Yesu wuba bakundi batatu baba kalanga ku divula di Betania. Bawu baba: Lazaro ayi zikhomba zyandi zi bakyeto, Malia ayi Malata. Kilumbu kinkaka bo Yesu kaba ku khonzo yinkaka yi Yolidani, Malia ayi Malata batuma mutu mwingi kakamba Yesu kiza mu thinu, kibila ‘nkundi’andi Lazalo mu kimbevo kadi!’ Vayi Yesu, kasa kwenda ko mu thangu beni. Nandi, wubwe vyokisa bilumbu byodi vangi kakamba minlongisi myandi: ‘Twendi’anu ku Betania mwingi yakotula Lazalo kemu kulala. Bawu bamvutudila: ‘A Mfumu, ti nandi kulala kanlala, muna ma kakotuka kwandi! Yesu wiza basudikisa: ‘Lazalo fwidi.’

Bo Yesu katuka ku Betania, buna vama vyoka bilumbu binna tona Lazalo kafwa. Nandi wu yebata batu bawombo bayenda mwingi kubomba Malata ayi Malia. Thangu Malata kayuwa ti Yesu wulembu yiza, wuduma zithinu mwingi kandengana. Nandi wukamba Yesu: ‘A Mfumu, ti ngyewu wubedi vava, khanu khomb’ami kasa fwa ko.’ Yesu wumvutudila: ‘Khomb’aku wala vulubuka. Ngye wunkikinina mawu?’ Malata wumvutudila: ‘Yizebi ti nandi wala vulubuka mu kilumbu kitsuka.’ Yesu wutuba: ‘Minu ndidi mvulubusu ayi luzingu.’

Malata wuyenda mu thinu ayi wukamba Malia: ‘Yesu makwiza!’ Malia wuduma zithinu kwidi Yesu ayi batu banlandakana. Nandi wufukama va ntwala Yesu ayi waba dila beni. Nandi wutuba: ‘A Mfumu, ti ngye wubedi vava, khanu khomb’ami kasa fwa ko!’ Bo Yesu kamona phila Malia kaba didila khomb’andi, nandi mvandi wutona kudila. Batu bo bamona Yesu kemu dila, biza tuba: ‘A beno, talanu phila kaba zodilanga Lazalo!’ Vayi bankaka baba yikuvula: ‘Kibila mbi kakhambu vukisila nkundi’andi Lazalo?’ Bwabu mbi Yesu kavanga?

Yesu wuyenda va bazikila Lazalo ayi wukamba batu babotula dimanya bafuka vawu. Vayi Malata wutuba: ‘A Mfumu, Lazalo matona kubola kibila vama vyoka bilumbu binna tona kafwa. Angi batu babotula dimanya ayi Yesu wiza sambila: ‘Tata, matondo beni yikuvutudila bila wukukhuwilanga. Minu yizebi ti weta khuwila zithangu zyoso, vayi yintubila bobo mu dyambu di nkangu batu wunzungididi, mwingi bakikinina ti ngyewu wuthuma.’  Bo kamana sambila, wiza tenduka: ‘Lazalo yiza ku nganda!’ Muna thangu beni, Lazalo wiza kwiza ku nganda. Ngye zebi, Lazalo wuba wuzingu mu minledi, diawu bo kabasika Yesu wiza tuba: ‘Nkutulanu ayi bikanu kenda.’

Batu bawombo bamona kimangu Yesu kavanga batula kiminu mu nandi. Bankaka bayenda kamba Bafalisi. Vayi Bafalisi basa tya ko, diawu babakila makani ma kuvonda Lazalo ayi Yesu. Mu 12 di minlonguki Yesu kaba, wumweka baba tedilanga Yuda Isikalioti wuyenda kwidi Bafalasi ayi wuba yuvula: ‘Mbi mulenda kuphana mi kulumonisina vadi Yesu?’ Bawu biza wizana kumfuta 30 ma zimbongo zi palata ayi muna thangu beni, Yuda wuba tomba phila kalenda vakudila Yesu kwidi Bafalisi.