Yesu nandi Mfumu wu kimvuka. (Efeso 5:23) Bubu tonina ku diyilu nandi wumvananga zithuadusulu kuidi minlandikini miandi mioso mu nzila “nnanga wukuikama.” (Tanga Matai 24:45.) Naveka Yesu wuvana nsua kuidi “nnanga wukuikama” muingi katuama ntuala ayi kubaka makani mu kimvuka ki Yave—vayi kheti bobo, bawu mvawu bantumukinanga zithuadusulu zi Yesu—ayi bansadilanga banga zikhomba zi Yesu. Nani nnanga wukuikama? Buidi ba tukiebilanga?

1. Nani “nnanga wukuikama”?

Tona muna tona Yave wunsadilanga babakala voti mua dingumba muingi batuadisa dikabu diandi. (Malaki 2:7; Ebeleo 1:1) Bo Yesu kafua, bapostolo ayi mua bakulutu ku Yelusalemi bawu batona kutuadisa kimvuka ki Yave. (Mavanga 15:2) Mu kulandakana thuadusulu beni, bubu mua bakulutu badi—mu Dingumba Dintuadisi di Zimbangi zi Yave—badi kiyeku ki kuvana bidia bi kiphevi ayi bantuadisanga kisalu ki kusamuna mu nza yimvimba. Dingumba adiodio didi “nnanga wukuikama babieka kuidi [Yesu].” (Matai 24:45a) Baboso mu Dingumba Dintuadisi badi Baklisto basolo bala yala na Yesu ku diyilu mu Kintinu ki Nzambi.

2. Buidi nnanga wukuikama ba tuvaninanga bidia bi kiphevi?

Yesu wutuba ti nnanga wukuikama wala “vananga bidia [kuidi Minlandikini miandi] mu thangu yifuana.” (Matai 24:45b) Dedi bo bidia bi kinsuni bi tuvaninanga mangolo ayi buvinya, bobuawu mvandi bidia bi kiphevi—binkuizilanga mu diambu di Nzambi—bi tuvananga mangolo muingi tutatamana bakuikama kuidi Yave ayi kukieba kisalu Yesu ka tuvana. (1 Timoteo 4:6) Tuntambudilanga bidia bi kiphevi mu zikhutukunu zi kimvuka, zi divula, zi mavula, mu bilongulu bibongulu mu kibibila, ayi mu zivideo zi tusadisanga kuvisa makani ma Nzambi ayi kukindisa kikundi kitu na Yave.

 BUELA LONGUKA

3. Bisadi bi Yave bafueti ba mu kimvuka

Kutsi luyalu lu Yesu, Dingumba Dintuadisi bantuadisanga kisalu ki Zimbangi zi Yave. Mawu mabe monikanga mu sekulu yitheti. Tala VIDEO.

Tanga 1 kolinto 14:33, 40, bosi tubilanu kiuvu kinlanda:

• Buidi matangu amama mammonisina ti Yave wuntomba Zimbangi ziandi baba mu kimvuka?

4. Nnanga wukuikama nandi wuntuadisanga kisalu ki kusamuna

Kisalu ki kusamuna kiawu kiluta ba nkinza kuidi Baklisto mu sekulu yitheti. Tanga Mavanga 8:14, 25, bosi tubilanu biuvu binlanda:

• Mu sekulu yitheti, banani baba tuadisanga kisalu ki kusamuna?

• Buidi Petelo ayi Yoane bamonisina ti bakinzika zithuadusulu baba vana kuidi bapostolo bankaka?

Kisalu ki kusamuna kiawu kilutidi nkinza kuidi Dingumba Dintuadisi bubu. Tala VIDEO.

 Yesu wumonisa ti kisalu ki kusamuna nkinza beni kidi. Tanga Malako 13:10, bosi tubilanu biuvu binlanda

• Kibila mbi kisalu ki kusamuna kididi beni nkinza kuidi Dingumba Dintuadisi?

• Kibila mbi befu tuntombilanga zithuadusulu zi “nnanga wukuikama”?

5. Nnanga wukuikama wumvananga zithuadusulu

Nnanga Wukuikama wumvananga zithuadusulu kuidi Baklisto mu nza yimvimba. Buidi bawu bambakilanga makani matedi zithuadusulu bafueti vana? Mona buidi dingumba diaba tuadisanga Baklisto mu sekulu yitheti baba vangilanga mawu. Tanga Mavanga 15:1, 2, bosi tubilanu biuvu binlanda:

• Mambu mbi maba kuazula Baklisto mu sekulu yitheti?

• Kuidi banani, Polo ayi Balinabasi badindila lusalusu?

Tanga Mavanga 15:12-18, 23-29, bosi tubilanu kiuvu kinlanda:

• Ava kubaka makani, mbi dingumba dintuadisi mu sekulu yitheti baba vanganga?—Tala matangu 12, 15, ayi 28.

Tanga Mavanga 15:30, 31 ayi 16:4, 5, bosi tubilanu biuvu binlanda:

• Buidi Baklisto mu sekulu yitheti baba muenanga makani ma dingumba dintuadisi?

• Buidi Yave kaba sakumunina?

Tanga 2 Timoteo 3:16 ayi Yakobi 1:5, bosi tubilanu kiuvu kinlanda:

• Bubu kuidi Dingumba Dintuadisi bambakilanga zithuadusulu bo bambaka makani?

 MBI NGIE BELONGUKA

Dingumba Dintuadisi nandi “nnanga wukuikama” batambula kiyeku kuidi Yesu muingi kuvana zithuadusulu ayi bidia bi kiphevi kuidi Zikhomba mu nza yimvimba.

Vutukila Mambu Mamfunu

• Nani wuvana kiyeku kuidi “nnanga wukuikama”?

• Buidi Dingumba Dintuadisi ba tukiebilanga?

• Ngiewu wunkikinina ti Dingumba Dintuadisi nandi “nnanga wukuikama”?