Kumi li bilumbu bivyoka bo Yesu kavutuka ku diyilu, minlonguki myandi batambula pheve yinlongo. Mu mvu 33 Thangu yi Yesu, batu bawombo bayenda ku Yelusalemi mwingi kukemba nkungi bantanguninanga Pentekoti. Mu kilumbu ki nkembo beni, 120 li minlonguki baba bakutakana ku kibanga ki nzo ki mweka ayi mangitikulu mamonika mu thangu beni. Bazimbukila biyoko buka phemu ku nzo beni baba ayi buka nlaka mbazu wumonika va mbata ntu wu kadika nlonguki, ayi batona kutuba zimbembo zivyakana.

Batu bankaka bayenda mu nkungi ku Yelusalemi, bayuwa biyoko bi zimbembo ayi bayenda mu thinu mwingi kuzaba maba monika. Bayituka mu phila baba kolukila zimbembo ziawu. Bawu batuba: ‘Bawu ti basi Ngalili. Bwidi balenda kolukila zimbembo zitu?’

Buawu Petelo ayi bapostolo bankaka bayenda vaba batu beni. Petelo wuba zabikisa bwidi Yesu kafwila ayi Yave kamvulubusila. Petelo mvandi wutuba: ‘Yesu ku diyilu kadi mu thangu ayiyi, widi va khonzo yi Nzambi, ayi nandi wulembu tuvana pheve yinlongo ka tukanikisa. Buawu mulembu mweni bimangu bi phila ayoyi’.

 Mambu Petelo katuba, mabika batu mu mayangi, diawu bawu bayuvudila: “Mbi tulenda vanga?” Nandi wuba vutudila: ‘Lubalula mavanga minu ayi lubotama mu dizina di Yesu ayi lwela tambula pheve yinlongo.’ Mu kilumbu beni 3,000 di batu ba botama. Kutona mu kilumbu beni, thalu yi minlonguki yibwelama ku Yelusalemi mu thinu. Mu mangolo ma pheve yinlongo yi Yave, bapostolo ba basisa bimvuka biwombo ayi balonga batu mambu moso Yesu kaba longa.