Va bwilu beni, bo Yesu kaba va sala yi kudila na bapostolo, nandi wubakamba: ‘Benu boso va bwilu abubu ma mumbika minu veka.’ Petelo wuvutula: ‘A Mfumu, minu mve! Kheti baboso batinini, minu yilendi kutina ko. Angi Yesu wukamba Petolo: ‘Ava tsusu yikokula, ngyewu wala tuba vyazi tatu ti wisi kunzaba ko.’

Thangu masodi bayiza kanga Yesu ayi bannata ku nzo yi Kayife, bapostolo boso batina, vayi babwadi balandakana Yesu. Wumweka mu bawu wuba Petelo. Nandi wukota ku nzo Kayife ayi waba kota mbazu vaba batu bankaka. Nkyeto wumweka wuba vana, wukamba Petelo: ‘Minu yi kuzebi, ngye mvaku wube dyatanga na Yesu!’

Petelo wuvutula: ‘Mve, bakana minu ko! Yisi mvisa ko mambu wuntuba!’ Bo Petelo kayenda va ndeko mwelo, nkyeto wunkaka wubwe tuba va meso ma batu boso: ‘Talanu, dibakala adidi bedi mvandi na Yesu.’ Petelo wutuba: ‘Ni Yesu beni wuntubila yisa nzaba ko!’ Dibakala dinkaka diba vana wukamba Petelo: ‘Bukyedika, Ngye widi wumweka mu bawu! Bila phila wunkolukila yidi buka yi basi Ngalili, dedi bunkolukilanga Yesu.’ Petelo wuleva phesi: ‘Mini yisa kunzaba ko!

Mu thangu beni, tsusu yiza kokula. Yesu wubalula thalu kumbusa ayi wutala Petelo. Petelo wuyindula mambu Yesu kankamba ayi wubasika mu thinu ku nganda. Nandi wudila beni!

Mu thangu beni, bakhulutu ba tsi ayi zinganga zi Nzambi bakutakana mwingi kufundisa Yesu ku nzo mfumu Kayife. Baboso baba makani ma kuvonda Yesu diawu baba tombila kibila. Vayi ni kibila basa mbaka ko. Bosi Kayife wuyuvula Yesu: ‘Ngye widi mwana Nzambi?’ Yesu wutambudila: ‘Ngete’ Kayife wutuba: ‘Mavweza Nzambi! A Kibila mbi kinkaka luntomba!’ Baboso bakikana: ‘Kafweti fwa.’ Bawu babula Yesu ayi bantabudila matha. Bawu bafukisila mvandi kizizi ki Yesu bankuba makhomi ayi baba kunsakinina: ‘Ngye bo widi mbikudi, wutukamba nani ma kubula!’

 Bo bwisi bukya, Kayife ayi bakhulutu ba tsi bakutakana ayi bayuvula dyaka Yesu: ‘Ngye widi mwana Nzambi?’ Yesu wuba vutudila: ‘Benu veka luntuba ti Minu yidi mwana Nzambi.’ Bo katubila abobo, bawu babaka buka kibila mwingi kunzengila lufwa ayi bannata ku nzo Ponse Pilatu mfumu yi Loma. Ngye zebi mambu mayiza monika kuntwala? Mawu tunkwiza zaba.