DILONGI 34
Mbi Tulenda Vanga Muingi Tumonisa ti Tunzolanga Yave?
Tona mu thangu wutona kulonguka Kibibila, luzolo luaku mu Yave luidi mu kudekuka voti luidi mu kubuelama? Ngie wuntomba kutatamana kukindisa kikundi kiaku na Yave? Boti ngete, tebuka moyo ti bo Yave kammona luzolo luaku mu nandi kubuelama buawu kankuiza luta kuzodila ayi kukieba. Buidi wulenda monisina ti wunzolanga Yave?
1. Buidi tulenda monisina luzolo luitu kuidi Yave?
Befu tummonisanga luzolo luitu kuidi Yave, bo tuntumukina minsiku miandi. (Tanga 1 Yoane 5:3.) Yave katukuikanga ko tuntumukina, vayi nandi wutuvananga luaku lu kusola boti tukuntumukina voti ndamba. Kibila mbi? Kibila Yave wuntomba muingi befu “tuntumukina mu ntim’itu woso.” (Loma 6:17) Mawu mansundula ti Yave wuntomba ngie wuntumukina bakana ko mu lukuiku vayi mu kibila ki luzolo luaku mu nandi. Mu kikhuku ki 3 ayi 4 ki buku ayiyi kinkuiza kusadisa kumonisa luzolo luaku mu nandi mu kuntumukina ayi kubika kuvanga mambu manyongisanga ntim’andi.
2. Mbi bilenda ku tutula nkaku muingi tumonisa luzolo luitu mu Yave?
“Mutu wusonga wumviokilanga mu ziphasi.” (Minkunga 34:19) Befu boso tunnuananga nzingu muingi tununga zinzimbala zitu. Ayi mvandi tulenda viokila mu mambu mawombo maphasi dedi: kukhambu zimbongo, mambu makhambulu masonga voti mambu mankaka. Bo tuntovuka, tulenda mona phasi kutumukina mambu Yave katu dinda. Vayi bo wumvanga mangolo muingi wutatamana wukuikama mu Yave, ngie wummonisanga ti nandi widi mutu wulutidi nkinza mu luzingu luaku. Ayi nandi mvandi wunkuiza ba wukuikama mu ngie ayi kalasa kukuekula ko.—Tanga Minkunga 4:3.
BUELA LONGUKA
Longuka kibila mbi kutumukina Yave didi diambu dilutidi nkinza ayi longuka mbi bilenda kusadisa kutatamana wukuikama mu nandi.
3. Mambu ba tuvunina
Dedi bummonisina buku yi Yobi Satana wuvunina mambu bika kuandi to kuidi Yobi, vayi kuidi batu boso bambuongiminanga Yave. Tanga Yobi 1:1, 6–2:10, bosi tubilanu biuvu binlanda:
-
Mu kutala mambu Satana katuba, kibila mbi Yobi kaba tumukinanga Yave?—Tala Yobi 1:9-11.
-
Mbi Satana katuba matedi batu boso, kubunda mvandi ngiewu?—Tala Yobi 2:4.
Tanga Yobi 27:5b, bosi tubilanu kiuvu kinlanda:
-
Buidi Yobi kamonisina ti waba zolanga Yave mu bukiedika?
Yobi wumonisa luzolo luandi mu Yave mu kuba wukuikama mu nandi
Befu tummonisanga luzolo luitu mu Yave bo tuntatamana bakuikama mu nandi
4. Tatamana kukuangidika ntima wu Yave
Tanga Zingana 27:11, bosi tubilanu kiuvu kinlanda:
-
Buidi Yave kammuenanga bo ngie wu kuntumukina ayi kibila mbi?
5. Ngie wulenda ba wukuikama mu Yave
Luzolo luitu mu Yave lutu natanga kuzabikisa bankaka matedi nandi. Lukuikumunu luitu mu nandi, lutu natanga kuntumukina kheti didi diambu diphasi kuvanga mawu. Tala VIDEO, bosi tubilanu biuvu binlanda.
-
Ngie wummonanga boma kuzabikisa kuidi bankaka matedi Yave?
-
Mu Video tube mona, mbi bisadisa yaya Gerson kununga boma kaba?
Befu kuzola mambu Yave kanzolanga ayi kulenda mambu nandi kanlendanga, disinkuiza ba ko diambu diphasi kuvanga mambu Yave kantomba. Tanga Minkunga 97:10, bosi tubilanu biuvu binlanda:
-
Mu kutadila mambu moso malonguka, mambu mbi Yave kanzolanga ayi kanlendanga?
-
Buidi wulenda longukila kuzola mambu Yave kanzolanga ayi kulenda mambu nandi kanlendanga?
6. Tumbakanga ndandu bo tuntumukina Yave
Kutumukina Yave diawu diambu dilutidi. Tanga Yesaya 48:17, 18, bosi tubilanu biuvu binlanda:
-
Ngie widi lufiatu ti Yave zebi mambu malutidi mboti mu befu?
-
Buidi ndongukulu’aku yi Kibibila ayi kiedika wunlonganga matedi Yave ma kusadisilanga?
BATU BANKAKA BANTUBANGA: “Mambu yimvanganga masi ko nkinza va meso ma Nzambi.”
-
Matangu mbi ma Kibibila ngie wulenda sadila muingi kumonisa ti mambu tumvanganga malenda kuangidika voti kunyongisa Yave?
MBI NGIE BELONGUKA
Ngie wulenda monisa luzolo luaku kuidi Yave mu kuntumukina ayi mu kutatamana wukuikama kheti bo wumviokila mu ziphasi.
Vutukila Mambu Mamfunu
-
Mbi belonguka mu kifuani ki Yobi?
-
Buidi wala monisina luzolo luaku mu Yave?
-
Mbi binkuiza kusadisa kutatamana wukuikama mu Yave?
TALA MAMBU MANKAKA
Bakula buidi wulenda bela wukuikama mu Yave ayi kuidi zikhomba mu kimvuka.
“Kuidi Mutu Wukuikama Ngie Wu Kummonisanga Lukuikumunu” (16:49)
Buela longuka matedi mambu Satana kavunina batu.
“Jó mantém a integridade” (A Biblia Qual É A Sua Mensagem? seção 6)
Longuka buidi matoko balenda monisina luzolo luawu kuidi Yave.
Buidi matoko bantatimininanga bakuikama kheti bo matoko mankaka bantombanga kuba vukumuna muingi bavanga mambu mambi?
