Bafalisi baba lendanga Yesu ayi baba tombanga bila mwingi babaka bu kumbwidila. Bawu baba tubanga ti Nandi kalendi belusa ko batu mu kisabala. Vayi ki Sabala kinkaka bo Yesu kaba vyoka, wumona mutu wufwa meso mu nzila wuba dinda mwingi bansadisa. Nandi wukamba minlandikini myandi: ‘Talanu bwidi mangolo ma Yave mansadisila dibakala adyodyo.’ Yesu wuvotikisa matha na ndambu ntoto, wuvinda mu meso ma dibakala beni ayi wunkamba: ‘Yenda ayi sukula meso mu nlangu wu Silowe.’ Dibakala beni wuvanga mambu Yesu kankamba ayi yawu vyazi yitheti katona kumona mu luzingu lwandi.

Batu baboso batwama kunzaba bayuvasana: ‘A beno! Nandi ko mutu wowo wubedi vwandanga mu nzila ayi wubedi dindanga bansadisa?’ Dibakala beni wuba tubanga: ‘Minu yibedi meso mafwa!’ Batu baba kunkuvulanga: ‘Bwidi matona kumwena?’ Bo kaba sudikisa phila kabelukila, bawu bannata kwidi Bafalisi.

Dibakala beni dikamba Bafalisi: ‘Yesu bevotikisa matha na ntoto wiza kuphinda mu meso ayi wiza khamba yesukula mawu mu nlangu Silowe. Bo yibe vanga mawu yiza tona mona.’ Bafalisi batuba: ‘Yesu kasa ba ko kwidi Nzambi, bila kasinkinzika ko lumbu ki kisabala. Vayi Bafalisi banka batuba ti, Yesu wubelusa mutu beni bila Nzambi wumvana mangolo.

 Bosi Bafalisi batumisa matata ma dibakala beni ayi baba yuvula: ‘Bwidi mwan’inu kama tona mwena.’ Matata mandi maba boma buwombo, bila bawu bazaba ti bafalisi baba kukanga ku nzo lukutukunu batu baba kiminu mu Yesu. Buawu bawu batubila: ‘Twisa zaba ko ni dyambu dimvela. Yuvulanu naveka.’ Vayi Bafalisi ba bwela vana diaka byuvu kwidi dibakala beni babelusa meso. Ayi nandi wuba vutudila: ‘Minu yima kulukamba mambu moso yizebi. Kibila mbi mubwe kuphanina byuvu?’ Bafalisi badasuka ayi bankuka ku nzo lukutukunu.

Yesu wuyenda kuba dibakala beni ayi wunyuvula: ‘Ngye widi kiminu mu Messia?’ Nandi wuvutula: ‘Minu yisa kunzaba ko.’ Yesu wunkamba: ‘Minu Messia.’ Ngye mamona mavanga mamboti Yesu kaba? Nandi kasa belusa ko to dibakala beni, vayi wunsadisa kaba kiminu kikinda.