Batu badi mu dikuela dimona, bantombanga muingi mayangi baba mu kilumbu bakuela matatama mvu ka mvu. Mawu malenda monika. Kibila zikhomba ziwombo bakuela mu thama bamvanganga mangolo ma kutumukina minsiku mi Yave, bankikininanga ti mawu madi makiedika.

1. Malongi mbi Kibibila kimvana kuidi banuni?

Yave wuvana kuidi nnuni kiyeku ki kuba mfumu yi dikanda. (Tanga Efeso 5:23.) Yave wuntomba muingi nnuni kabaka makani mankuiza tuadisa ndandu kuidi dikanda dioso. Kibibila kinlubula banuni: “Lutatamana kuzola bakazi binu.” (Efeso 5:25) Mbi mawu mansundula? Nnuni widi luzolo wunkiebanga nkazi’andi mu luzolo kheti bo kadi va naveka voti vantuala batu bankaka. Nandi wumvanganga mangolo muingi kukieba zitsatu ziandi zi kinsuni. (1 Timoteo 5: 8) Bulutidi, nandi wumvanganga mangolo muingi kukieba zitsatu ziandi zi kiphevi. (Matai 4:4) Dedi, bawu bansambilanga va kimueka ayi bantanganga mvandi Kibibila. Bo nnuni widi luzolo kankieba nkazi’andi, kikundi kiandi na Yave kinluta banga kingolo.—Tanga 1 Petelo 3:7.

2. Malongi mbi Kibibila kimvana kuidi bakazi?

Diambu di Nzambi dintuba ti nkazi “kafueti ba lukinzu luwombo mu nnuni’andi.” (Efeso 5:33) Buidi nandi kalenda vangila mawu? Mu kutsikika mayindula mu zikhadulu zimboti zi nnuni’andi ayi kuvanga mangolo muingi kukieba nnuni ayi bana bawu. Mvandi mu kutubila mu lukinzu diyindu diandi mu thangu nnuni’andi kambaka makani, kheti nnuni’andi kasi ko Mbangi yi Yave.

3. Mbi bakuela bafueti vanga muingi kukindisa dikuela diawu?

Kibibila kintuba matedi bakuela: “Bawu babuadi bela kituka nsuni wumueka.” (Matai 19:5) Mawu mansundula ti bawu bafueti tatamana kuvanga mangolo muingi ni kiuma kiba vasa voti kidekula luzolo luawu. Balenda vangila mawu bo bamviokisa thangu va kimueka muingi kumonasana luzolo, kuyizabikisa mabanza ayi mayindu mawu. Bawu basinkuiza vitika ko ni mutu voti kiuma kinkaka—kubotula to Yave—kiluta ba nkinza va dikuela diawu. Ayi mvandi bawu bankuiza ba keba keba muingi babika kuba mayindu ma kutona kuzola mutu wunkaka wukhambu kuelana yawu.

 BUELA LONGUKA

4. Banuni—kiebanganu mu luzolo bakazi binu

5. Bakazi—zolang’anu ayi kinzik’anu Banuni binu

Kibibila kinkindisa bakazi bakinzika banuni bawu kheti babuongiminanga ko Yave. Tanga 1 Petelo 3:1, 2, bosi tubilanu biuvu binlanda:

• Boti widi nnuni wukhambu sadilanga Yave bukiedika, ngie wuntomba nandi kasadila Yave. Mu mbuenu’aku mbi bilutidi: kulonganga nnuni’aku kadika thangu, voti kumonisina mu mavanga ti ngie wu kunkinzikanga? Kibila mbi?

Banuni ayi bakazi, balenda baka makani va kimueka.  Vayi thangu zinkaka diyindu di nkazi dibanga ko nguizani na diyindu di nnuni. Vayi kheti bobo, kafueti zabikisa diyindu diandi mu malembi ayi mu lukinzu. Kibila widi lufiatu ti Yave wuvana kuidi nnuni kiyeku ki kutuadisa dikanda ayi ki kubaka makani mantuadisa ndandu kuidi dikanda dioso. Ayi nkazi kafueti buela mioko makani ma nnuni, mu phila ayoyo dikanda dioso dinkuiza ba mu mayangi. Tanga 1 Petelo 3:3-5, bosi tubilanu kiuvu kinlanda:

• Buidi Yave kammuenanga bo nkazi kankinzika nnuni’andi?

6. Ngie wulenda nunga ziphasi va dikuela

 MBI NGIE BELONGUKA

Nnuni ayi nkazi balenda baka mayangi bo bantumukina minsiku mi Kibibila.

Vutukila Mambu Mamfunu

• Mbi nnuni kafueti vanga muingi kutuadisa mayangi va dikuela?

• Buidi nkazi kalenda buedila mioko muingi kutuadisa mayangi va dikuela?

• Boti widi wukuela, matangu mbi ma Kibibila wulenda sadila muingi wukindisa dikuela diaku?