Zimfumu zi zinganga zi Nzambi banata Yesu ti ku nzo ntinu Pilatu. Nandi wuba yuvula: ‘Dyambu mbi di mbi dibakala adidi kama vanga?’ Bawu bavutula: ‘Nandi ma yibyeka ntinu.’ Pilatu wuyuvula Yesu: ‘Ngye widi Ntinu wu basi Yuda? Yesu wuvutula: ‘Kintinu kyama kisi ko ki nza ayiyi.’

Pilatu wufila Yesu kwidi Elodi ntinu Ngalili, mwingi kafyongunina ti kibila kaba voti ndamba. Vayi ntinu Elode mvandi ni kibila kimweka kasa mona ko mu Yesu, diawu kamvutudila kwidi Pilatu. Bosi Mfumu Pilatu wukamba batu boso: ‘Ni ntinu Elode ni minu twisa mona ko kibila mu dibakala adidi. Minu ye kumbikila mwingi kenda kwandi.’ Batu boso batenduka: ‘Kafweti fwa! Kafweti fwa!’ Masodi babula Yesu, bantabudila voti banlobudila matha ayi bankuba zikhomi. Bawu bamvwika mvandi phu yi zitsende ayi baba kunsakinina: ‘Mbote, Ntinu basi Yuda!’ Ntinu Pilatu wubwe kamba batu boso: ‘Minu yinsimmona ko ni kibila kimweka mu dibakala adidi.’ Angi baboso batenduka: ‘Ka bandu! Ka bandu! Pilatu wubikila to mwingi babanda Yesu.

Bosi banata Yesu ti va bwangu bantanguninanga Ngolongota, ayi bambanda va dikunzi. Ava kamana moyo, Yesu wusambila: ‘Tata, wuba lemvukila, kibila basa zaba ko mambu bamvanga.’ Batu beni, batona kuseva Yesu ayi kunsakinina: ‘Boti ngye widi mwana Nzambi, kuluka va dikunzi va widi! Voti wukikula.’

Va khonzo yi lubakala lu Yesu, babanda dibakala dinkaka wuba vanganga mambi. Ava kamana moyo, nandi wudinda kwidi Yesu: ‘Thebukila moyo mu luyalu lu Kintinu kyaku.’ Yesu wunkanikisa: ‘Ngye wala ba yama ku Paladizu.’ Mu masika beni, bazimbukila kitombi ki ngolo kibwa mu thangu beni mu nza yimvimba mu bilokolo bitatu. Malia ngudi yi Yesu ayi minlandikini minkaka baba va ndeko dikunzi babanda Yesu. Wumweka mu bawu wuba Yoane ayi nandi Yesu kakamba mwingi kakyebanga Malia banga ngudi’andi.

Bosi Yesu wutuba: ‘Mamoso masundukidi!’ Nandi wudekika ntu ayi wumana moyo. Mu thangu beni, ntoto wunyikuka mu mangolo. Ku tempelo, nledi wuba kabulanga bwangu Kinlongo ayi Kilutidi Kinlongo,  wubakuka tona ku yilu ti ku tsi. Mfumu mweka yi masodi wuba vana, wukikinina: ‘Bukyedika, Nandi wubedi mwana Nzambi!’