DILONGI 42
Mbi Kibibila Kintuba Matedi Kukhambu Kuela ayi Kukuela?
Mu bikhulu binkaka, bawombo bankikininanga ti balendi baka ko mayangi ba kukhambu kuela. Vayi bakana ko batu boso bakuela badi mayangi, mvandi bakana ko baboso bakhambu kuela badi mu kiunda. Kibibila kintuba ti kukuela ayi kukhambu kuela midi minkhayilu mi Yave.
1. Ndandu mbi mutu wukhambu kuela kadi?
Kibibila kintuba: “Woso mutu wunkuela vengi diambu dimboti, vayi woso wukhambu kuela vengi diambu dilutidi mboti.” (Tanga 1 Kolinto 7:32, 33, 38.) Mu phila mbi mutu wukhambu kuela kanluta vangilanga diambu dilutidi mboti”? Baklisto bakhambu kuela, batabukanga ko mu mambu mantatisanga bakuela. Mvandi bawu balutidi kiphuanza. Dedi, badi beni luaku lu kuluta kukivana mu kisalu ki kusamuna voti kukuenda ku bibuangu bidi beni tsatu yi minsamuni. Ayi bulutidi mboti, bawu badi beni thangu muingi kubuela kindisa kikundi kiawu na Yave.
2. Ndandu mbi tunkuiza baka befu kukuedila mu ntinu?
Befu tulenda baka ndandu yiwombo kheti tuidi bakuela voti tuisi ko bakuela. Kibibila kintuba: “batu buadi balutidi kena mutu wumueka.” (Mpovi 4:9) Ayi mawu mammonikanga bo baklisto bansadila minsua mi Kibibila va dikuela diawu. Batu bankuelanga mu ntinu, bankanikisanga kuzolasana, kukiebasana ayi kumonisa lukinzu bawu na bawu. Ayi mawu ma batuadisanga nsika kuluta kena bo bankalanga to va kimueka. Dikuela diawu mvandi dintuadisanga nsika kuidi bana bawu.
3. Buidi Yave kammuenanga dikuela?
Bo Yave kavanga dikuela ditheti, nandi wutuba: “Dibakala wala bika tata ayi ngudi’andi ayi wala tatamana na nkazi’andi mu luzingu luandi loso.” (Ngenesi 2:24) Yave wuntomba muingi nnuni ayi nkazi batatamana kukikiebasana ayi kukizolasana mu luzingu luawu loso. Vayi Yave wunkikininanga luvambanu mu thangu mutu wukuela kamvanga kitsuza na mutu wukhambu kuelana yandi. Mambu amomo ma kumonika, Yave wumvananga luaku kuidi mutu wukhambulu fotu muingi kasola boti wunkuiza vambana voti ndamba. a (Matai 19:9) Yave kakikininanga ko muingi baklisto bakuela bakieto buadi.—1 Timoteo 3:2.
BUELA LONGUKA
Longuka buidi wulenda bakila mayangi ayi buidi wulenda yangidikila Yave, kheti widi wukuela voti wukhambu kuela.
4. Sadila buboti luaku lu kukhambu kuela
Kuidi Yesu kukhambu kuela wuba nkayilu. (Matai 19:11, 12) Tanga Matai 4:23, bosi tubilanu kiuvu kinlanda:
-
Buidi Yesu kasadila luaku lu kukhambu kuela muingi kubuongimina Tat’andi ayi kusadisa bankaka?
Baklisto balenda baka mayangi, ba kusadila luaku lu kukhambu kuela dedi Yesu. Tala VIDEO, bosi tubilanu kiuvu kinlanda.
-
Buidi baklisto balenda sadila luaku lu kukhambu kuela?
Ngie Zebi?
Kibibila kisi nsikika ko phunga muingi mutu kakuela. Vayi kiawu kinkindisa kadika mutu katedimina nati thangu kankuiza nunga “kuyala zitsatu ziandi,” ayi kubaka makani mamboti.—1 Kolinto 7:36.
5. Sola mu nduenga mutu wunkuiza kuela
Kusola mutu wunkuiza kuela, madi makani mankiza wufueti baka. Tanga Matai 19:4-6, 9, bosi tubilanu kiuvu kinlanda:
-
Kibila mbi baklisto bafueti yindudila buboti matedi mutu bankuiza kuela?
