Yesu ava kamaka ku diyilu, wukutikisa minlandikini myandi ku Ngalili ayi wubavana nswa awuwu: ‘Yendanu, lukitula batu ba zitsi zyoso minlonguki myami ayi luba botika.’ Bosi wuba kanikisa: ‘Luzaba mboti ti bilumbu byoso minu ndidi yinu nate vana tsukulu yi nza.’

Mu 40 di bilumbu kabwe kala va ntoto tona kavulubuka, Yesu wumonikina minlandikini myandi miwombo ku Ngalili ayi ku Yelusalemi. Nandi wubalonga malongi mamfunu ayi wuvanga mangitukulu mawombo. Bosi Yesu wukutikisa bapostolo mu ntulu wu tsuka, mu mongo Olive. Nandi wubakamba: ‘Bikanu fika botuka va Yelusalemi, angi teliminanu mambu Tata ka mukanikisa.’

Bapostolo basa visa ko tsundu mambu kabakamba. Diawu bayuvudila: ‘A Mfumu, buna yayiyi thangu wumbyadila Ntinu wu Isaeli.’ Yesu wutuba: ‘Thangu yifwenia ko mwingi Tat’ami kambyeka Ntinu. Vayi pheve yinlongo bu yela kuiza mu beno, buna lwela tambula mangolo ayi lwela ba zimbangi zyama tona va Yelusalemi, mu Yuda dioso, ku Samali ayi nate ku sukila nza.’

Yesu bo katona kumaka ku diyilu matuti mamfuka. Minlandikini myandi baba tala ku yilu angi basa bwe kummona ko.

Mu thangu minlandikini babika mongo wu Olive, bayenda ku Yelusalemi. Kadika kilumbu baba kutakananga ku kibanga ki nzo mwingi basambila. Bawu baba teliminanga mwingi Yesu kaba vana zithwadusulu zimona.