikisa ti bivevi na bivevi bi batu bafua, bala vulubuka. Yave wuntomba kuvulubusa batu ayi nandi wuvana lulendu kuidi Yesu muingi kavulubusa bafua.