Bo tuidi va kimueka na zikhomba zitu, tummonanga momawu mambu  Ntinu David katuba: “Didi diambu dimboti ayi kitoko, zikhomba kuzingila va kimueka mu kithuadi!” (Minkunga 133:1) Kithuadi kitu kimonikinanga ko mu kinzimbukulu. Diawu vantombulu kadika mutu mu befu kuvanga mangolo muingi kutuadisa kithuadi.

1. Mbi bitu vanganga kukuituka va khati dikabu di Yave?

Ngie kulandakana lukutukunu ku tsi yinkaka, kheti wisinkuiza visa ko mbembu bantuba, vayi wunkuiza kukimona dedi ngie widi mu kimvuka kiaku. Kibila mbi? Kibila befu tunlongukanga Kibibila, tunsadilanga biobiawu bilongulu zikhomba bansadilanga mu nza yimvimba. Ayi tumvanganga mangolo muingi tuzolasana befu na befu. Kheti tunkalanga mu zi tsi zinkaka, vayi befu boso ‘tunsadilanga dizina di Yave ayi tu kumbuongiminanga mu kithuadi.’—Sefania 3:9, nota.

2. Mbi tufueti vanga muingi kutuadisa kithuadi?

“Luzolasananga benu na benu mu ntima woso.” (1 Petelo 1:22) Buidi tulenda vangila mawu? Mu kukhambu sikika mayindu mu zikhadulu zimbi zi bankaka, vayi mu zikhadulu ziawu zimboti. Mvandi bika kuviokisa to thangu na zikhomba banzolanga kuvanga momawu mambu ngie wunzolanga, vayi meka kuzaba mvandi zikhomba bazebi kuvanga mambu mu ziphila zinkaka ayi tufueti vanga mangolo muingi tubika ba kifu ki kutuadisa kithatu.—Tanga 1 Petelo 2:17. a

3. Ngie kubakasana mambu na khomba, mbi wufueti vanga?

Befu tumvanganga mangolo muingi kutuadisa kithuadi, vayi tuidi bankua masumu. Khumbu zinkaka tulenda tuba voti kuvanga mambu malenda lueka voti nyongisa bankaka. Diawu diambu di Nzambi ditukindisila: “Lutataman’anu . . . kulemvukila beno na beno,” dibue tuba: “Dedi bo Yave ka mu lemvukila mawu mvinu lufueti vanga.” (Tanga Kolosai 3:13.) Befu tunyongisanga Yave khumbu ziwombo, vayi kheti bobo nandi wu tulemvukilanga. Nandi wuntomba muingi befu mvitu tulemvukilanga bankaka. Befu kutebuka moyo ti tube vanga diambu di benyongisa wunkaka, tufueti vanga mangolo muingi kue dedikisa mawu.—Tanga Matai 5:23, 24. b

BUELA LONGUKA

4. Nunga bifu bilenda tulula kithuadi kitu

Kheti tunzolanga zikhomba zioso, vayi vantombuluanga mangolo muingi kuvitika zikhomba badi mimvila, bikhulu voti zimbembu ziviakana na befu. Mbi bilenda tusadisa? Tanga Mavanga 10:34, 35, bosi tubilanu biuvu binlanda:

• Yave wunkikininanga batu boso muingi baba Zimbangi ziandi. Buidi tulenda landikinina kifuani kiandi mu phila tuntadilanga zikhomba badi baviakana na befu?

• Mambu mbi makhambu fuana mammonikanga beni va kizunga kiaku mo wufueti vangila mangolo muingi wubika?

Tanga 2 Kolinto 6:11-13, bosi tubilanu kiuvu kinlanda:

• Mu mbuenu’aku buidi wulenda luta kindisila kikundi kiaku na zikhomba kheti badi bikhulu ayi mimvila miviakana na befu?

5. Kulemvukilanga bankaka kuntuadisanga ndembama

Yave wutu lemvukilanga kheti vasintombulu ko befu tunlemvukila. Tanga Minkunga 86:5, bosi tubilanu biuvu binlanda:

• Nati kitesu mbi Yave katu lemvukilanga?

• Kibila mbi wu kuntondilanga mu nlemvu’andi?

• Mambu mbi malenda bifisa kithuadi kitu na bankaka?

Buidi tulenda landikinina kifuani ki Yave ayi kutuadisa kithuadi na zikhomba zitu? Tanga Zingana 19:11, bosi tubilanu kiuvu kinlanda:

• Boti mutu be tulueka ntima, mbi tufueti vanga muingi kudedikisa mambu?

Khumbu zinkaka befu tunyongisanga bankaka. Ma kumonika, mbi tufueti vanga? Tala VIDEO, bosi tubilanu kiuvu kinlanda.

• Dedi bummonisina video, mbi khomba yinkieto kavanga muingi kudedikisa mambu?

 MBI NGIE BELONGUKA

Ngie wulenda sadisa kimvuka kitatamana kuba kithuadi mu kulemvukilanga ayi kumonisa luzolo kuidi zikhomba zioso.

Vutukila Mambu Mamfunu

• Buidi wulenda nungina bifu bilenda tulula kithuadi kitu?

• Mbi wunkuiza vanga boti bebakasana mambu na khomba wunkaka?

• Kibila mbi wuntombila kulandakana kifuani ki Yave matedi kulemvukilanga bankaka?