Yave wuvanga lumbu lu mboti katedila Edeni. Nandi wuwesa biteka, minti ayi bibulu ku Lumbu beni. Bosi kavanga dibakala ditheti mu mfundu mfundu yi ntoto ayi wumvemuna phemu mu mayilu. Zebi mbi bimonika bo Nzambi kavanga mawu? Mutu beni wuyiza tona zinga! Yave wuntedila Adami ayi wumvana kiyeku ki kukyeba lumbu lu Edeni ayi ki kuvana bibulu byoso mazina.

Yave wuvana Adami nswa bo kankamba: ‘Ngye wulenda kwaku kudya makundi moso madi ku lumbu alulu. Vayi mu matedi dikundi di nti di kuzabila mamboti ayi mambi, ngye kudya dyawu, wala fwa.’

Bu vyokila thangu Yave wubwe tuba: ‘Yemvangila Adami nsadisi.’ Bosi Nzambi wulekisa Adami tolo tu ngolo ayi wumbonga luvati voti lubanza kavangila nkyeto katedila Eva. Adami ayi Eva diawu dikanda di theti Yave kavanga va ntoto. Bwidi Adami katadila nkyeto’ando? Nandi wuyangalala beni ayi wutuba: ‘Kheti nandi mvesi  wu mimvesi myami ayi nsuni’ami. Nandi nkyeto wuvangulu mu dibakala.’

Yave wukamba Adami na Eva babutana ayi bawesa ntoto. Nzambi wutomba basala va kimweka mu mayangi mwingi ba balula ntoto woso Paladizu ove lumbu lu mboti buka Edeni. Vayi mambu masa salimina ko mu phila Nzambi katombila. Mu kibila mbi? Mu kapu kinlanda tunkwiza longuka kibila beni.