DILONGI 50
Mbi Wulenda Vanga Muingi Kutuadisa Mayangi va Dikanda —Kitini 2
Bana badi nkayilu wu Yave. Nandi wuntomba muingi matata bakieba buboti nkayilu beni. Yave wumvananga malongi malenda sadisa matata kuvanga mawu. Mvandi malongi beni, malenda sadisa bana babuela mioko muingi batuadisa mayangi va dikanda.
1. Buidi Yave kantombila matata bakiebila bana bawu?
Yave wuntomba matata bazola bana bawu ayi baviokisanga yawu thangu. Mvandi matata bakakidila bana bawu mu mambu mambi malenda ku bamonikina ayi basadila minsua mi Kibibila muingi ku balonga. (Zingana 1:8) Yave wunkindisa matata: ‘Yonzul’anu [bana binu] mu . . . malongi ma Yave.’ (Tanga Efeso 6:4.) Yave wunkuangalalanga beni bo matata banlandakana zithuadusulu ziandi mu matedi kukonzula bana ayi mvandi wuntomba muingi matata babika vana kiyeku akiokio kuidi mutu wunkaka.
2. Mbi Yave kantomba muingi bana bavanga?
Yave wunkindisa bana: “Tumukin’anu matata minu.” (Tanga Kolosai 3:20.) Bo bana bankinzika ayi bantumukina matata, bawu bankuiza yangidika Yave ayi mvandi matata mawu. (Zingana 23:22-25) Yesu wuvana kifuani kimboti bo kaba muana kilezi. Kheti wuba mutu wusonga vayi nandi waba tumukinanga ayi waba kinzikanga matata mandi.—Luka 2:51, 52.
3. Mbi wufueti vanga muingi dikanda diaku difikama Yave?
Boti widi tata, bukiedika ngie wuntomba bana baku bazola Yave dedi bo ngie wu kunzodilanga. Buidi wulenda dukisila makani amomo? Mu kulandakana mambu Kibibila kintuba: “Ngiewu wufueti longa mawu [Mambu ma Yave] bana baku ayi kutubila mawu bo muidi bakala ku nzo ayi bo mundiata mu nzila.” (Deutelonomi 6:7) “Kulonga” bantubila avava, kunsundula kuvutukilanga mambu zikhumbu ziwombo. Bobuawu mvandi kuvutukila momawu mambu khumbu ziwombo kuala sadisa bana baku kuma tebukilanga moyo. Matangu amama mansundula ti wufueti vanga mangolo muingi kusadila buboti luaku widi lu kulonga bana baku matedi Yave. Didi diambu dimboti kubotulanga thangu kadika sabala muingi luvanga mbuongimini yi dikanda. Boti wisi ko bana, bobuawu mvandi wulenda botulanga thangu kadika sabala muingi wulongukanga Diambu di Nzambi.
BUELA LONGUKA
Fiongunina buidi malongi ma Kibibila malenda kusadisila kubaka mayangi ayi nsika va dikanda.
4. Longila bana baku mu luzolo
Disi ko diambu diluelu kulongisa bana. Vayi buidi Kibibila kilenda kusadisila? Tanga Yakobi 1:19, 20, bosi tubilanu biuvu binlanda:
-
Buidi matata balenda monisina luzolo mu thangu bankoluka na bana bawu?
-
Kibila mbi matata balendi sembila ko bana bawu bo badi mu nganzi? a
5. Kakidila bana baku
Muingi wukakidila bana baku mu mambu mambi, wufueti vanga mangolo muingi ku balonga matedi: Mbi Kibibila kinlonga matedi kubundana nyitu. Ngie wulenda mona tsonyi kutubila mawu. Tala VIDEO, bosi tubilanu biuvu binlanda.
-
Kibila mbi matata bammuenanga phasi kukoluka na bana bawu matedi kubundana nyitu?
-
Mu ziphila mbi matata mankaka banlongilanga bana bawu matedi kubundana nyitu?
Dedi bo babikudila, nza yi Satana yala luta ba yimbi. Tanga 2 Timoteo 3:1, 13, bosi tubilanu kiuvu kinlanda:
-
Bawombo mu batu bambi bantubila mu lutangu 13 bankuikanga bana balezi babundana yawu nyitu. Kibila mbi didi diambu dinkinza matata kulongisa bana bawu matedi kubundana nyitu ayi mbi bafueti vanga mu thangu ba kubakuika kubundana nyitu?
