LESSON 57
Mbi Wufueti Vanga Boti Bevola Disumu Dingolo?
Kheti tunzolanga Yave mu ntim’itu woso ayi tumvanganga mangolo muingi tubika nyongisa ntim’andi, vayi kheti bobo khumbu zinkaka tumvanganga zinzimbala. Masumu mankaka malutidi ngolo kena mankaka. (1 Kolinto 6:9, 10) Ngie kuvanga disumu dingolo, tebukanga moyo ti Yave wukhidi kuzolanga ayi nandi widi wukubama muingi ku kulemvukila ayi ku kusadisa.
1. Muingi Yave katulemvukila mbi tufueti vanga?
Baboso banzolanga Yave banyonganga beni ba kuvola disumu dingolo. Vayi bambakanga mbombolo mu kuzaba mambu Yave kakanikisa kuidi dikabu diandi: “Kheti masumu minu madi mabenga, mala kituka maphembi buka matuti maphembi.” (Yesaya 1:18) Befu kunyongina masumu mitu Yave wala tulemvukila. Mbi binsundula kunyongina masumu mitu? Kunsundula kubika kubue vanga yoyawu nzimbala ayi kudinda kuidi Yave muingi ka tulemvukila. Bosi kuvanga mangolo muingi kubalula phil’itu yi kuyindudila, mambu mabe tunata kusumuka ayi kuzingila mu phila yinkuangidika Yave.—Tanga Yesaya 55:6, 7.
2. Boti tube vola disumu dingolo, buidi bakulutu ba tusadisilanga?
Boti tube vola disumu dingolo Yave wutukamba: “Tumisa bakulutu ba kimvuka.” (Tanga Yakobi 5:14, 15.) Bakulutu abobo banzolanga Yave ayi mamemi mandi. Bawu badi kiyeku ki kutusadisa kubue vutula kikundi kitu na Yave.—Ngalatia 6:1.
Buidi bakulutu ba kimvuka batusadisilanga boti tube vola disumu dingolo? Bakulutu buadi voti batatu bankuiza sadila Kibibila muingi ku tusemba. Bawu bankuiza tuvana malongi mamboti ayi khindusulu yilenda ku tusadisa kubika kubue vanga yoyawu nzimbala. Bawu balenda tula ndilu muingi tubika kubue vanga biyeku binkaka tuaba vanganga mu kimvuka nati bala mona ti kiphevi kitu kieka kimboti. Muingi kukakidila zikhomba mu kimvuka, bakulutu balenda vayikisa mutu wunkhambu nyongina disumu dingolo kabe vola.
BUELA LONGUKA
Buela visa buidi Yave katusadisilanga boti tube vola disumu dingolo.
3. Kufungula masumu mitu kutusadisanga kubue vutula kikundi kitu na Yave
Dioso kuandi disumu tube vola dinyongisa Yave, tufueti fungula diawu. Tanga Minkunga 32:1-5, bosi tubilanu kiuvu kinlanda:
-
Kibila mbi didi diambu dinkinza kubika sueka masumu mitu vayi kufungula mawu?
Befu kufungula masumu mitu kuidi Yave ayi kudinda lusalusu kuidi bakulutu, tunkuiza ba kilunzi kidiodila. Tala VIDEO, bosi tubilanu kiuvu kinlanda.
-
Mu video tube mona, buidi bakulutu basadisila Canon kubue vutuka kuidi Yave?
Befu kuzibula ntim’itu ayi kutuba kiedika kuidi bakulutu, bawu bankuiza tusadisa. Tanga Yakobi 5:16, bosi tubilanu kiuvu kinlanda:
-
Kibila mbi didi diambu dinkinza kutubanga kiedika bo tumfungula masumu kuidi bakulutu?
Tubanga kiedika bo wumfungula masumu maku kuidi bakulutu ba kimvuka ayi vitika lusalusu lu Yave
4. Yave wummonanga kiadi batu bamvolanga masumu
Boti mutu bevola disumu dingolo ayi widi mu kumanga kulandakana zithuadusulu zi Yave, bafueti kumbotula mu kimvuka. Ayi befu tulendi bue koluka ko yandi voti kuba yandi kikundi. Tanga 1 Kolinto 5:6, 11, bosi tubilanu kiuvu kinlanda:
-
Dedi bo luvi lumfunisinanga falinya, bobuawu mvandi befu kuba nkangulu na mutu wubotuka mu kimvuka, buna buidi kimvuka kinkuiza bela?
Mu kulandakana kifuani ki Yave ki kumona kiadi batu babotuka mu kimvuka, bakulutu ba kimvuka bamvanganga mangolo muingi kusadisa batu babotuka mu kimvuka. Bawombo babotuka babue vutukanga mu kimvuka, kibila tsembulu yi bavanganga kunyongina masumu mawu.—Minkunga 141:5.
Buidi Yave kammonisinanga kiadi, nlemvu ayi luzolo luandi kuidi batu bamvolanga masumu mangolo?
5. Befu kunyongina masumu mitu Yave wu tulemvukilanga
Yesu wuta kinongo muingi ku tusadisa kuvisa buidi Yave kantadilanga mutu wunyonginanga masumu mandi. Tanga Luka 15:1-7, bosi tubilanu kiuvu kinlanda:
-
Mbi kinongo akiokio ki kulonga matedi Yave?
Tanga Yehezekeli 33:11, bosi tubilanu kiuvu kinlanda:
-
Mambu mbi mankinza mutu wunyongina masumu kafueti vanga?
Dedi nkebi wu mamemi, Yave wunkiebanga mu luzolo mamemi mandi
BATU BANKAKA BANTUBANGA: “Yidi boma kufungula masumu mami mangolo kuidi bakulutu, kibila khanu bawu bankuiza mbotula mu kimvuka.”
-
Buidi wulenda sadisila mutu widi diyindu adiodio?
MBI NGIE BELONGUKA
Befu kuvola disumu dingolo, tufueti kunyongina diawu ayi kubika kubue vanga yoyawu nzimbala. Befu kuvanga mawu, Yave wunkuiza tulemvukila.
Vutukila Mambu Mamfunu
-
Kibila mbi didi diambu dimboti kufungulanga masumu mitu kuidi Yave?
-
Mbi tufueti vanga muingi Yave ka tulemvukila?
-
Befu kuvola disumu dingolo, kibila mbi tufueti tombila lusalusu lu bakulutu ba kimvuka?
TALA MAMBU MANKAKA
Mona buidi dibakala dimueka kabakila ndandu mu kufiongunina lukanu lu Yave luidi mu Yesaya 1:18.
Buidi bakulutu ba kimvuka bankuedikilanga kusadisa batu bamvolanga masumu mangolo?
Tala buidi bammonisinanga luzolo ayi kiadi kuidi batu bammanga kuyongina masumu mawu.
Mu kinongo, “Yaba Tomba Kuvutuka Kuidi Yave,” mona buidi dibakala dimueka wubika kiedika kamuena ti Yave wunyekula.
“A Bíblia muda a vida das pessoas” (A Sentinela, 1 de Abril 2012)
