Yesu wulonga ti minlandikini miandi bafueti ba “bavasuka mu nza.” (Yoane 15:19) Mawu mansundula kumanga kukota mu mambu ma nza—dedi: mambu ma pulitika ayi mimvita. Bukiedika, thangu zinkaka dilenda ba diambu diphazi kutatamana kuba wuvasuka mu mambu ma nza, kibila balenda kutuvueza. Buidi tulenda tatiminina bavasuka mu mambu ma nza ayi kutatamana bakuikama kuidi Yave?

1. Buidi baklisto bantadilanga luyalu lu batu?

Baklisto bankinzikanga zimfumu zi luyalu. Befu tumvanganga momawu Yesu katuba “luvana bi Sezali kuidi Sezali”—diawu tuntumukinanga minsiku mi tsi, buka kufuta ziphaku. (Malako 12:17) Kibibila kintuba ti zimfumu zi luyalu badi mu kuyala kibila Yave wu bavana nsua wu kuyala. (Loma 13:1) Vayi befu tuzebi ti luyalu luawu luidi ndilu. Kibila tuidi mu kutemina Kintinu ki Nzambi kiala manisa mambu moso maphazi tumviokilanga.

2. Buidi tulenda monisina ti tuidi bavasuka mu mambu ma nza?

Dedi Yesu, tukotanga ko mu mambu ma pulitika. Mu thangu batu bamona mangitukulu Yesu kavanga bo kaba va ntoto, bawu baba tomba kumbieka ntinu wu nza vayi nandi kasa vitika ko. (Yoane 6:15) Kibila mbi kamangina? Kibila nandi wutuba: “Kintinu kiama kisi ko ki nza ayiyi.” (Yoane 18:36) Dedi minlandikini mi Yesu, befu mvitu tuidi bavasuka mu mambu ma nza mu ziphila zioso. Dedi, tunuananga ko mimvita. (Tanga Mika 4:3.) Tunkinzikanga bidimbu bi tsi vayi tubibuongimina ko. (1 Yoane 5:21) Ayi tusolanga ko voti tulendanga ko batu badi mu mangumba ma pulitika bantomba luyalu. Mu ziphila aziozio ayi zinkaka befu tummonisanga ti tuidi bakuikama mu Kintinu ki Nzambi.

 BUELA LONGUKA

3. Baklisto bakiedika badi bavasuka mu mambu ma nza

Yesu ayi minlandikini miandi ba tubikila kifuani kimboti. Tanga Loma 13:1, 5-7 ayi 1 Petelo 2:13, 14. Bosi, tala VIDEO ayi tubilanu biuvu binlanda.

• Kibila mbi tuntumukinanga zimfumu zi luyalu?

• Mu ziphila mbi tummonisinanga ti tubatumukinanga?

Mu thangu yi mimvita, mimvila minkaka balenda tuba ti badi bavasuka vayi bawu bambuelanga mioko mangumba madi mu mimvita. Mbi binsundula kuba wuvasuka? Tanga Yoane 17:16. Bosi, tala VIDEO ayi tubilanu kiuvu kinlanda.

• Mbi binsundula kuba wuvasuka mu mambu moso ma nza?

Mbi tulenda vanga boti zimfumu zi luyalu bantomba tuvanga mambu makhambulu kithuadi na minsua mi Nzambi? Tanga Mavanga 5:28, 29. Bosi, tala VIDEO ayi tubilanu biuvu binlanda.

• Boti zimfumu zi luyalu ba tuvana nsiku wukhambulu kithuadi na minsua mi Nzambi, buna nani tufueti tumukina?

• Mu mbuenu’aku, nsiku mbi wu mintinu mi luyalu wo baklisto balendi tumukina ko?

4. Ba wuvasuka mu mayindu ayi mu mavanga

Tanga 1 Yoane 5:21. Bosi, tala VIDEO ayi tubilanu biuvu binlanda.

• Mu video tube mona, kibila mbi yaya Ayenge, kabakila makani ma kubika kukota mu mambu ma pulitika voti kubuongimina kidimbu ki tsi?

• Mu mbuenu’aku makani mamboti kabaka?

Mambu mbi mankaka malenda thota lukuikumunu luitu? Tala VIDEO, bosi tubilanu biuvu binlanda.

• Buidi tulenda tatiminina kuba bavasuka mu mambu ma nza, boti tuntala batu badi mimvila miviakana banta bola?

• Buidi tulenda tatiminina bavasuka mu mambu ma nza, boti zimfumu zi luyalu bambaka makani malenda tutuadisa ziphasi?

• Buidi zitsangu tunkuwa mu radio, mu televisão voti mo batu bantuba, malenda ku tutudila nkaku kuba bavasuka mu mambu ma nza?

 MBI NGIE BELONGUKA

Baklisto bakiedika bamvanganga mangolo muingi baba bavasuka mu mambu ma nza mu mayindu, mu mavanga ayi mu mambu bantuba.

Vutukila Mambu Mamfunu

• Mbi mintinu mi luyalu badi nsua wu kutambula kuidi befu?

• Kibila mbi tuididi bavasuka mu mambu ma nza?

• Mambu mbi malenda kutula nkaku muingi wutatamana wuvasuka mu mambu ma nza?