DILONGI 38
Monisa ti Wumvuanga Nkinza Nkhayilu wu Luzingu
Bo tuidi bamoyo, tuidi luaku lu kuvanga mambu mawombo muingi tubaka mayangi mu luzingu. Ayi kheti bo tumviokila mu ziphasi, tulenda baka mayangi mu luzingu. Buidi tulenda monisina ti tumvuanga nkinza nkhayilu wu luzingu? Kibila mbi kinkinza tuidi muingi kuvanga mawu?
1. Kibila mbi tufueti vutudilanga matondo mu nkhayilu wu luzingu?
Tumvuanga nkinza luzingu, kibila luidi nkhayilu wunkuizilanga kuidi Tat’itu yi luzolo Yave. “Nandi widi tho yi luzingu”—ayi nandi wutuvana moyo. (Minkunga 36:9) “Nandi wumvananga luzingu ayi wumvumuku kuidi baboso.” (Mavanga 17:25, 28) Yave wutuvana biuma bioso bintombulu muingi tuba bamoyo. Bulutidi, nandi wutuvana biabioso tuntomba muingi tuba mu mayangi.—Tanga Mavanga 14:17.
2. Buidi tulenda monisina ti tumvuanga nkinza nkhayilu wu luzingu Yave katuvana?
Tona ngudi’aku kaba mu buemba buaku, Yave wutona kukukieba. Mu thuadusulu yi phevi yinlongo, Davidi wutuba: “Meso maku mamona nyitu’ama yikhambulu yikubuku.” (Minkunga 139:16) Luzingu luitu luidi beni nkinza va meso ma Yave. (Tanga Matai 10:29-31.) Yave wumbanga beni mu kiunda bo mutu kambaka makani ma kuvonda wunkaka, ayi kukivonda. a (Esodu 20:13) Mvandi Yave wumbanga mu kiunda boti tuisinkieba ko buboti luzingu luitu voti lu bankaka. Bo tunkieba buboti luzingu luitu, tummonisa ti tumvuanga nkinza luzingu luitu ayi lu bankaka. Bulutidi, tummonisanga ti tumvuanga nkinza nkhayilu wu luzingu.
BUELA LONGUKA
Fiongunina ziphila wulenda monisina ti wumvutulanga matondo mu nkhayilu wu luzingu.
3. Kieba buboti buvinya buaku
Befu baklisto bakiedika tunsadilanga luzingu luitu muingi kusadila Yave. Zinyitu zitu zidi buka minkhayilu tumvananga kuidi Yave, diawu tufueti kiebila ziawu buboti. Tanga Loma 12:1, 2, bosi tubilanu biuvu binlanda:
-
Bibila mbi tuidi muingi kukieba buboti buvinya buitu?
-
Mu ziphila mbi tulenda vangila mawu?
4. Ba keba keba muingi wubika tula luzingu luaku va kingela
Kibibila ki tunkindisa tubika vanga mambu malenda tula luzingu luitu va kingela. Tala VIDEO muingi wulonguka mambu mbi fueti vanga muingi wuba mu nsika.
Tanga Zingana 22:3, bosi tubilanu buidi ngie ayi bankaka balenda bela mu nsika . . .
-
ku nzo.
-
ku kisalu.
-
bo tunta bisavu.
-
bo wundiatisa dikalu voti bo wundiatila mu dikalu.
5. Kinzika luzingu lu muana widi mu kivumu
Davidi wutuba ti, Yave wumvuanga beni nkinza luzingu lu muana kheti bo kadi mu kivumu ki ngudi’andi. Tanga Minkunga 139:13-17, bosi tubilanu kiuvu kinlanda:
-
Buidi wummuena, kuidi Yave luzingu lu muana, luntoninanga bo ngudi kadi mu buemba voti bo kambutuka?
Minsiku Yave kavana basi Isaeli miaba kiebanga ngudi ayi muana wukhidi mu kivumu. Tanga Esodu 21:22, 23, bosi tubilanu biuvu binlanda:
-
Buidi Yave kaba muenanga bo mutu mu khambu lutia luandi kamvonda muana wukhidi mu kivumu?
-
Buidi Yave kaba muenanga bo mutu kambaka makani ma kuvonda muana khidi mu kivumu? b
-
Buidi wummuena mu kuzaba diyindu di Yave?
Khumbu zinkaka bo nkieto kadi buemba, luzingu luandi lulenda ba va kingela ayi kheti nandi wunkizikanga luzingu, kalenda yindula ti kubotula buemba yawu to phila yi kuvukisila luzingu luandi. Tanga Yesaya 41:10, bosi tubilanu biuvu binlanda:
-
Bo nkieto kadi buemba ayi ba kumvukumuna kabotula buawu, kuidi nani kafueti dindila lusalusu? Kibila mbi?
BATU BANKAKA BANTUBANGA: “Bo nkieto kadi buemba, nandi widi luaku lu kusola boti wunkuiza botula buawu,—kibila yidi nyitu’andi.”
-
Mambu mbi makuvana lufiatu ti Yave wumvuanga nkinza luzingu lu ngudi ayi lu muana wukhidi mu kivumu?
MBI NGIE BELONGUKA
Kibibila ki tulonga ti tufueti sola kukinzika ayi kukieba buboti nkhayilu wu luzingu Yave katuvana. Mawu mansundula kukieba buboti luzingu luitu ayi lu bankaka.
Vutukila Mambu Mamfunu
-
Kibila mbi Yave kamvuilanga nkinza luzingu?
-
Buidi Yave kammuenanga bo mutu kambaka makani ma kuvonda wunkaka ayi kukivonda?
-
Kibila mbi wumvutudilanga matondo mu nkhayilu wu luzingu?
TALA MAMBU MANKAKA
Buidi tulenda vutudila matondo kuidi Yave mu nkhayilu wu luzingu?
Bakula mvutu wu kiuvu, bukiedika ti Nzambi wala lemvukila nkieto wubotula buemba?
“Mbi Kibibila Kintuba Matedi Kubotula Buemba?” (Dilongi didi mu jw.org)
Kuzaba phila Yave kantadilanga luzingu, kunkuiza tusadisa kusola bisavu bikhambu tula luzingu luitu va kingela.
“‘Desportos radicais’—Vale a pena correr o risco?” (Despertai!, 8 de Outubro de 2000)
Abu mutu na kuba mayindu ma kukivonda? Tala buidi Kibibila kilenda kunsadisila.
a Yave widi wufikama kuidi batu badi mintima mikofakana. (Minkunga 34:18) Nandi wumvisanga mabanza ayi mayindu ma mutu wuntomba kukivonda mu kibila ki ziphasi kadi mu kuviokila mu luzingu, ayi Yave wuntomba kunsadisa. Muingi wumona buidi Yave kalenda sadisila batu badi mayindu ma kukivonda, tala dilongi dintuba “Yintomba Kufua—Bukiedika ti Kibibila Kilenda Kutsadisa Boti Yidi Mayindu ma Kukivonda?” didi vama vantuba “Tala Mambu Makaka” mu dilongi adidi.
b Batu boso babotula memba ava kuzaba buidi Yave kantadilanga mawu ayi banyongina mawu, bafueti vanga mangolo muingi babika kukivana fotu—kibila Yave wuba lemvukila. Muingi wubuela zaba mawu tala dilongi dintuba “Mbi Kibibila Kintuba Matedi Kubotula Buemba?” didi vama vantuba “Tala Mambu Mankaka” mu dilongi adidi.
