LESSON 58

Monisa ti Widi Wukuikama mu Yave

TATIKA

Baklisto bakiedika bamvanganga mangolo muingi kukhambu bika ni mutu voti kiuma ki batula nkaku muingi babuongimina Yave. Bukiedika, buawu mvaku wunyindudilanga. Ayi Yave wumvuanga beni nkinza lukuikumunu luaku. (Tanga 1 Lusansu 28:9.) Mambu mbi malenda thota lukuikumunu luaku mu Yave ayi mbi wunkuiza vanga muingi wununga mawu?

1. Banani balenda thota lukuikumunu luitu mu Yave ayi mbi tufueti vanga?

Bawombo bankuiza tutula nkaku muingi tubika sadila Yave. Banani balenda vanga mawu? Batu bantubanga luvunu matedi kimvuka ki Yave, muingi ku tuvanga tubua mu kiphevi. Bawu badi batu babalukila kimvuka. Zimfumu zinkaka zi binganga bantiamunanga zitsangu zi luvunu matedi Zimbangi zi Yave muingi kutula divuda kuidi bankaka ayi babika kiedika. Didi diyindu dimbi: kukoluka na batu babalukila kimvuka, kutanga zibuku ziawu, kutala biuma bantulanga mu internet ayi kutala zivideo ziawu. Mu matedi batu boso bantulanga nkaku muingi bisadi bi Yave batatamana bakuikama kuidi nandi, Yesu wutuba: “Lubabika. Badi ziphofo zinnata ziphofo yawu. Boti phofo widi mu kunata phofo yandi, bawu babuadi balenda doduka mu dibulu.”—Matai 15:14.

2. Mbi luzolo mu Yave lufueti ku tukindisa kuvanga?

Luzolo mu Yave luawu lunkuiza tukindisa tubika ba kithuadi na binganga bi luvunu. Boti kisalu kitu, kikola voti mambu mankaka ma tuvanga kuba kithuadi na binganga bi luvunu, Yave wu tulubula: “Dikabu diama, botukanu mu thinu [mu Babiloni Yinneni].”—Nzaikusu 18:2, 4.

BUELA LONGUKA

Mona buidi tulenda tatukila batu bantomba kudekula lukuikumunu luitu mu Yave ayi mvandi buidi tulenda monisina lukuikumunu mu kubotuka mu thinu mu Babiloni Yinneni.

3. Ba keba keba muingi wubika vunuka mu malongi ma luvunu

Mbi tufueti vanga befu kukuwa luvunu matedi kimvuka ki Yave? Tanga Zingana 14:15, bosi tubilanu kiuvu kinlanda:

Kibila mbi tufueti bela keba keba muingi tubika kukikinina mambu moso tunkuwa?

Tanga 2 Yoane 10, bosi tubilanu biuvu binlanda:

Buidi tufueti tadila batu babalukila kimvuka?
Kheti tuisi ko kinkundi na batu babalukila kimvuka, buidi tulenda buila mu ntambu wu mambu banlonganga?
Mu mbuenu’aku buidi, Yave kankuiza bela befu kulandakana zitsangu zimbi bantubanga matedi nandi voti kimvuka kiandi?

4. Monisa lukuikumunu kuidi Yave boti khomba bevola disumu

Befu kumona ti mutu mu kimvuka bevola disumu dingolo mbi tufueti vanga? Mona nsiku Yave kavana kuidi basi Isaeli mu thangu yikhulu. Tanga Levitiku 5:1.

Dedi bummonisina lutangu alulu, befu kuzaba ti khomba mu kimvuka bevola disumu dingolo, tufueti zabikisa mawu kuidi bakulutu ba kimvuka. Vayi ava kuvanga mawu, buboti beni theti kulubula mutu bevola disumu, muingi kue fungula masumu mandi kuidi bakulutu. Vayi na kumanga kuvanga mawu, lukuikumunu luitu kuidi Yave lunkuiza tunata kuzabikisa disumu diandi kuidi bakulutu. Buidi kuvanga mawu kunkuiza monisina luzolo ayi lukuikumunu luitu kuidi . . .

Yave Nzambi?
Mutu bevola disumu?
Zikhomba zinkaka mu kimvuka?

Boti khomba widi mu kutatuka kimvuka, buna tufueti kunsadisa

5. Basika mu thinu mu Babiloni Yinneni

Tala VIDEO.

VIDEO: Basika Mu Thinu Mu Babiloni Yinneni (5:06)

Tanga Luka 4:8 ayi Nzayikusu 18:4, 5, bosi vana mvutu mu biuvu binlanda:

Dizina diama dikhidi disonama mu kinganga yiba?
Kisalu kiama voti biuma binkaka yimvanganga bikuphanganga yiba kithuadi na binganga bi luvunu?
Bukiedika ti kisalu kiama kidi kithuadi na kinganga ki luvunu?
Vadi mambu mu luzingu luama mantombulu yibalula muingi yitatuka kinganga ki luvunu?
Boti mimvutu miaku midi ngete mu biuvu abiobio, buna wukiyuvusa: Mbi yifueti balula mu luzingu luama?

Mu mamoso, monisa ti widi wukuikama kuidi Yave, mu kubaka makani mankuiza bika kilunzi kiaku kidiodila.

Mbi wunkuiza vanga ba ku kudinda makaba muingi kubuela mioko kinganga ki luvunu?

BATU BANKAKA BANTUBANGA: “Minu yifueti zaba mambu moso batu babalukila kimvuka bantubanga matedi Zimbangi zi Yave kibila minu yilenda kakidila kiedika.”