Kibibila kilenda kusadisa kufiongunina zikhadulu zi mutu wuntomba kukuela kafueti ba. Vayi wufueti luta tsikika mayindu maku mu mutu wunzolanga Yave. b Tanga 1 Kolinto 7:39 ayi 2 Kolinto 6:14. Bosi, tubilanu biuvu binlanda:
-
Kibila mbi tufueti kuedila to mu Mfumu?
-
Buidi Yave kammuenanga befu kukuela mutu wukhambu kumbuongiminanga?
Befu kutula bibulu biodi bidi beni disuasana mu kutola ayi mu mangolo mu kivangu muingi basala va kimueka, bibulu beni binkuiza tovuka. Bobuawu mvandi, kisadi ki Yave na kukuela mutu khambu buongiminanga Yave nandi wunkuiza viokila mu ziphasi ziwombo
6. Tadila dikuela mu phila Yave kantadilanga
Mu thangu yikhulu, basi Isaeli baba vambananga na bakazi bawu mu dioso kua diambu. Tanga Malaki 2:13, 14, 16, bosi tubilanu kiuvu kinlanda:
-
Kibila mbi Yave kanlendilanga luvambanu mu khambu ku kibila?
Kitsuza va dikuela kintuadisanga beni ziphasi kuidi mutu wukhambulu fotu ayi kuidi bana
Tala VIDEO, bosi tubilanu kiuvu kinlanda.
-
Boti ngie widi wukuela na mutu wukhambu mbangi yi Yave, buidi wulenda bakila mayangi va dikuela?
7. Sadila minsua mi Yave va dikuela
Vantombuluanga mangolo muingi bakuela basadila minsua mi Yave mitedi dikuela. c Vayi Yave wunsakumunanga baboso bamvanganga mawu. Tala VIDEO.
Tanga Ebeleo 13:4, bosi tubilanu biuvu binlanda:
-
Buidi wummuena, bukiedika ti minsiku mi Yave mitedi dikuela misi ko phasi? Kibila mbi wuyindudila abobo?
Yave kantomba muingi baklisto baviaka nlembu bo bankuela ayi bo bamvambana. Ayi mu zitsi ziwombo mintinu bawu badi nsua mu mambu amomo. Tanga Tito 3:1, bosi tubilanu kiuvu kinlanda:
-
Boti ngie widi wukuela, bukiedika ti widi lufiatu ti dikuela diaku didi dizabakana mu ntinu?
BATU BANKAKA BANTUBANGA: “Kibila mbi kukuedila mu ntinu? Didi diambu dimbi kukala to va kimueka?”
-
Mvutu mbi wulenda vana?
MBI NGIE BELONGUKA
Kukuela ayi kukhambu kuela midi minkayilu mi Yave. Diawu woso kua mutu kalenda baka mayangi mu luzingu bo kamvanga luzolo lu Yave.
Vutukila Mambu Mamfunu
-
Buidi mutu kalenda sadila buboti luaku lu kukhambu kuela?
-
Kibila mbi Kibibila ki tukindisila kukuela to mutu wumbuongiminanga Yave?
-
Diambu mbi to Kibibila kimvanina nsua muingi kuvambana na mutu wukuelana yaku?
TALA MAMBU MANKAKA
Mbi binsundula “kukuela mu Mfumu?”
Mona zivideo wadi zinkuiza kusadisa kubaka makani mamboti matedi makangu ayi dikuela.
Mona kibila mbi khomba mueka kammuenanga ti biuma bioso Yave kamvana bilutidi kena biuma bioso kabika.
Mambu mbi mutu kafueti yindula ava kubaka makani ma kuvambana voti kuvasana?
“Kinzika ‘Kibundisa Nzambi’” (Kibanga ki Nsungi, Ngonda Kumi Yimuadi, 2018)
b Mu bikhulu binkaka, matata bawu bansolanga mutu wunkuiza kuela muan’awu. Mu mambu amomo, matata bammonisanga luzolo mu kukhambu tala boti mutu beni widi wulonguka voti widi zimbongo. Vayi bawu bantsikikanga mayindu mawu muingi kuzaba ti mutu beni wunzolanga Yave.
c Boti ngie wunkalanga na mutu wukhambu kuela yaku mu ntinu, buna ngie veka fueti baka makani ma kuvambana voti kukuela na mutu beni mu ntinu.