Ngie Zebi?
Zimbangi zi Yave badi bilongulu biwombo binsadisanga matata kulonga bana bawu matedi kubundana nyitu ayi kuba kakidila kuidi batu bantomba kuba kuika kubundana nyitu. Dedi:
6. Kinzika matata maku
Bana balezi ayi bana ba matoko balenda monisa lukinzu kuidi matata mawu mu thangu bankoluka yawu. Tala VIDEO, bosi tubilanu biuvu binlanda.
-
Kibila mbi didi diambu dinkinza muana kukolukila mu lukinzu na matata mandi?
-
Buidi muana kalenda monisina ti wunzitisanga matata mandi bo kankoluka yawu?
Tanga Zingana 1:8, bosi tubilanu kiuvu kinlanda:
-
Buidi muana kafueti bela bo kantambula tsembulu kuidi matata mandi?
7. Dikanda buongimin’anu Yave va kimueka
Makanda mawombo ma Zimbangi zi Yave basikika kilumbu mu kadika sabala muingi kuvanga mbuongimini yi dikanda. Mambu mbi balenda tubila mu mbungimini’awu? Tala VIDEO, bosi tubilanu biuvu binlanda.
-
Mbi bilenda sadisa dikanda kuvanganga mbuongimini kadika sabala?
-
Mbi matata balenda vanga muingi mbuongimini yi dikanda yituadisa ndandu kuidi baboso va dikanda?—Tala foto yidi va thonono dilongi.
-
Mbi bilenda mutula nkaku muingi kuvanganga mbuongimini yi dikanda kadika sabala?
Yave waba tomba muingi dikabu dioso di basi Isaeli babotulanga thangu muingi kulonguka masonoko. Tanga Deutelonomi 6:6, 7, bosi tubilanu kiuvu kinlanda:
-
Buidi wulenda sadila matangu amomo?
Mambu mulenda vanga mu mbuongimini yi dikanda:
-
Ku kubika lukutukunu.
-
Kutanga Kibibila ayi kutubila binongo bi Kibibila dikanda diaku bankuiza zola.
-
Boti widi bana balezi sadila kikhuku kintuba “Coleções e Atividades” mu jw.org.
-
Boti widi bana ba matoko sadilanu kikhuku ki buku “Os Jovens Perguntam” mu jw.org.
-
Bo wuntanga kinongo ki Kibibila wuyitula va kibuangu ki batu bantubila muna.
-
Talanu ayi tubil’anu zivideo zidi mu jw.org.
BATU BANKAKA BANTUBANGA: “Kibibila kidi beni phasi muingi bana balezi bavisa.”
-
Buidi wummuena diyindu adiodio?
MBI NGIE BELONGUKA
Yave wuntomba muingi matata bazola, balonga ayi bakakidila bana bawu. Mvandi bana bafueti kinzika ayi kutumukina matata mawu ayi makanda bafueti buongimina Yave va kimueka.
Vutukila Mambu Mamfunu
-
Buidi matata balenda longila ayi kukakidila bana bawu?
-
Buidi bana balenda monisina ti banzitisanga matata mawu?
-
Ndandu mbi dikanda balenda baka ba kusikika kilumbu mu kadika sabala muingi bavanganga mbuongimini yi dikanda?
TALA MAMBU MANKAKA
Malongi mbi mala sadisa bana baku bo bala ba bakulutu?
“Seis lições para ensinar ao seu filho” (Despertai!, n.o 2 de 2019)
Malongi Kibibila kimvana matedi buidi bu kukiebila matata bama nuna.
“Mbi Kibibila Kintuba Matedi Buidi bu Kukiebila Matata Bama Nuna?” (Dilongi didi mu jw.org)
Buidi dibakala dimueka kabasa zabanga ko buidi bu kukiebila bana kayiza bela tata wumboti?
Mona buidi matata balenda kindisila kikundi kiawu na bana bawu.
“Como o pai pode se manter achegado a seu filho?” (A Sentinela, 1 de Novembro de 2011)
a Mu Kibibila kusemba kunsundula kuvana malongi muingi kusadisa muana kabalula mayindu ayi mavanga mambi. Vayi fueti vangila mawu mu luzolo.—Zingana 4:1.
