Buna bamana kukwimbila, Yesu na bapostolo bandi bayenda ku Mongo Minti mi Olive. Yiba khati bwilu ayi mweze wuwombo kuba. Bo bavitila va mongo bantanguninanga Ngetesemani, Yesu wukamba bapostolo bandi batatu: ‘Syalanu vava ayi kengidilanu.’ Bosi nandi wuba tatuka ayi wufukama va mbata mongo mwingi kasambila. Nandi wukamba Yave mu kyunda: ‘Bika luzolo lwaku luvangama!’ Mu thangu beni, Yave wufila mbasi mwingi kukindisa Yesu. Bo kavutuka vaba bapostolo, nandi wubata bawu batatu balala. Nandi wubakamba: ‘Kotukanu!, Ayiyi yisi ko thangu yi kuladila! Kibila thangu yima fwana mwingi yivakulu mu myoko mi zimbeni zyami.’

Mu thangu beni, Yuda wuyiza na dingumba di batu baba zimbedi ayi bimbondo. Yuda wuzaba va kumwena Yesu, kibila bawu baba kwendanga mintulu miwombo vana mongo beni. Nandi wukamba masodi ti wala bamonisina nani Yesu. Bo kafikama vaba Yesu nandi wutuba: ‘Mboti’aku Nlogisi,’ ayi wumvana bejo va ditama. Yesu wutuba: ‘Yuda, ngyewu maphakula mu bejo?’

Bosi Yesu wuyuvula dingumba diyiza na Yuda: ‘Nani luntomba?’ bawu bamvutudila: ‘Yesu mwisi Nazaleti.’ Nandi wubakamba: ‘Minu kuawu.’ Baboso bavutukana nkadu ku mbusa mu boma ayi babwa va tsi. Yesu wuba yuvula dyaka: ‘Nani benu luntomba?’ Bawu batuba: ‘Yesu mwisi Nazaleti.’ Yesu wubakamba: ‘Minu kuawu mutu luntomba, vayi bikanu babakala ababa benda kuawu.’

Bo Petelo kamona mambu maba vyoka, wiza titika mbedi’andi ayi wiza zenga dikutu di dibakala dimweka baba tedilanga Mako. Vayi Yesu wubelusa dibakala beni bo kabwe namika diawu. Bosi wukamba Petelo: ‘Lunda mbedi’aku. Bila woso wunsadilanga mbedi, mu mbedi kala fwila’. Masodi makanga  myoko mi Yesu, ayi bapostolo batina. Masodi beni manata Yesu theti kwidi Ana nganga Nzambi. Nandi wukuba Yesu byuvu biwombo, bosi wufila mambu beni kwidi Kayife Mfumu Zinganga Nzambi. Vayi bapostolo, mambu mbi bayiza monikina?