Ku Filipi kuba kalanga mwana nkyeto wumweka bayala kwidi pheve yimbi . Pheve beni yiba kunsadisanga kubikula mambu, ayi zimbongo ziwombo zimfumu zi mwana nkyeto beni baba bakilanga mu kisalu ki kubikula mambu. Bo Polo ayi Sila bayenda ku Filipi, mwana nkyeto beni wuba kubalandakananga va mbusa bilumbu byoso. Phevi yimbi yiba mu nandi, yiba vanganga mwana beni katendukanga va mbusa yi bapostolo: ‘Babakala ababa badi bisadi bi Nzambi Nkwa Ngolo zyoso.’ Mvwala Polo wumona moyo suka diawu katubila: ‘Mu dizina di Yesu basika mu nyitu yi mwana nkyeto awowo!’ Phevi beni yibasika muna thangu beni.

Bo bamona ti mwana beni kasi bwe bikula ko mambu mwingi bawu babaka zimbongo, bawu badasuka beni. Bakanga Polo ayi Sila, baba nata kwidi zimfumu ayi batuba: ‘Babakala ababa basintumamana ko minsiku mi tsi ayi divunza diwombo bantula va divula dimvimba!’ Zimfumu batuma baba bula ayi baba tula mu buloku. Nsungi wu buloku wutula Polo ayi Sila mu buloku yiba beni kitombi ayi wukanga malu mawu mu kitini ki nti.

Bo Polo ayi Sila batona kukwimbila mu buloku mwingi kuzitisa Yave, bankaka baba muna bayuwa. Basusukila va khati bwilu nyikunini yinneni yi ntoto, yitolumuna bibaka bi buloku ayi myelo myoso mi buloku ayi ziphanga baba kangila zimana zibuka. Nsungi wu buloku kamwena ti batu boso baba mu buloku bamana kutina, wubonga mbedi mwingi ka yivonda.

Mu thangu beni Polo wutenduka: ‘Bika kwaku ku yivonda phamba! Tala befu boso twidi kuku!’ Nsungi beni wisa duma zithinu vaba Polo ayi Sila. Wiza kuvula: ‘Mbi yifweti vanga mwingi yivuka?’ Bawu bamvutudila: ‘Ngye ayi dikanda dyaku mufweti ba kiminu mu Yesu.’ Polo ayi Sila babwela kunlonga mambu ma Yave. Kuntwala, nandi ayi dikanda dyandi bayiza botama.